Keriekitho 20

Abraham mu Abimelek

1Süsie Abraham-e sünunu rüve se Negeb kijütsa vo di Kadesh mu Shurnie donu lhou; mu puo Gerar nu rüsomia chü di lhou. 2Abraham-e sie puo kimia Sara pu di, “Puo a üpfüwe.” Sitse kediu Abimelek-e mia ketseshü di Sara zelieta. 3Derei Ukepenuopfüe theva Abimelek mho geinu puo ki “Harie, no zekelie thenupfü la no kesiamia puote ho, süpfüe mia nupfünuocü la.” 4Derei Abimelek süpfü penuo vo mo zoluo, süla puo sie, “Niepuu no kejo kejü themiau dukhrituo me? 5Puo thuo a ki, ‘Puo a üpfüwe’ si mo me? Mu süpfü thuo rei, ‘Puo a prüu zo,’ size! A a nou dietho mu jo kemo dzie se hauha chü zo.” 6Sitse Jihova puo mho geinu sie, “U zo, no n nou puotou chü di hau chü zo, süla n bu kephouma chü di a petsouta molieketuo la a n bu puo nyükecü khaliete. 7Tsie no themiau kimia kha lashüwalie, puoe siedzekesimia puocü la, puo n la chashütuo, mu no rheilietuo. Derei no süpfü khashü moro, no mu n themia peteko sia toutaketuo siliecie,” si.

8Süla Abimelek khiserüna sie di puo kituoko pete kielie sidi mha hako pete se uko ki pushü; sitse themiako michie phita. 9Süsie Abimelek Abraham kielie di sie puo ki, “No hieko gei kedipuo chüshü ga? Mu a n gei kephouma kicüpuo chüwa üdi, no a mu a kedirüvie nu kephouma kezha haicü se vorshü ga? No a gei chü zhü kemo mhathoko chüshüte.” 10Süsie rei Abimelek-e Abraham ki, “No kedipuo le di mha hau chüshü ga?” 11Sitse Abraham sie, “Ae Ukepenuopfü khrükeprei thechü hau nu ba ücü le mo mu uko a kimia la a dukhriwatie ru idi mha hau chüwate. 12Sizomoü puo a üpfü ketho zo, puo a puo nuopfü derei a zuo nuopfü mo, sidi puo a kimia chüte. 13Mu Ukepenuopfü a bu a puo kinu tuo rühou parketa ki, a puo ki, ‘No ketseikevi hau a gei chüshü morosuo: avu thechü kehourapuo vo zo rei, a pu di, puo a prüulie’ silienushü.” 14Sitse Abimelek-e tekuo siro mithu, mu puo kituo thepfumia tsiu thenumia rei khapie Abraham tsü, mu puo kimia Sara kha lapie puo tsüwa. 15Süsie rei Abimelek-e sie, “A kijü sü n mhodzünu zhü ze, n thuo n neira lhouliecie,” ita. 16Puo Sara üse, “Harie, a rakali nyie puo se n prüu tsüshü ho; süusü bu n ze ketuo themia peteko mhiki no mezhü ücü thashüwaketuo la.” 17Süsie Abraham-e Ukepenuopfü ki chashü, tsiu Ukepenuopfü Abimelek mu puo kimia siro puo kituopfüko pete chü keshürhoshü; sitse uko u nuonuo nyilie. 18Kekreilamonyü Jihovae Abraham kimia Sara la Abimelek kinuko pete nuobvü khatsawaketa la.

Currently Selected:

Keriekitho 20: ANBRBSI

Highlight

Copy