Keriekitho 18

Isak Penuolieketuo Pukeshü

1Siro khinhieluo ki Abraham-e Mamre phrieboko donu puo pfheki kicie nu keba ki Jihovae puo pengushü. 2Sidi puoe tosie mehoshü ru harie, mia se puo mhodzünu tha. Puo uko ngukeshü ki, puo pfheki kicie nunu uko ze kesetuoü ta vo di tsu zerepfü zhüta. 3Sidi sie, “A Niepuu, a n mhinguki n khriepfüya üro, tuo n kituou therhieta hiecie. 4Dzü huoyo se vor nieko phi khrüwa di nieko seibo khro nu rüleiliecie. 5A niekhrüda huoyo se vor di nieko bu nieko chü pekuolietuo, süze nu nieko tuoliecümu, nieko nie kituou ki vorte ru.” Sitse uko sie, “N kepu kemhie chüliecie.” 6Sitse Abraham rükri se puo pfhekiu nu Sara ki vo di sie, “Thou kememhie kemejü se nelie, di niekhrüda rieliecie.” 7Sitse Abraham tase thukro nu vo di mithunuo kemedzü puo phou kevi yopuo se vor puo kituou tsüshü, sitse puo süu kese mhailie. 8Süsie puo thunudzükhie, thunudzü, mu mithunuo gacha se vor di khapie uko mhodzü shü; sidi uko mhacü keba chie puo vor uko khieki seibo khro tha tso.

9Uko sie puo ki, “N kimia Sara kirapuo ba ga?” siru, puoe sie “Puo pfheki nu ba.” 10Puoe sie, “A hasie bayie teiu nu n ki la vortuo, mu n kimia Sara thepfumia puo ngulietuo.” Mu Sarae pfhekiu kikha puo sietsa kebau nunu puo pfhe silie. 11Süki Abraham mu Sara unie phichüta, tsa phi phreta, siro Sara gei thenumia zho rei tuo mota. 12Süla Sara puo dzükerüchü di, “A mu a nupfu rei tsaketa sie nu, a kenei ba lalie vi me?” 13Sitse Jihova Abraham ki, “Kiüdi Sara nyü di, ‘A tsa zenu a nuo nyilie vi ketho me iga?’ 14Jihova la mhachülie kere huo nyi me? Puoteiu chiekeshüu nu a n ki la vortuo, bayie teiu nu, mu Sara thepfunuomia puo ngulietatuo,” isi. 15Derei Sarae, “A nyü mo zo,” ita; puoe michieketa la. Sitse puoe “No nyü tou zo,” si.

Abraham Sodom la Puo Mezhiekemelo

16Süsie themiako sünunu tuose Sodomtsa vata; mu Abraham-e cha nu uko ze voshü. 17Sitse Jihovae sie, “A mhachüshütuoü kebau pie Abraham pekhretuo me? 18Abraham-e seyie kezha mu kekuo phi puo chütuo, mu kijü nu seyie peteko puo geinu theja ngu zotuo. 19Mo, a puo kedaliete#18:19 Ibri Siliete., puo bu kemiatho tsiu kethoca se lhou di puo nuonuoko mu puo kinuko cha thapie Jihova chau nu tuolieketuo la. Sitse Jihova bu puoe phrakeshüko chü tseipie Abraham gei shülietuo.” 20Sidi Jihova sie, “Sodom mu Gomoranie kephouma rethorketa la unie pejokecü pfhe kemeriete. 21A tsie tsu di unie pejo keba die, a ki vor keba de mo mo shi mehotuo di mo üro a silietuo.”

22Sidi themiako sünunu tuo rüreise Sodom kevatsa vota; derei Abraham-e Jihova mhodzüki tha zo. 23Sitse Abraham tuo penuo phi di sie, “No kemiathoko rei kerüzhüko ze pekawatuo me? 24Mhanuü nadiu nu kemiathomia hiepengou ba ro: no mia hiepengou süko la rünau kelashü mo di pekawatuo me? 25Mhatho hamhiecüko bu n kinu petsetacie, kemiathoko pie kerüzhüko sa dukhriwaketuo, mu sidi kemiathoko bu rei kerüzhüko mhieketa, süu bu n kinu petsetacie! Kijü pete Capiue kemezhüu chüshü lho üme?” 26Sitse Jihovae “A Sodom nu kemiathomia hiepengou nadiu nu ba di ngukelie sie, süko la a thechüu pete kelashü zotuo.” 27Abraham puo die kela di sie, “Harie, a supuomu, nyophe mu mige zorei, a thuo a khapie Niepuu rüchütuoü thate. 28Mhanuü kemiathomia hiepengouketuo mia pengou tso mota ro, no pengouko la nadiu pete pekawatuo me?” Sitse Puo sie, “A mia hiediaepengou ngukelie sie pekawalie lho.” 29Süsie rei puo la sie, “Mhanuü sünu mia hiedia ngulie ro.” Sitse puoe sie, “A mia hiedia la süu chü mota zotuo.” 30Süsie puo la sie, “He-i, Niepuu bu puo nei mota hiecie, a die putuo, mhanuü sünu mia ser ngulie ro.” Puo la sie, “Mia ser ngulie ro süu rei chülie lho.” 31Puo sie, “Harie, a thuo a khapie Niepuu rüchütuo üzhie. Mhanuü sünu mia mepfü ngulie ro.” Puo sie “Mia mepfüko la a süu chülie lho.” 32Süsie puo sie, “He-i, Niepuu bu puo nei mota hiecie, a tsieu va rübei die pucü zotatuomu. Mhanuü sünu mia ker ngulie ro,” puoe sie, “Mia kerko la a süu pekawalie lho.” 33Sidi Jihovae Abraham ze kerüchü tseiwa tse tuota, mu Abraham puo chü nu la vorta.

Currently Selected:

Keriekitho 18: ANBRBSI

Highlight

Copy