Keriekitho 15

Ukepenuopfü Abram Ze Dietseidiekhokelie

1Mha hako sie ziemho nunu Jihovae Abram ki, “Michie hiecie Abram, a n zhüu, mu n zhakhra kezhau zo.” 2Derei Abram la sie, “He-i Niepuu Jihova, no kedipuo pie a tsü ta? A tsie rei a nuo jü zocü la, a kayie sü Damaskamia Eliezer zote.” 3Sidi Abram-e sie, “Noe nuo puorei pie a tsü mote, mu a kinu penuokelie diemia puo thuo a kayie zotatie.” 4Sitse Jihova die puo ki la vorcü, “Themia hau bu n ka welie lho zo. N nuo n noupra puo bu n ka we zotuo.” 5Sidi puo ze chazou vo di, “Tosie tei mehoshü di themvüko phrülie vi ro phrüshücie. N nuosenuoyie bu luko tuoi zotuo ho.” 6Sitse puoe Jihova pelelie, mu süla Jihovae puo üse miatho üta.

7Süsie puoe puo ki “Ae kijü hau pie n bu n vie chütuo üdi Chaldiamia rüna Ur nunu n ze parkeshüu Jihova zo.” 8Derei Abram puo ketso la di, “He-i Niepuu Jihova kedipuo mhie di hau a vie chütuo ücü a silietuo ga?” 9Sitse puoe puo ki, “Teicie seketa thukrüpfü puo, temvükrü puo mu tekuochü puo siro mekhru puo tsiu paruonuo yopuo se a ki vorshücie.” 10Süla puoe süko se puo ki voshü, di da kenienie chülie, di tietsapuo pie kekreitsatieu ze kepetsoushü; derei puo perako we dawa mo. 11Mu tekecü rako tsur kesiamoko gei bakelie ki Abram-e süko whuowa.

12Niaki letakezhü ki, Abram-e ze pesou seta, mu harie kemerie mu zeibouikecü puo puo gei vor. 13Sitse Jihovae sie Abram ki, “N nuosenuoyiekoe u kijü kemo puo nu solhimia chü di miadiemia chü di mia bu cie krie dia uko peseketuo si touliecie; 14derei a kepejo se uko pesekecü seyieko gei shütuo, süsie uko mhanyi phi di tuo partatuo. 15Derei no we n nou mene di n puonuoko ki votatuo; n tsa zenu n khrutuo. 16Siro n nuosenuoyieko phou diau sie nu hanu la vortuo, Amormia kejokemou kechü tsie rei tsei moluokecü la.”

17Niaki leta di zeibouiketa ki, harie, mikhu miü puo mu mitu puo themuo donu vota. 18Sünhie Jihovae Abram ze dietseidiekho puo chülie, di puo ki, “A Ijipt rüu nunu vo kerü kezhau Eufrat rüu ketso, 19Kenmiako, Kenizmiako, Kadmonmiako, 20Hitmiako, Perizmiako, Refamiako, 21Amormiako, Kananmiako, Girgashmiako mu Jebusmiako lhou keba kijü hau pie n nuosenuoyieko tsüwate.”

Currently Selected:

Keriekitho 15: ANBRBSI

Highlight

Copy