Kediko Kenieu 20
20
Hezekia Shürho Lakelie
(2 Seyie 32:24-26; Isa 38:1-22)
1Sükisü Hezekiae mhachülie di siatatuoü bata. Sitse Amoz nuou Isaya siedzekesiu puo ki vor di puo ki, “Jihovae puya; N kiu kese menuopie bawalie, no siatatuocü la; no shürho lalie kenjüte.” 2Sitse Hezekia puo zie kereipie sozhatsa shülie di Jihova ki cha di sie, 3“He-i Jihova, a n ki chaya, a kimhie di a nou ketho se n mhodzünu tuo shicü, mu n mhinguki mezhü ükecüu chü shicü tsie rükrashüyi.” Sidi Hezekia kra phita. 4Sitse Isayae kiluo nunu praketa mhodzü, Jihova die puo ki vor di sie, 5“Rürei la vo di Hezekia a themiako mhokezhau ki pushücie, Jihova, n puo David Kepenuopfüe puya: A n kecha rünyüliete, n mhidzü ngushüte; a n chü keshürho toushütuo; zha se nhie noe Jihova kinu khotatuo. 6Siro a n kelhouzha cie kerepengou sa pekrashütuo; ae Asiria kediu dzie nunu no mu nadi hau kelashütuo; ae a thuo a lanu tsiu a kituou David la nadi hau yalietuo.” 7Sitse Isayae sie, “Chiedesi phro puo se vorliecie, uko bu süu chülie di se vo tichüpfüu kenheshülie, sitse puo shürholietuo.”
8Sitse Hezekiae sie Isaya ki, “Jihova a chü keshürhoshüketuo mu a zha se nhie Jihova kinu khotatuo ükecü zasi kikecüpuo chüshü ta?” 9Sitse Isaya sie, “Jihova kinu kevor zasiu hau, Jihovae phrakeshüu chüshütuo: Mhakhrüu bu tsie phicha ker pedzü vo tuote; süu bu phicha ker pesie la votuo me?” 10Sitse Hezekiae sie, “Mhakhrüu bu phicha ker pedzü vokelie-e kethekhrü mo, mhakhrüu bu phicha ker pesie voshücie.” 11Sitse Isaya siedzekesiu Jihova ki chashü, siru puoe niaki kele kemejü rieu nunu mhakhrüu phicha ker pesie se la vorshü.
Babilon nunu Kevor Dielieko
(2 Seyie 32:27-31; Isa 39:1-8)
12Süki Merodak-baladan, Baladan nuou, Babilon kediu, leshü tsiu mha methuo ketsepie Hezekia tsü, kekreilamonyü puoe Hezekia mhachükecü dze sishü. 13Hezekiae puo nei di uko zelie, puoe puo kinyi kiu nu puoma kere pete, rakachü, suna, mhare kevi, tier puoma kere, puo rünyieko, mu puo mha kengupie keba kiu nu mha ngukelie pete pie uko pekieshü, Hezekiae puo kinu morei puo kediba nu mhapuorei pie uko pekie kemo jü zo. 14Sitse Isaya siedzekesiue kediu Hezekia ki vor di puo ki, “Themia hako kedipuo puya ga? Uko kirapuo nu n ki vor ga?” Sitse Hezekia sie, “Ukoe kepetsera, Babilon nunu vor,” si. 15Puo sie, “Uko n kinu kedipuopuo nguwa ga?” Sitse Hezekia sie, “Ukoe a kinu mha keba pete nguwate, a kinyi puorei uko pekie kemo ba mote.”
16Sitse Isayae sie Hezekia ki, “Jihova die rünyüliecie; 17puotei vorzhie, n kinu keba pete, tsiu n puonuoko vor di thie ha ketso kengupie ketuoko toupfü Babilon nu votatuo; mha yopuorei peshashülie lho sidi Jihovae puya. 18Tsiu n geinu penuoshüketuo n nuonuoko tezetatuo, ukoe Babilon kediu kinu iunukmia chü di lhoutuo.” 19Sitse Hezekia sie Isaya ki, “No Jihova die pukeshü viwe!” sita. Kekreilamonyü puoe lecü, “Mhanuü a teiki noune mu khrukhrekecü bakelie ha vi mo üme?” sita.
Hezekia Se
(2 Seyie 32:32-33)
20Siro Hezekia mhatho kekreiko, mu puo kekuo pete, tsiu puoe kedipuo mhie di rüzie ho shikecü, tsiu dzüyie dou di dzü se nadi nu vor shikecü, süko Juda Kediko thedze Leshüda nu thupie zhü mo üme? 21Siro Hezekiae puo puonuoko ze zezhüta; sidi Manasseh puo nuou puo sou nu kedi chülie.
Currently Selected:
Kediko Kenieu 20: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
