Nugana 18

‘UPWA 18.

1Ta Mamire ‘ina Keigwanao deinaia Ieoba ‘i apwesa ‘enaia, anua ‘awanaia ‘i miatoa asiata iaiiai ‘enega; 2ta i ‘itatu‘e ta ‘i dune, ta, wa ‘ita, tai ‘e toi deinaia si tootooro: ta ni‘atu i ‘itedi, ga anua ‘awanega ‘i pili ga ‘i lobedi, ta bare‘u ‘ena ‘i bwagobwago, 3ta ‘i gwae, ‘Igu ‘inapwana, ‘abo gete matamuia ia bobo‘ana, ia sideio, gea‘abo ‘u da ‘ataona ‘imu ‘ari‘ei ‘enega: 4boasi gidarina gete tuga si da me‘ei, ta ‘aemi wa da ‘utui, ta kaiwe ‘agaraunaia wa da eiawai‘ata; 5ta palaua tomwatomwana ia da me‘ei, ta ‘atemi wa da loepa‘ari; muriega wa da tauia: ‘imu ‘ari‘ei ‘ena wa mai ta ‘enega. Ta si gwae, Na‘ieana ‘u ona, na‘ieana ‘u da guinua. 6Ta Aberaamo ‘i lomanini Sara ‘ena anua ‘enaia, ta ‘i gwae, Palaua bobo‘ai‘ailina keiga ‘e toi ‘u da ‘ewa manini, ‘u da ‘einisi, ta ‘u da gabu dedea. 7Ta Aberaamo ‘i pili lagolagowa ‘edia, ta bulomakau menonoiana nuana ta bobo‘ana ‘i me‘ena, ta toguinua i ‘ebwaena; ta ‘i guinua manimaninina. 8Ta bata i ‘ewena, ta susu, ta bulomakau menonoiana ni‘atu ‘i guinuena, ta matadia ‘i sa‘una; ta deidia ‘i tootooro kaiwe ‘agaraunaia, ta si ‘e‘ai. 9Ta si eonena, Mane Sara mwaneio? Ta ‘i gwae, Wa ‘itanao, anuaia. 10Ta ‘i ona, Ni‘atu tuta ‘i apwesama ga ‘emuia ia da ‘ila ‘ai‘ailama; ta, u ‘ita, Sara mwaneio natuna me‘olotona ‘i da enatunena. Ta Sara anua ‘awanaia, tauna ‘i mia muria, ga ‘i nonona. 11Ta Aberaamo ta Sara iawasidi dudurana, ‘adi tuta ni‘atu ‘i dudurana; iine ‘idi bubuna ni‘atu ‘i gumwara Sara ‘enaia. 12Ta Sara ‘atenaia ‘i edagi, ‘i gwae, Ni‘atu iawasigu ‘i dudurana ga ia da guausoara, ‘igu ‘inapwana wate iawasina ‘i dudura? 13Ta Ieoba Aberaamo ‘ena ‘i ona, To‘ase manuna Sara ‘i edagi, ‘i gwae, ‘Ai‘aila nai ‘abo‘agu goama ia da enatunena, ‘aboagu iawasigu ‘i dudura? 14‘E bweu iage ‘i mwauwawasae Ieoba ‘enaia? Tuta ‘ai‘aila ‘enega ‘emuia ia da ‘ilama, ‘ena tuta ‘i apwesama, ta Sara natuna me‘olotona ‘i da enatunena. 15Ga Sara ‘i eiaseiase, ‘i gwae, Nigea ia edaedagi; ‘i matauta ta ‘enega. Ta ‘i gwae, Nigea; ta ‘u edagi.

16Ta tai nidi gote ‘enega si tooro, ta Sodoma ‘ena si ‘ita: ta Aberaamo ‘i tauia ma‘edi be ‘edega ‘i da ‘asa‘udi. 17Ta Ieoba ‘i ona, Iage ia guinua Aberaamo ‘enega ia da sa‘u kwaia; 18ta ‘ai‘aila Aberaamo ‘i da e ‘asa sinabwana ta waiwai, ta bare‘u ‘ina ‘asa iauiaudi ‘ena si da mia bobo‘ana? 19Ia mwaratonina ta ‘enega, be ‘enega natunao ta ‘ina susu murinaia ‘i da loinedi, be Ieoba ‘ina ‘eda si da ‘ita‘i‘isi, be bubuna ‘ai‘aila ta loina si da guinuei; be ‘enega Ieoba iage Aberaamo manuna ‘i gwae Aberaamo ‘ena ‘i da me‘ena. 20Ta Ieoba ‘i gwae, Sodoma ta Gomora ‘idi bwau sinabwana ta ‘enega, ta ‘idi bubuna to‘umalina ‘i mwau ta ‘enega; 21ga ia da mwa‘uta gete ‘enega, ta ia da ‘ita nai ni‘atu si guinua maibo‘ana nadigega ‘ina bwau, tauna ‘eguia ‘i mai; ta ‘abo nigea, ia da mwaratoni. 22Ta tai nidi gote ‘enega si sana‘ila, ta Sodoma ‘ena si tauia: ta Aberaamo Ieoba matanaia ‘i tootooro. 23Ta Aberaamo serabenaia ‘i doro, ta ‘i gwae, Taudi ‘idi bubuna ‘i paruparuna ‘u da gabudi to to‘umalidi ma‘ediao? 24Nai ‘e pipiti ‘idi bubuna ‘i paruparuna ‘asa ‘ena si miami: esena nina ‘u da gabuna ta gea‘abo nai ‘u da ‘atenua‘ole‘oleiena site pipiti ‘idi bubuna ‘i paruparu manudi? 25Gete bubuna nina ‘emuiega ‘i da mia ‘edasora, ‘aene taudi ‘idi bubuna ‘i paruparu to to‘umalidi ma‘edi ‘u da unudi, be ‘enega taudi ‘idi bubuna ‘i paruparu si da nadigega to to‘umalidi; gote ‘emuiega ‘i da mia ‘edasora: bare‘u maibo‘ana ‘ana To Loina gea‘abo nai ‘i da guinua ‘ai‘aila? 26Ta Ieoba ‘i gwae, ‘Abo Sodoma ‘ena ‘asa gamwanaia taudi ‘idi bubuna ‘i paruparu ‘e pipiti ia lobedi, esena maibo‘ana ia da ‘atenua‘ole‘oleiena leleadi. 27Ta Aberaamo ‘i ona limana ta ‘i gwae, Gete ‘enega ‘u da ‘ita, ‘Abo‘agu nedila ta karikau, taugu ia gewagewana ta Ieoba ‘ena ia ona; 28nai taudi ‘idi bubuna ‘i paruparu ‘e pipiti ‘ediega ‘e paibe nigea: ‘asa maibo‘ana ‘u da loesaoori ‘abo site paibe nigea? Ta ‘i gwae, Gea‘abo ia loesaoori, ‘abo ‘e poti‐paibe ‘ena ia lobena. 29Ta wate ‘ena ‘i ona limana, ta ‘i gwae, Nai ‘e poti ‘ena ‘u da loba. Ta ‘i ona, Gea‘abo ia da guiguinue site poti manudi. 30Ta ‘i ona, Ieoba gea‘abo ‘i da gamwasoara, ta ia da ona: nai ‘e tati ‘ena ‘u da loba. Ta ‘i ona, Gea‘abo ia da guiguinue, ‘abo ‘e tati ‘ena ia lobedi. 31Ta ‘i ona, Gete ‘enega u ‘ita, Taugu ia gewagewana be Ieoba ‘ena ia ona: nai ‘e tweniti ‘ena ‘u da lobedi. Ta ‘i gwae, Site tweniti manudi gea‘abo ia da loesaoori. 32Ta ‘i ona, Ieoba gea‘abo ‘i da gamwasoara, ta gete tuga ma‘ebweuna ia da ona: nai ‘e teni ‘ena ‘u da lobedi. Ta ‘i gwae, gea‘abo ia da loesaooridi site teni manudi. 33Ta Ieoba, ni‘atu ‘ina ona Aberaamo ma‘ieana ‘i losa‘u, ga ‘i tauia: ta Aberaamo ‘ina esena ‘ena i ‘ila.

Currently Selected:

Nugana 18: DOBOT

Highlight

Copy