Nugana 15

‘UPWA 15.

1Iage getedi si gumwara ga Ieoba ‘ina ona Aberamo ‘ena ‘i mai madawarega, ‘i gwae, Aberamo, gea‘abo u ‘atesa‘ara: ‘Abo‘agu ‘imu lawa, ta ‘amu e‘isa tosinabwasana. 2Ta Aberamo ‘i gwae, ‘Inapwana Ieoba ie, to‘ase ‘u da ‘ebwaegu, ‘abo‘agu ia da logara ta nigea natugumo ta ‘enega, ta tauna ‘igu susu tonina Dameseko Eliesa? 3Ta Aberamo ‘i ona, U ‘ita, ‘eguia nigea ‘e bweu natugu u ‘ebwa‘ebwa‘egu: ta, u ‘ita, ‘e bweu ‘igu susu ‘ena ‘i tubutubua tauna ‘igu gwegwe ‘ana to‐‘ewa. 4Ta, wa ‘ita, Ieoba ‘ina ona ‘ena ‘i mai, ‘i gwae, Tai gete gea‘abo ‘imu gwegwe ‘ana to‘ewa; ta tauna tauio diamuiega ‘i da apwesama tauna ‘i da e ‘imu gwegwe ‘ana to‘ewa. 5Ta i ‘au‘ewa apwesena, ta ‘i gwae, Garewa ‘ena ‘u da ‘ita, ta kwadima ‘u da sawedi, ‘abo ‘u ewaiwai be ‘u sawedi: ta ‘i eonena, Gote nadigega tubumuao. 6Ta Ieoba ‘i iarena; ta ‘ena i ‘inanena ‘aene bubuna paruparuna. 7Ta ‘ena ‘i ona, ‘Abo‘agu Ieoba me Kaladea ‘idi Ura ‘enega ia ‘au‘ewemu, sabi ‘ebwaemu ‘asa gete be ‘u da ‘ewena. 8Ta ‘i gwae, ‘Inapwana Ieoba, mwa‘adega ia da mwaratoni be ia da ‘ewena? 9Ta ‘ena ‘i ona, ‘E bweu bulomakau me wainena menonoiana ‘ana iakwara ‘e toi ‘u da ‘ewa, ‘e bweu gota me wainena ‘ana iakwara ‘e toi be, ‘e bweu sipi me‘olotona ‘ana iakwara ‘e toi be, ‘e bweu bunetutu be, ‘e bweu bunebune menonoiana be. 10Ta iauiaudi getedi ‘ena i ‘ewedi, ta gamwagamwanaia ‘i e ‘upwaruedi, ta ‘e bweu ‘upwa ‘i sa‘una be ‘upwa ruena ‘i da miamasina: ta manua nigea i ‘upwaruedimo: 11Ta manua to ‘e‘ai si mwa‘uta esio ‘edia, ta Aberamo ‘i pa‘idi. 12Ta ni‘atu sinara ‘i mwa‘umwa‘uta, ga Aberamo ‘i mwaumwau sinabwana ga i ‘enomwataia; ta, wa ‘ita, guguioi sinabwana madidigana ‘ena ‘i mwa‘uta. 13Ta Aberamo ‘ena ‘i ona, ‘U da mwaratoni ‘ai‘aila tubumuao si da eto‘u‘umara ‘asa nigea ‘idi ‘asa ‘enaia, ta ‘edia si da guinua; ta si da giedeededonidi ga iakwara ‘e poa anaredi; 14ta wate ‘asa gote, taudi ‘edia si da guinua, ia da loinena: ta muriega si da apwesama ma‘idi gwegwe sinabwana. 15Ta ‘oio tubumuao ‘edia ‘u da tauia guguiega; ‘oio si da sa‘uio ‘ena ‘amu tuta ‘i dudura ‘ai‘aila. 16Ta ‘epata‐tomota ‘e atana ‘enega si da ‘ila limanama: me Amori ‘idi bubuna geiogeioi nigea gete ‘i maa ta ‘enega. 17Ta gete ‘i apwesa, ni‘atu sinara ‘i sugua, ta ‘i guguioi, ga wa ‘ita, ‘umura ma‘asuna, ta gudara ‘ara‘arasina egunugunusi ta gamwagamwanidiega ‘i tautauia. 18Asiata gote ‘enega Ieoba ona‘upa‘upa ‘i bubuna Aberamo ma‘ieana, ‘i gwae, Tubumuao ‘edia ‘asa gete ia ‘ebwaedi, boasi ‘awana Aigupito ‘enega ga boasi ‘awana sinabwana, boasi ‘awana Euperatesa: 19me Keni be, me Kenisa be, me Kadamona be, 20me Eta be, me Perisi be, me Repaima be, 21me Amori be, me Kanania be, me Giragasa be, me Iebusi be.

Currently Selected:

Nugana 15: DOBOT

Highlight

Copy