Nugana 12

‘UPWA 12.

1Ga Icoba Aberamo ‘ena ‘i gwae, ‘Imu ‘asa ‘u da pilisinena, ta ‘imu buunao ‘ediega, ta tamaio ‘ina susu ‘enega, ga ‘asa tauna ia da e‘itemu ‘enaia: 2ta ‘asa sinabwana ‘emuiega ia da bubuna, ta ia da onaobobomeio, ta ‘amu esana ia da bubuna be ‘i sinabwa; ta ‘oio ‘u da e ‘ebebobo‘ana: 3ta taudi si onaobobomeio ia da onaobobomedi, ta tauna ‘i eliemu ia da eliena: ta ‘emuiega bare‘u ‘ina susu iauiauna si da eguausoara. 4Ta ‘enega Aberamo ‘i tauia, na‘ieana Ieoba ‘ena ‘i gwaegwae; ta Lota ‘i tauia ma‘ieana: ta Aberamo tuta nina Aranega ‘i tauiawa ‘ana iakwara ‘e sebeniti paibe. 5Ta Aberamo mwanena Sarai i ‘au‘ewai, tasina natuna Lota ta, ‘idi gwegwe iauiauna ni‘atu si egogonena ta, iaruiarua si ‘ewedi Arana ‘enega ta; ga si apwesa sabi tauia ‘asa Kanania ‘enaia; ta ‘asa Kanania ‘ena si mai. 6Ta Aberamo ‘asa nina ‘i rubwarena esena Sekema ‘enaia, More ‘ina keigwana ‘enaia. Ta tuta gote me Kanania ‘asa nina ‘ena si miami. 7Ta Ieoba ‘i apwesa Aberamo ‘ena, ta ‘i gwae, Tubumuao ‘edia ‘asa gete ia da ‘ebwaeae: ta nada ‘ebetaria i ‘abina Ieoba ‘ena, tauna ‘ena ‘i apweapwesa. 8Ta gote ‘enega ‘i logara ‘oea ‘enaia Betela ga bomatu ‘ena, ta ‘ina anua i ‘abina, Betela ‘ebwaga ‘ena ‘i miami, ta Ai bomatu ‘ena: ta nada Ieoba ‘ena ‘ebetaria i ‘abina, ta Ieoba ‘ana esana i ‘inanena. 9Ta Aberamo ‘i tautauia, Iarasi ‘ena ‘i tauia ‘ataia.

10Ta ‘asa nina ‘i botana: ta Aberamo ‘i mwa‘uta Aigupito ‘ena be ‘ena ‘i da miami; ‘asa nina ‘i botana sinabwana ta ‘enega. 11Ta gete ‘i apwesa, ni‘atu ‘i mai be ‘i abe ‘i rugu Aigupito ‘enaia, ga mwanena Sarai ‘ena ‘i ona, U ‘ita gete, Ia mwaratoni ‘oio waine bobo‘ana ‘amu ‘ita: 12ta gete ‘i da apwesa, ni‘atu me Aigupito si da ‘itemu, ga si da gwae, Gete mwanena: ta si da loemawasigu, ta ‘oio si da ‘etoseeio maiawasio. 13Ia sideio, ‘u da ona, ‘aene ‘oio nuugu: be ‘enega ‘i da bobo‘ana eguia manuio ta ‘enega iawasigu ‘i da bobo‘ana manuio.

14Ta gete ‘i apwesa, tauna, ni‘atu Aberamo ‘i mai Aigupito ‘enaia, ga me Aigupito waine si ‘itena ‘i sinebwaina wawasae. 15Ta Parao ‘ina ‘inapwanao si ‘itena, ta Parao ‘ena si tupuna: ta waine si ‘au‘ewena Parao ‘ina anuaia. 16Ta Aberamo ‘ena ‘i guinua ‘ai‘aila manuna: ta ma‘ina sipi ta, bulomakau ta, ase me‘olotodi ta, toguinua me‘olotodi ta, toguinua mewainedi ta, ase mewaiendi ta, kameliao ta. 17Ta Ieoba Parao ta ‘ina anua ‘ana tomianao ‘i unudi muia sinabwadi ‘ediega Sarai Aberamo mwanena manuna. 18Ta Parao Aberamo ‘i bwauiena, ta ‘i gwae, To‘ase gete ‘eguia ‘u guinuena? to‘ase manuna nigea ‘u simana ‘eguia ‘aene mwaneio? 19To‘ase manuna ‘u ona, Tauna nuugu? ta ‘enega ia ‘au‘ewena be ‘i da mwanegu: ta ‘enega gete tuga mwaneio ‘u da ‘ita, ‘u da ‘au‘ewa, ta ‘u da tauia. 20Ta Parao tai ‘i guguiedi manuna: ta ‘edega si ‘au‘ewena, mwanena ta, ‘ina iage iauiauna ta.

Currently Selected:

Nugana 12: DOBOT

Highlight

Copy