San Lucas 10

Jesús oiporavo 72

1Kóva rire Jesús oiporavo 72pe ha omondo henonderã, mokõi-mokõi umi táva rupi ha mamo ha'e oho vaerãháme. 2He'i chupe kuéra: “Ajépa tuicha pe kokue ha heta hi'a, omono'õ vaerãnte mbovy. Upévare, pejerure pe kóga járape tombou umi ou vaerãme omono'õ.#Mt 9.37-38. 3Tapeho peẽ. Peikuaáke pomondoha hína ovecha ra'ýicha aguara guasu apytépe.#Mt 10.16. 4Ani peraha viru ha tembi'u ha pende py rehegua ave. Ha ani pepyta pe poromomaiteívo tapére.#Mt 10.7-14; Mc 6.8-11; Lc 9.3-5. 5Peikévo peteĩ ógape, pemomaitei raẽ pejévo: ‘Py'a guapy ko ógape guarã.’ 6Ha upépe oĩ ramo yvypóra oipotáva py'a guapy, hembipota oikóne. Upeicha'ỹrõ katu, peẽme jeýnte opytáta. 7Pepyta upe óga upévape, ha pe'u ha pey'u umi ha'e kuéra oguerekóvagui. Opa omba'apóvape niko ojehepyme'ẽ vaerã voínte.#1 Co 9.14; 1 Tit 5.18. Ani peva-peva rei peteĩ ógagui ambuépe. 8Peho ramo peteĩ táva peñemoguahẽháme, pe'u umi peẽme oñeme'ẽvagui. 9Pemonguera umi hasýva upépe oĩvape, ha peje chupe kuéra: ‘Tupã sãmbyhy hi'aguĩma pende hegui.’ 10Ha pehórõ peteĩ táva peñemoguahẽ'ỹháme, pesẽ okápe ha peje: 11‘Pende táva pegua yvytĩmbo oja vaekue ore pýre jepe, roityvyro ore pochýgui pende rehe.#Hch 13.51. Ha peikuaáke kóva, Tupã sãmbyhy hi'aguĩma pende hegui.’ 12Ha'e peẽme, ágãnte chupe kuéra oñenupã pohyivéta umi táva Sodómape oiko vaekuégui.”#Gn 19.24-28; Mt 10.15; 11.24.

Jesús oja'o umi táva oguerovia'ỹvape

(Mt 11.20-24)

13Ejererekóke nde, táva Corazín! Ejererekóke nde, táva Betsaida. Táva Tiro ha Sidónpe#Is 23.1-18; Ez 26.1--28.26; Jl 4.4-8; Am 1.9-10; Zac 9.2-4. ojejapo rire umi mba'e hechapyrãva ojejapo vaekue pende pype, ymáma ojevy vaerã mo'ã hikuái Tupã gotyo, ha oñemonde ao vosakuépe ha oguapy tanimbu ári, ohechauka haguã ombyasyha iñangaipa. 14Tupã oporombojovakeha árape, peẽ peñenupã pohyivéta umi táva Tiro ha Sidón peguágui. 15Ha nde, táva Cafarnaúm, reimo'ã piko reguahẽtaha yvágape? Tupã uvei nde reitýta omanóva retãme!#Is 14.13-15. 16Umi pene rendúva, chéve che rendu#Mt 10.40; Mc 9.37; Lc 9.48; Jn 13.20. ha pe ojahéiva pende rehe, ojahéi che rehe. Ha pe ojahéiva che rehe, ojahéi pe che mbouharére.

Umi 72 ou jey

17Umi 72 ou jey hikuái vy'apópe, ha he'i:

--Ore Jára, umi mba'epochy jepe ojapo ro'éva nde rérape.

18Jesús he'i chupe kuéra:

--Upéicha. Che ahecha Satanápe ho'a ramo yvágagui aratirícha. 19Che ame'ẽ vaekue peẽme pokatu peguata haguã mbói ha alakran apytépe,#Sal 91.13. ha pende pu'aka haguã umi pende rehe ija'e'ỹvare, ojehu'ỹre peẽme mba'eve ivaíva. 20Anínte pevy'a umi mba'epochy ojapo haguére pejéva. Pevy'a uvei oimemaháre pende réra ojehai yvágape.

Ta'ýra añoite oikuaa mávapa Túva

(Mt 11.25-27; 13.16-17)

21Upe javete Jesús henyhẽ Espíritu Santo guigua vy'ápe, ha he'i: “Romomba'e guasu che Ru, yvága ha yvy Jára, reñomi haguére ko'ã mba'e umi iñarandu ha imba'e kuaávagui, ha reikuaauka umi iñarandu'ỹvape. Upéicha che Ru, péichante voi reipota vaekue ojehu.

22Che Ru niko omoĩ che po guýpe opa mba'e.#Jn 3.35. Avave ndoikuaái Tupã Ra'ýpe, Túva añónte. Ha avave ndoikuaái Túvape, Tupã Ra'y añónte, ha umi ojekuaaukávape Tupã Ra'y.”#Jn 10.15.

23Ha ojerévo hemimbo'e kuéra gotyo, he'i chupe kuéra año: “Ovy'aiténe umi ohecháva pe peẽ pehecháva hína. 24Añetehápe ha'e peẽme, heta maranduhára ha heta mburuvicha guasu ohechase vaekue ko peẽ pehecháva, ha ndohechái. Ha'e kuéra ohenduse vaekue ko peẽ pehendúva, ha nohendúi.”

Ñe'ẽ mbojoja Samariagua ipy'a porãva rehegua

25Peteĩ Moisés rembiapoukapy mbo'eha oho oñe'ẽ Jesús ndive,#Mt 22.35-40; Mc 12.28-34. ha oha'ã haguã chupe oporandu:

--Mbo'ehára, mba'e piko ajapo vaerã areko haguã jeikove opa'ỹva? 26Jesús he'i chupe:

--Mba'épa oĩ tembiapoukapýpe? Mba'e piko pehecháva kuatiápe? 27Upe Moisés rembiapoukapy mbo'eha he'i:

--Ehayhu Tupã nde Járape ne nde py'aite guive, ne ánga rugua guive ha opa ne arandukue reheve,#Dt 6.5. ha ehayhu nde rapichápe rejehayhuháicha nde.#Lv 19.18.

28Ha Jesús katu he'i:

--Ere porã, rejapórõ upéicha, reikovéta.#Lv 18.5.

29Pe tembiapoukapy mbo'eha katu, omoĩ porãsévo imba'e porandu, he'i Jesúspe:

--Ha máva piko pe che rapicha?

30Aipórõ Jesús he'i chupe:

--Peteĩ karia'y oguata ohóvo Jerusalén rape guio Jericó gotyo, ha peteĩ mondaha aty ohape joko chupe, ha oipe'a chugui ijao peve. Oinupã hikuái ha oheja chupe omano ha nomanóime. 31Peichahágui rei peteĩ pa'i ohasa upe rupi, ha ohechávo chupe ojere chugui ha ohónte ha ndopytái. 32Peteĩ levíta avei oguahẽ upépe, ha ohecha vove, ojere chugui ha ohónte avei tenonderã. 33Peteĩ kuimba'e Samariagua katu, ohóva hína upe tape upévare avei, ohechávo oiporiahurereko chupe. 34Oñemboja hese, oipohano ñandyry ha kaguýpe ha ojokua chupe umi ojekutu hague rupi. Upéi ohupi chupe ikavaju tee ári, ogueraha peteĩ óga ojepytahápe ha oñangareko hese. 35Upe riregua ko'ẽme, upe Samariagua oguenohẽ mokõi ára mba'apokue repy ha ome'ẽ upe óga járape, ha he'i chupe:

--Eñangareko ko karia'ýre. Ndohupytypáirõ viru, che ahepyme'ẽta ndéve upéi ajevývo.

36Ha néi, mávapa ko'ãvagui, ndéverõ guarã pe karia'y rapicha, ohape joko vaekue umi mba'e vai apoha? 37Upe Moisés rembiapoukapy mbo'eha he'i:

--Pe oiporiahurereko vaekue chupe.

Jesús katu he'i chupe:

--Néi, tereho ha ejapo ndave upéicha.

Jesús, Marta ha María rógape

38Jesús oipykúi hape ha oguahẽ peteĩ tava'ipe, ha upépe omoguahẽ chupe hógape peteĩ kuña hérava Marta. 39Ha'e oguereko peteĩ ikypy'y hérava María,#Jn 11.1. oguapýva Jesús ypýpe ohendu haguã umi he'íva. 40Marta katu, oikóva hína heta hembiapo reheve, oñemboja Jesús rehe ha he'i chupe:

--Che Jára, na nde py'apýipa che kypy'y che rejaha cheño ko tembiapo hetaite reheve? Ere chupe ta che pytyvõ.

41Jesús katu he'i chupe:

--Marta, Marta, rejepy'apy hetaiterei mba'ére, 42ha peteĩ mba'énte tekotevẽ. María ojapyhy pe iporãvéva, ha avave ndoipe'a mo'ãi chugui.

Currently Selected:

San Lucas 10: GDC2006

Highlight

Copy