Numeros 11
11
O Del bichalel chiriklien
1Iek llive e israelitura thode te den orbe bi malade e Devleke pala o bilachipe kai nakhena. Kana o Del asunda len, jolailo but ta bichalda lenge iek iag kai phabarda truial o pero.#Ek 18.13-27. 2O foro urkisarda ta mangla te pomozin len o Moises, a o Moises mangla katar o Del te pomozin len. Ondaka e iag muli. 3Goleke goia rig ikharde la Tabera, soke kote e iag e Devleki phabili pe lende.
4Maskar e israelitura sea llene katar aver phuvia ta bokhaile but kai nasti terpina e bok, ta e israelita thode pale te roven ta phenena: ¡Gia sukar avela vareko te del amen te ja mas!#Ek 16.2-31. 5¡Da amen golli sar jaia o macho ando Ejipto! ¡Ta e pepinura, e jurbuze, e siria, ta e purumba! 6A akana mera bukhatar, ta ni dikhol ni iek ezgoda samo gava mana.
7O mana dikhola sargo e simicha katar o silantro, dikhola galbeno, sargo e resina, 8Ta kana jalape saia sargo o marrno cherdo katar o lliu e zeitinoia nevo. E llene llana te chiden le ta mapalal drobonale ando isav ta chiravena le o cherena le sargo marrno. 9Ta orachaia kana pechala peke po pero i o mana perela po pero.
10O Moises asunda kai e isralitura ta lenge familie rovena angla pe chare. Ta o Del but jolailo. Ta i o Moises jolailo, 11ta phenda e devleke:
¿Soke cherdan gava bilachipe mange? ¿So si chuke manchar, soke thodan pe mande sa gava pharipe gale foroko?
12¿A so me sem lengo o dad o lengi dei te sai mange mandar te inllarav len ande me va, sargo minone kai pien kolin, llik kai e phuv kai phendan lenge puranenge kai ka delen? 13¿Katar ka ikanav mas te sai dav te jal sa gale sueto? Von aven mande roimaia te phenen mange: De amen mas te ja. 14Me korkorre nasti terpiu gale foro, soke si mange iek pharipe but baro. 15A te cherea gia manchar mai sukar mundar man, te si kai de istina kai voli man. Na muk man te dikhav mi zatrania.
16A o Del phenda leke:
Chide mange eftavardes phuren katar o Israel, katar gola llene kai tu llane kai si phure ta kai si birovora katar po foro, ta an len kai e chara kai chidiniaon ta kote te aduricharen tuia.
17Ta me ka fuliav ta kote ta ka dav orba tuia ta ka lav katar o duo kai si ande tu ta ka dav len te sai pomozin tut te inllare gava pharipe gale foroko. Gia tu ni ka ave korkorre. 18Mapalal phen e foroke te chistol pe thiarinake ta ka jan mas. Soke asundem len sar roven te phenen: ¡Daboida vareko te del amen te ja mas! ¡Mai sukar sama ando Ejipto! goleke me o Del, ka dav tumen mas te jan, 19ta ni ka jan samo iek llive o dui o panch o des o bis. Iok 20Ka jan mas sa o chon, lligo ni ka likel katar lenge nakha ta lligo ni ka gadonpe, soke mukle man o Del, kai sem maskar lende ta rovde anglama ta phende: ¿soke likistam katar o Ejipto?
21Ondaka o Moises phenda:
O foro kai llal manchar si sov stotine murusa kai phiren. ¿A tu phene kai ka de amen te ja mas sa o chon?
22¿Kai si pegachin bakre ta guruva kai san mundardon ta te resen saurrenge? I te daia len sa e mache e morake, ni resela len.
23A o Del phenda leke:
¿Tu misli kai ia minoni si mi zor? akana ka dikhe o ka cherdol o iok so phendem.
Eftavardes phure den orba sargo poraukura
24O Moises likisto ta phenda e foroke so o Del phenda leke, ta chidia eftavardes phuren israelita ta thoda len truial katar e chara kai chidiniaon. 25Ondaka o Del fulisto ando oblako ta dia orba e Moisesea, ta lia katar o duo kai saia ando Moises ta thoda le ande eftavardes phure. Ta samo fulisto o duo upral pe lende, thode te den orba sargo poraukura ta ni achena.
26A ando pero achilea dui llene, kai ikhardona iek Eldad ta o gua Medad, von sea katar e eftavardes llene ezbirime, a von ni llelea kai a chara kai chidiniaon von achilea ando pero. A i pelende fulisto o duo, ta thode te den orba sargo poraukura ando pero. 27Ondaka iek chaurro llelo prastindo te phenenl e Moiseseke:
¡O Eldad ta o Medad den orba sargo poraukura ando pero!
28Ondaka o Josue, chaurro katar o Nun, kai de terno pomozila e Moisese, phenda:
¡Moises mo gazda, achav len!
29A o Moises phenda leke:
¿San joliariko cheres ma? ¡Pe gachin voliva me sa o foro e Devleko te aven poraukura!
30Ondaka o Moises ta e phure katar o Israel irisaile kai o pero.
O Del bichalel kodornise
31O Del cherda te phurdel iek balav katar e mora kai anda but kodornise, kai peletar ando pero ta i truial letar, sea pegachin kai sai phirea sorro llive ta sai dikhea len sar ucharena e phuv iek metro upral.#Ek 16.12-13. 32Sa gua llive ta sa goia riat ta i ogua llive kai avilo e llene chidena kodornise. O lleno kai mai cherricha chidia, chidia des unpe kodornise, kai thode len te sukon truial o pero. 33A kana e israelita thodea pe te jan o mas o Del jolailo lenchar ta dukhada len, cherda bute llenen te meren. 34Goleke gua than thode leko anav Kibrot Jataava, soke kote prajosarde e llenen kai samo mislinape te jan.
35Ta katar o Kibrot Jataava laglo o foro ta avile ando Aserot, ta kote achile.
Currently Selected:
Numeros 11: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
