Lukas 4

O llavolo zumavel e Jesuse

Mt 4.1-11; Mk 1.12-13

1O Jesus pherdo katar o Santo Duo, irisailo katar o Jordan, ta o Santo Duo inllarda le po pusto. 2Kote achilo saranda llive, ta o llavolo zumavela le. Ni jala niso gola llivesa, ta bokhailo. 3Ondaka o llavolo phenda leke:

Te san chachimaia o Chavo e Devleko, phen gale barreke te cherdol marrno.

4O Jesus phenda leke:#Dt 8.3.

Ando Pisipe phenel:

Na samo e marnetar ka zivil o manus.

5Mapalal o llavolo inllarda le pe iek baro burdo, ta sikada leke sa e phuvia e suetoke. 6Ta phenda leke:

Me ka dav tut sa gala phuvia ta sa lengo barvalipe. Soke me liem sa gala ezgode ta daulen kake me mangava te daulen. 7Te dea changa ta te blagosia man, sa ka avel chiro.

8A o Jesus phenda leke:#Dt 6.13.

Llatar mandar, Satanas, soke ando Pisipe phenel:

Blagosisar e Gazda cho Del, ta radisar samo leke.

9Mapalal o llavolo inllarda le ando Jerusalem, thoda le upral po than mai vazdino katar o cher e Devleko ta phenda leke:

Te san chachimaia o Chavo e Devleko, chude tut tele, 10soke ando Pisipe phenel gia:#Sal 91.11.

O Del ka bichalel pe suechonen

te arakhen tut.

11Ka vazden tut pe vastenchar,#Sal 91.12.

te na eskombal cho porrno pe ni iek barr.

12A o Jesus phenda leke:#Dt 6.16.

Ta i ando Pisipe phenel gia:

Na thov ando zumadipe e Gazda kai si cho Del.

13Ta sar o llavolo nasti thoda e Jesuse ios ando zumadipe, llelotar letar nesavo vreme.

E Jesuseko rado llal angle ande Galilea

Mt 4.12-17; Mk 1.14-15

14O Jesus irisailo ande Galilea pherdo katar e zor e Santone Duoki, ta dena leki orba ande sa e forura kai sea truial. 15Sikavela ande khanllira e judionenge katar suako rig ta sa blagosina le.

O Jesus ando Nazaret

Mt 13.53-58; Mk 6.1-6

16Ondaka o Jesus llelo ando Nazaret, kote kai barilo. Ando llive o sabado dia ando cher e Devleko, sar saia sikado, ta thodape pe porrne te chitil e Devleke alava. 17Die lete te chitil o lil katar o profeta o Isaias, ta kana putardale, malada kote kai phenela gia:

18O Duo e Devleko si upral pe mande,

soke blagosisarda man te dav lache viaste e chorren.

Bichalda man te sastarav e llenen kai si lenge zalba ando lio,

te phenav e phanglenge kai ka liken katar o phandipe

ta te cherav te dikhen e korre,

te ikanav e llenen katar o bilachipe kai nakhen,

19te phenav o lacho vreme e Devleko kai avel.#Is 61.1-2.

20Ondaka o Jesus phangla e Devleke alava, dialen kai o lleno kai pomozil ando cher e Devleko ta beslo. Sar sa e llene dikhena pe lete, 21vou dia lenge orba ta phenda:

Isto allive cherdilo so si pisime angla tumende.

22Saurre dena lache orbe e Jesuseke, ta saia lenge chudo katar e sukar alava kai phenela lenge. Ta puchena pe:

¿Inai gava o chavo e Joseeko?

23O Jesus phenda lenge:

Akana tumen ka phenen mange so phenen but llene:

Doktori, sastar isto tu tut. Ta ka phenen mange:

So asundam kai cherdan ando Kafarnaum cher le i kate isto ande chi phuv.

24Ondaka pale dia orba ta phenda lenge:#Jn 4.44.

Chachimaia phenav tumenge, kai ni iekhe profetaia inai lea pachivale isto ande leki phuv. 25Chachimaia phenav tumenge kai sea but phivlia ando foro o Israel kana o profeta o Elias saia llundo, kana ni dia peke trin burs ta dopas ta saia but bok ande sa o foro,#1 R 17.1. 26a o Elias ni saia bichaldo kai ni iek katar gola phivle kai zivina ando Israel, a pomozisarda iekha kai zivila ande Sarepta pasa o foro o Sidon.#1 R 17.8-16. 27Ta i ando Israel sea but nasuale katar e lepra kana o profeta o Elias saia llundo, a ni iek lendar ni avila sastardo, samo o Naaman, kai saia katar e Siria.#2 R 5.1-14.

28Kana asunde gala ezgode sa e llene kai sea ando cher e Devleko jolaile but. 29Ustile ta chudie e Jesuse avri katar o foro, ta inllarde le llik upre po burdo kote kai saia o foro te chuden le tele. 30A o Jesus nakhlo maskar lende ta llelotar.

Iek manus kai ande le saia o llavolo

Mk 1.21-28

31Ondaka o Jesus llelo ando Kafarnaum, iek foro katar e Galilea, ta kote thodape te sikavel e llenen ando llive o sabado. 32Ta e llene chudinape sar sikavela len, soke dela lenge orba gazdarimaia.#Mt 7.28-29.

33Ande khanlliri e judionengi saia iek manus kai saia ande le iek duo bilacho kai urkisarda ta phenda:

34¡Muk amen! ¿Soke ami tut amenchar, Jesus katar o Nazaret? ¿Ave te zatri amen? Me pinllarav tut, ta llanav kai san o Santo e Devleko.

35O Jesus dia po duo bilacho ta phenda leke:

¡Achi, ta muk gale manuse!

Ondaka o duo bilacho chudia e manuse pe phuv angla lende, ta likisto letar ta ni cherda leke nisavo bilachipe. 36Sa daraile, ta phenena iek avereke:

¿Save alava si gala? Gava manus del orba gazdarimaia ta zoriaia e bilache duonenge, ¡ta e duura llantar!

37Ta lleli e Jesuseki viasta pe suako rig katar gola forura.

O Jesus sastarel sasuia katar o Simon Pedro

Mk 1.21-28

38O Jesus likisto katar e khanlliri e judionengi ta dia ando cher e Simonoko. Ta e sasui e Simonoki phabola but nasualimatar ta mangena letar te sastarel la. 39O Jesus bangilo late ta phenda e nasualimake te llaltar, ta o nasualipe liape latar. Isto kote voi ustili ta thoda te radil leke.

O Jesus sastarel bute nasualen

Mt 8.16-17; Mk 1.32-34

40Kana peli e riat, sa e llene kai sea len nasuale katar suako nasualipe, inllarde len kai o Jesus, ta vou thoda pe va pe suako iek lendar, ta gia sastarda len. 41Katar but nasuale likiste duura bilache, kai urkina ta phenena:

¡Tu san o Chavo e Devleko!

A o Jesus dia pe duura bilache ta ni mukela len te phenen niso, soke llanena kai vou saia o Kristo.

O Jesus del orba ande Galilea

Mk 1.35-39

42Thiarinako, o Jesus likisto avri katar o foro, pe iek rig korkorre. A e llene rodie le, ta avile kote kai saia vou. Mangena te achaven le, te na llaltar, 43a o Jesus phenda lenge:

Morabi te inllarav e viasta katar e charoina Devleki i ande ogola forura, soke goleke sem bichaldo. 44Ta gia llala o Jesus ta phenela e lachi viasta ande khanllira e judionenge katar e phuv katar e Galilea.

Currently Selected:

Lukas 4: BACHRO

Highlight

Copy