Lukas 20

O gazdaripe e Jesuseko

Mt 21.23-27; Mk 11.27-33

1Iek llive, kana o Jesus saia ando cher e Devleko ta sikavela e llenen ta phenela e lachi viasta, avile e gazda e poponenge ta e kovacha e zakonoke, e phurenchar, 2ta phende leke:

¿Save gazdarimaia chere gava? ¿Ko dia tut gua gazdaripe?

3O Jesus phenda lenge:

I me ka puchau tumen iek ezgoda. Phenen mange:

4¿Ko bichalda e Juane te kristil, o Del o e manusa?

5Von diepe orba maskar pete ta phenena:

Te phendam kai bichalda le o Del, vou ka phenel:

¿Soke ni pachaien le? 6A nasti phena kai bichalde le e manusa, soke sai mundaren amen e barrenchar soke sa e llene pachan kai o Juan saia iek profeta. 7Goleke von phende kai ni llanena ko bichalda e Juane te kristil. 8Ondaka o Jesus phenda lenge:

Ni me ni ka phenav tumenge save gazdarimaia cherav gava.

E paramichi katar e llene bilache kai radin e phuv

Mt 21.33-44; Mk 12.1-11

9Mapalal o Jesus dia orba e llenenge, ta phenda gaia paramichi:#Is 5.1.

Iek manus thoda te bariol e drak ande pi umal, chinadala iekhe llenenge kai radin e phuv ta llelotar but dur. 10Kana avilo o vreme, bichalda iekhe sluga te mangel katar e llene kai radina e phuv o chari kai perela le katar e drak, a von marde le ta bichalde le chuche vastengo. 11Ondaka o gazda bichalda avere sluga. A i gole kusle le, chalade le ta bichalde le chuche vastengo. 12Bichalda avere, a e llene kai radin e phuv i gole ranisarde le ta chudie le avri.

13O gazda e phuviako phenda:

¿So ka cherav? Ka bichalav me chave kai voliv. Le ka kanden. 14A kana e llene kai radin e phuv dikhle le, phende iek avereke: Gava si o lleno kai ka achel leke sa gaia phuv, mundara le ta gia e phuv ka achel amenge. 15Ta ikande le katar e phuv e drakhengi ta mundarde le.

¿A tumen so mislin kai ka cherel o gazda katar e phuv e drakhengi? 16Ka llal ta ka mundarel gole llenen kai radin e phuv.

Kana asunde gua, phende:

¡Gua ni ka avelpe nikada!

17A o Jesus dikhla pe lende ta phenda:#Sal 118.22.

¿A soke ando Pisipe phenel gia?:

O barr kai ni thode leke sama e llene kai vazden chera cherdilo o barr mai preche. Gava cherda o Del, ta amen chudi amen.

18Vareko te perel pe gua barr, ka cherdol sa ande kotora. A o barr te perel upral pe varesavo lleno, ka cherel le prajo.

19E gazda e poponenge ta e kovacha e zakonoke mangena te phanden e Jesuse isto kote, soke acharde kai gole paramichaia dela orba lendar. A darana e llenendar.

Puchen e Jesuse katar e love kai denpe e foro

Mt 22.15-22; Mk 12.13-17

20Bichalde iekhe llenen kai cherenape lache manusa, samo te cheren e Jesuse te kojadol ande pe alava ta gia te avel len varesavi dos te sai thoven le ando va e lleneko kai gazdaril e rromanonen. 21Gala llene puchle le:

Kovachi, llana kai so phene ta so sikave si o chachipe, ta kai ni rode te ave lenge drago. Tu sikave chachimaia o drom e Devleko. 22¿Si sukar te da amare love kai o lleno kai gazdaril pe rromanura, o iok?

23A o Jesus, sar pinllerela lengo kojaipe, phenda lenge:

24Sikaven mange iek tolari. ¿Kako si o mui ta kako anav si pisime po tolari?

Von phende:

E Sesareko.

25O Jesus phenda lenge:

Den e Sesare so si e Sesareko, ta den e Devle so si e Devleko.

26Ta ande sa so vou phenda angla e llene ni malade ni iek dos te sai phanden le, ta chudisaile letar ta ni phende niso.

Puchen sar ka avel kana e manusa ka usten katar o meripe

Mt 22.23-33; Mk 12.18-27

27Mapalal nesave saduseura llele te dikhen e Jesuse. E saduseura ni pachan kai e manusa ka usten katar o meripe, goleke phende leke gia:#Ech 23.8.

28Kovachi, o Moises mukla amenge pisime kai kana iek murus zinime merel ta ni avile le minone pe rromiaia, o phlal gole lleneko kai mulo morabi te zinilpe e phivliaia te del minonen pe phlale kai mulo.#Dt 25.5. 29Ondaka e saduseura phende gia e Jesuseke:

Sea efta phlal, o purvo lendar zinisailo, ta mulo ta ni mukla porodo. 30O duito zinisailo e phivliaia ta i vov mulo ta ni avila le chaurre. 31Ta i o trito zinisaile laia, ta i ogola zinisaile laia, a e li efta mule ta ni avila le porodo. 32Mapalal muli i e rromi. 33Kana ka usten katar o meripe, ¿save phlaleki rromi ka avel voi, kana e efta sea zinime laia?

34O Jesus phenda lenge:

Ande gava zivoto, e murusa ta e diskinia zininpe, 35a gola kai o Del ka chinavel lenge te usten katar o meripe, ta kana ka avel gua vreme avena murusa o diskinie, ni ka zininpe ios 36ta ni ka meren. Soke von ka aven sargo e suechura, ta ka aven chave e Devleke soke ustile katar o meripe. 37Isto o Moises, kana pisisarda katar e karrne kai phabona, phenel amenge kai e mule ka usten katar o meripe. Kote phenel kai o Gazda si o Del katar o Abraam, katar o Isaak ta i katar o Jakob.#Ek 3.6. 38¡Ta vou inai Del e mulengo, vou si Del e llundengo, soke e Devleke saurre si llunde!

39Ondaka nesave kovacha e zakonoke phende:

Sukar phendan, kovachi.

40Ta ni tromana te puchen le niso ios.

¿Katar savi vicha si o Mesias?

Mt 22.41-46; Mk 12.35-37

41O Jesus puchla len:

¿Soke phenen kai o Mesias avel katar e vicha e Davideki? 42A isto o David, ande Salmura, phenel:

O Gazda phenda me Gazdake:

Bes pe mi chachi,

43lligo ni ka thovav che dusmanonen telal tala che porrne.#Sal 110.1.

44¿Sar ka avel o Mesias katar e vicha e Davideki kana isto o David ikharel le Gazda?

O Jesus phukavel e kovachen katar o zakono

Mt 23.1-36; Mk 12.38-40; Lk 11.37-54

45Sa e llene asunena, ta o Jesus phenda pe disipulonenge: 46Arakhen tumen katar e kovacha e zakonoke, soke drago lenge te thoven pe pete e bare fistanura, ta mangen te den lenchar orba liubaimaia kana llan ando foro. Roden e estoliche mai barikane ande khanllira e judionenge ta e mai lache thana kana si varesavo jape, 47ta len katar e phivlia so si len, ta te na llanel le niko molinpe but. Von ka len mai bari duk.

Currently Selected:

Lukas 20: BACHRO

Highlight

Copy