Levitiko 20

E duk kana ni kanden

1O Del dia orba e Moisesea ta phenda leke:

2Varesavo israelita o varesavo lleno kai avel katar aver phuv ta kai zivil maskar tumende, te dela varesave katar pe chaurre ofrenda e devleke kai ikhardol Molok, morabi te avel mundardo barrenchar e llenendar katar o foro.

3Ta me ka joliaivav pe gua lleno ta ka chinav le katar po foro, soke dia katar pe chaurre e devle kai ikhardol Molok, ta pokalisarda mo santuario ta mukla ando lallao mo santo anav. 4A e llene katar e phuv te na thovena sama katar gua lleno kai dia pe chaurren e devleke molok, ta te na chinena gole lleneke te merel, 5ondaka me ka joliaivav gole llenea ta leke familiaia, ta ka ikanav le maskar po foro ta sa e llenenchar kai cherde sargo vou kai kurvisaile e Molokoia. 6A vareko te llala kai e llene kai phenen kai den orba e llenenchar kai mule, ta kai llene kai cheren chirimate, ta te cherena o bilachipe soke llan pala lende, me ka joliaivav gole llenea ta ka ikanav le maskar po foro.

7Goleke morabi te aven chinade mange, ta te aven sante, soke me sem o Del tumaro Gazda. 8Kanden me zakonura, ta cheren len. Me sem o Del, kai chinaden tumen mange.

9A vareko te dela armaia pe dade o pe da, ka chinen gole lleneke te merel soke dia armaia pe dade ta pe da ta isto vou ka avel dosalo isto katar piro meripe.#Ek 21.17; Mt 15.4; Mk 7.10.

10A vareko te kurvilape e diskiniaia kai si avereki, ka chindol pe leke te merel leke kai kurvisailo ta i lake kai kurvisaili.#Ek 20.14; Lv 18.20; Dt 5.18; 22.22-24; Jn 8.5.

11Vareko te amilape pe dadeke diskiniaia, del ando lallao isto pe dade. Goleke ka chindol gole lleneke ta gole diskiniake te meren ta isto von ka aven dosale katar po meripe.#Lv 18.8; Dt 22.30; 27.20.

12A vareko te amilape pe boriaia, e duienge ka chinen te meren ta ka aven isto von dosale katar po meripe, soke gua si iek bilachipe but baro.#Lv 18.15.

13A vareko te amilape iekhe murusea sargo iekhe diskiniaia, ka chindol pe lenge te meren e dui ta isto von ka aven dosale katar po meripe, soke cherde iek baro bilachipe.#Lv 18.12.

14A vareko te lela pala pe iekhe rromia ta i lake da, cherel iek bilachipe but baro goleke vou ta i von morabi te aven phabarde llunde, gia ni ka avel gava baro bilachipe maskar tumende.#Lv 18.17; Dt 27.23.

15A vareko te amilape iekhe zivirinaia, ka childol pe leke te merel ta i ka mundardol e zivirinia.

16A iek diskinia te amilape iekhe ziviriniaia, ka chinen lake te merel ta i e zivirinia ka mudardol. E dui ka avem dosale katar po meripe.#Ek 22.19; Lv 18.23; Dt 27.21.

17A vareko te lela rromi pe phiorra i te avela dadedar phiorri o datar, ta amilape laia angla e akha katar sa o foro ka aven mumdarde, soke amisailo pe phiorraia ka inllarel po bilachipe.#Lv 18.9; Dt 27.22.

18A vareko te sovela iekhe diskiniaia kai avila pe late lako chon ta amilape laia e dui ka aven tradine katare phuv.#Lv 18.19.

19Te na ami tut che dake phiorraia ni che dadekhie phiorraia, soke gua si te ami tut iekhe familiaia kai si but pase ta e dui ka ianllaren po bilachipe.

20A vareko te amilape pe kakoke diskiniaia, thovel ando lallao isto pe kako, e dui ka ianllaren po bilachipe: ka meren bi chaurrengo.#Lv 18.12-14.

21A vareko te lela e rromia pe phlaleki, thovel ando lallao isto pe phlale. Gava si iel bilachipe baro ta e dui ka achen bi chaurrengo.#Lv 18.16.

22Kanden me zakonura ta me alava, kanden len sa gia ni ka chudel tumen petar e phuv kai inllarav tumen te sai zivin ande lete. 23Ta na sikon te cheren e ezgode katar e llene kai ka chudav angla tumende, von cherde sa gala ezgode ta goleke nasti terpisardem len. 24Me dav tumen po alav kai tumari ka avel lengi phuv, isto me ka dav la tumenge, kai o thud ta o aullin llan sargo o pai.

Me sem o Del tumaro Gazda, kai thodem tumen pe iek rig katar e forura. 25Goleke tumen ka cheren te dikhol savi zivirinia si chisti ta savi si pokalime, ta maskar e chiriklia chiste ta e chiriklia pokalime na achen pokalime cheres zivirinie, chiriklia ta ni golenchar kai terrinpe kai phenda kai si zivirinie pokalime. 26Tumen morabi te aven sante soke me sem santo, ta thoden tumen pe iek rig katar e forura te sai aven murne.

27O murus o e diskinia kai den orba e dounenchar e mulenge o kai denpe te cheren chirimate ka aven mundarde e barrenchar ta von ka aven dosale katar po meripe.

Currently Selected:

Levitiko 20: BACHRO

Highlight

Copy