Juan 9
9
O Jesus sastarel iekhe korre
1Kana o Jesus avilo, dikhla iekhe llene kai saia korro sar kai biandilo. 2E disipulura puchle le:
Kovachi, ¿soke gava lleno biandilo korro? ¿Ko cherda o bilachipe, vou o leke dada?
3O Jesus phenda lenge:
Ni cherda ni vou ni leke dada o bilachipe. Gaia ezgoda avilape gia te sai dikhol e Devleki buchi ande lete. 4So si ollivesea, morabi te cherav e buchi goleki kai bichalda man. E riat avel kana niko nasti radil. 5So avava ando sueto, o villelo e suetoko sem.#Mt 5.14; Jn 8.12.
6Kana phenda gava, chungardia pe phuv ta cherda glibo pe chungarea ta thoda le pe korreke akha. 7Ta phenda leke:
Lla jalau tut ando bunari e Siloeko, kai gua si o Bichaldo.
O korro llelo ta jaladape, ta kana irisailo dikhela. 8Ondaka gola kai zivina pasa le ta i gola kai omanglal dikhlea kai mangela esmola puchenape:
¿Inai gava kai besela te mangel esmola?
9Nesave phenena:
Vou si.
Aver phenena:
Iok, sargo vou si.
A vou phenela:
Ea, me sem.
10Ondaka puchle le:
¿Sar akana sai dikhe?
11Vou phenda lenge:
Gua lleno kai ikhardol Jesus cherda glibo ta thoda le pe me akha, ta phenda mange: ‘lla kai o bunari e Siloeko ta jalau tut’ Me llelem, ta kana jaladem man dikhlem.
12Ondaka puchle le:
¿Kai talo vou?
Vou phenda lenge:
Ni llanav.
E fariseura puchen e korre
13Inllarde angla e fariseura e llene kai saia korro. 14Ando sabado saia kana o Jesus cherda glibo ta sastardaia leke akha, 15A von puchle le: ¿Sar akana dikhe? A vou phenda lenge:
Thoda pe me akha glibo, jaladem man, ta akana dikhav.
16Nesave fariseura phende:
Inai e Devletar gua kai cherda gava soke ni kandel o sabado.
Aver phenena:
¿Sar sai cherel gala bare ezgode Devlikane te si bilacho?
Ta von janape maskar pete, 17ta pale puchle gole kai saia korro:
¿So phene tu katar gua lleno kai putarda che akha?
Vou phenda:
Me phenav kai vou si profeta.
18A e judiura ni pachana kai vou saia korro ta kai leke akha sastilea, ondaka ikharde leke daden e korreke 19ta puchle len:
¿Vou si tumaro chaurro? ¿Tumen phenen kai biandilo korro? ¿Sar akana dikhel?
20Leki dei ta leko dad phende:
Amen llana kai vou si amaro chaurro ta i kai biandilo korro; 21A sar dikhel akana, ni llana, ta ko putarda leke akha ni gua ni llana. Puchen isto le, vou ia si baro, isto vou sai phenel tumenge.
22Leki dei ta leko dad phende gava, soke darana katar e judiura soke phendea kai kogo phenela kai o Jesus si o Mesias, ka traden le katar e khanlliri e judionengi. 23Goleke phendea leko dad ta leki dei: Puchen isto le, vou si baro.
24E judiura pale ikharde gole llene kai saia korro, ta phende leke:
Phen amenge o chachipe ando anav e Devleko. Amen llana kai gua lleno si bilacho.
25Vou phenda:
Te si vou bilacho, me ni llanav. Samo llanav kai sema korro ta akana dikhav.
26Pale puchle le:
¿So cherda chuke? ¿Sar sastarda che akha?
27Vou phenda lenge:
Me phendem tumenge sar, ta ni kamlen te asunen. ¿Soke mangen te phenaule pale? ¿A so? ¿I tumen mangen te aven leke disipulura?
28Ondaka jolaile pe lete, ta phende leke:
Tu san leko disipulo, a amen sam e Moiseseke disipulura. 29Amen llana kai o Del dia orba e Moisesea, a gua lleno ni llana katar si.
30O lleno kai saia korro phenda lenge:
¡Savo chudo si gava! Tumen ni llanen katar si vou, a vou sastarda me akha. 31Saurre llana kai o Del ni asunel e bilachen, o Del samo asunel golen kai blagosin le ta kanden le.#Pr 15.29. 32Ta nikada ni asundilo kai vareko sastarda e akha iekhe lleneke kai biandilo korro. 33Gava lleno te na aviloa e Devletar, nasti cherdaia niso.
34Ondaka phende leke:
Tu biandilan ando bilachipe, ¿a tu ka sikave amen?
Ta tradie le katar e khanlliri e judionengi.
E korre ando duo
35O Jesus asunda kai tradie katar e khanlliri e judionengi gole llene kai sastardaia leke akha, ta kana malada le, puchla le:
¿Pacha tu ando Chavo e Manuseko?
36Vou phenda leke:
¿Phen mange ko si vou, te sai pachau ande lete?
37O Jesus phenda leke:
Tu dikhlan le: Me sem kai dav tuia orba.
38Ondaka gua lleno dia changa angla o Jesus, ta phenda:
Pachau, Gazda ta blagosisarda le.
39Ondaka o Jesus phenda:
Me avilem ande gava sueto te cherav kris, te sai dikhen e korre, a gola kai dikhen, te sai korraon.
40Nesave fariseura kai sea lea, kana asunde gaia orba puchle le:
¿So i amen sam korre?
41O Jesus phenda lenge:
Te avilena korre, ni avilaia tumen bilachipe. A akana soke phenen kai dikhen, tumen sen dosale.
Currently Selected:
Juan 9: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
