Jenesis 44

O taso e Joseeko

1Mapalal o Jose phenda pe slugake kai arakhela leko cher:

Pher lliu e vreche gale llenenge so mai but sai inllarena, ta thov lenge love po mui katar suakoneki vrecha. 2Ta thov mo taso, o taso rupuno po mui katar e vrecha e mai terneki e lovenchar kai pochinda o lliu. Ondaka o sluga kai arakhela leko cher cherda gia sar phenda leke o Jose.

3Kana llivosaola, o Jose mukla pe phlalen te llantar pe magarchenchar. 4Ni likistea but dur katar o foro, kana o Jose phenda pe slugake kai arakhela leko cher:

Lla pala gola llene, ta phen lenge gia kana ka malave len:

¿Soke pochinden mange o lachipe e bilachimaia? ¿Soke chorden o taso rupuno 5kai mo gazda piel letar ta i dikhel letar so si te avelpe? ¡Tumen cherden baro bilachipe!

6Kana o sluga kai arakhel o cher malada len, phenda lenge isto gola alava. 7A von phende leke:

¿Soke phenel amaro gazda gola alava? ¡Amen nikada ni maka chera gola ezgode! 8Te irisailam katar o Kanaan, irisailam te iri e love kai maladam ando mui katar amare vreche. ¿A pala so maka chora rup ta sunakai katar o cher che gazdako? 9¡Te merel vareko katar gala sluge, te malavena lete o taso, ta amen ka ava che sluge!

10Ondaka o lleno kai arakhela o cher phenda:

Ka cherdol gia sar phenen tumen, o lleno kai malavaia lete o taso ka avel mo sluga, a ogola sai ka llantar bi dosako.

11Ondaka suako lleno fuliarda oma pi vrecha llik kai e phuv ta putarde la. 12A o lleno kai arakhela o cher rodia ande suako vrecha, katar o purano llik kai o terno, ta malada o taso ande vrecha e Benjamineki. 13Ondaka von chinde pe patave te dikhol lengi duk. Mapalal suako iek pale chidie pe pe magarchura ta irisaile ando foro. 14Kana o Juda ta leke phlal avile kai o cher e Joseeko, o Jose saia ande po cher. Ondaka von die tenemava lligo ni dodisarde pe chikatea pe phuv. 15A o Jose phenda lenge:

¿Soke cherden gava? ¿Ni llanen kai iek manus sargo me llanav te dikhav so ka avelpe mai angle?

16Ondaka o Juda phenda leke:

¿So ka phena chuke akana? ¿Sar ka sikava kai amen ni sam dosale? O Del malada amen ando bilachipe. Akana amen sam che sluge e llenea kai malade lete o taso.

17O Jose phenda:

Me nikada ni ka cherav gaia ezgoda. Samo gua kai saia lete o taso ka avel mo sluga. Tumen llantar esmiro kai tumaro dad.

O Juda molilpe pala o Benjamin

18Ondaka o Juda avilo pasa o Jose ta phenda leke:

Me molivman chuke gazda, Muk te phenav chuke vareso po chorial. Cher mange gava sebapi, te na joliao manchar, soke tu san sargo o Faraon. 19Gazda, tu puchlan amen dal saia amen dad o aver phlal, 20ta amen phendam chuke kai saia amen iek dad phuro ta iek phlal but terno kai biandilo kana amaro dad ia saia phuro. Ta i phendam chuke kai amaro dad but volil le, soke gua chaurro saia le iek phlal kai mulo ta samo vou achilo katar e chaurre leke dake. 21Ondaka tu phendan amenge te ana le soke mangea te pinllare le. 22Ta amen phendam chuke kai o chaurro nasti mukela pe dade, soke te mukela le, leko dad ka merel. 23Ta tu phendan amenge kai te na avela amenchar, tu ni ka muke te dikha tut.

24Ta kana irisailam kai mo dad, phendam leke sa so tu phendan amenge. 25Ondaka amaro dad phenda amenge:

Irin tumen te chinen mai but lliu, 26a amen phendam leke:

Amen nasti lla, te na avela amenchar amaro phlal o mai terno, soke vou te na llala amenchar amen nasti ka lla te dikha gole manuse. 27Ta amaro dad phenda amenge: Tumen llanen kai mi rromi dia man dui chaurre, 28iek lendar llelotar mandar, ta sar kotar kai ni dikhav le. Me llanav kai iek zivirinia divi chinda le pe kotora. 29Akana te inllarena i gale chaurre mandar, ta te nakhela leke varesavo bilachipe, tumen ka aven e dosale gava phuro te merela zalbatar.

30Goleke o zivoto me dadeko si phanglo po zivoto e chaurreko, a te na avela o chaurro manchar kana ka iriu man, 31amaro dad te na dikhla le ka merel. Ondaka amen ka ava e dosale te merela zalbatar amaro dad ande po phuripe. 32Me phendem me dadeke kai me ka achav lacho pala o chaurro, ta i phendem leke: Te na andem le chuke pale, me ka avav angla tu o dosalo ostade. 33Goleke me molivman chuke: Muk me te achav sargo cho sluga, ando than e chaurreko, ta muk vou te llaltar pe phlalenchar. 34Soke ¿sar ka iriu man kai mo dad, kana o chaurro ni ka avel manchar? Me ni kamam te dikhav pe kabor duk te nakhel mo dad.

Currently Selected:

Jenesis 44: BACHRO

Highlight

Copy