Jenesis 43

Inllaren e Benjamine ando Ejipto

1Bari bok saia ande phuv, 2goleke kana o Jakob ta leke chaurre jale so achela len katar o lliu kai andea katar o Ejipto, o Jakob phenda lenge:

Llan pale ta chinen lliu amenge.

3A o Juda phenda leke:

Gua lleno phenda amenge silnomaia: Te na anena kate tumare phlale e mai terne, te na aven te dikhen man. 4A te bichalea amenchar amare phlale, amen ka lla ta ka china chuke lliu, 5a te na mukea le, amen ni ka lla. Soke gua lleno phenda amenge: Te na anena kate tumare phlale e mai terne, te na aven te dikhen man.

6Ondaka phenda o Israel:

¿Soke cherden mange pe kabor bilachipe? ¿Soke phenden gole lleneke kai saia tumen aver phlal?

7A von phende leke:

Soke vou puchela but cheres amende ta katar amari familia. Ta phenela: ¿Tumaro dad zivil? ¿Si tumen aver phlal? Ta amen phendam leke so vou puchela amen. ¿A sar amen maka llana kai vou ka phenel amenge:

Anen tumare phlale?

8O Juda phenda pe dadeke e Israeleke:

Te mangaia te zivi, muk te avel o chaurro ta me ka arakhav le, ta gia ka llatar isto akana. Gia ni ka mera amen, ni tu, ta ni amare chaurre. 9Me dav tut mo alav kai me ka arakhav le. Me achav lacho pala le te avila leke varesavo bilachipe. A te na iriva le chuke isto pe gava than, ka avav dosalo angla tu ostade. 10Te na achilama pe gachin kate ¡Llelama ta i avilama dui droma!

11Ondaka lengo dad o Israel phenda lenge:

Te trubula te cheren le gia, cheren le. Inllaren ande tumare vreche gole lleneke o mai lachipe katar e phuv, cherricha balsamo, aullin, meriso, mirra, akhora ta almendre. 12Ta inllaren dui droma mai but love, ta inllaren ande tumare va e love kai maladen ande tumare vreche, sai avelpe kai von kojadile. 13Llan ta len tumare phlale, ta llan pale te dikhen gole llene. 14Ta o Del kai si le sa e zor te avel leke zao tumendar angla gua lleno, ta te mukliarel tumare phlale ta i e Benjamine. A me te si te achav bi chaurrengo, ¡ka achav bi chaurrengo!

15Ondaka inllarde so saia te den, ta inllarde dui droma mai but love, ta e Bejamine. Ta lleletar ando Ejipto, ta avile angla o Jose. 16Kana o Jose dikhla kai o Bejamin aviloa lenchar, phenda e lleneke kai arakhela leko cher:

Inllar gale llenen ande mo cher, ta mundar iekhe guruve ta lachar iek jape, soke von ka jan manchar ando dopas e lliveseko.

17Ta o lleno kai arakhela leko cher cherda gia sar o Jose phendaia leke te cherel, ta isto vou inllarda len kai o cher e Joseeko. 18Ondaka von daraile kana inllarde len kai o cher e Joseeko, ta phenena: Pala e love kai irisarde amenge e purvo drom si kai akana ande amen kate, te sai phanden amen ta te cheren amen te radi lenge sargo sluge, amen ta i amare zivirinie.

19Goleke kana avile kai o udar katar o cher, avile pasa o lleno kai arakhela o cher te den orba lea, 20ta phende leke:

¡Ioi gazda! Ogoia drom kana avilam, de istina, avilam te china lliu. 21Ta kana avilam kote kai saia te nakha e riat, putardam amare vreche, ta po mui katar e vreche, sea suakoneke love, llik kai iek tolari. Ta akana andam e love te iri len, 22ta andam ios love te sai china lliu. A amen ni llana ko thodaia amare love ande amare vreche.

23O lleno kai arakhela o cher phenda lenge:

Achen esmiro ta na daran soke tumaro Del ta o Del tumare dadeko si kai thoda gala love ande tumare vreche, soke me sema kai liema tumare love kana pochinden. Ta ikanda e Simeono, ta anda le lende.

24Mapalal inllarda saurren ando cher e Joseeko, ta dia len pai te jalaven pe porrne, ta dia te jan lenge magarchen. 25Ta von lacharde so andea te den ta aduricharena te avel o Jose ando dopas e lliveseko, soke asundea kai kote saia te jan.

26Kana o Jose avilo kai o cher, von die le so andea, ta die tenemava lligo ni dodisarde pe chikatea pe phuv. 27O Jose puchla len sar sea, ta phenda lenge:

¿Sar si tumaro dad, o phuro goletar kai diena mange orba? ¿Llundo si?

28Von die tenemava ta phende leke:

Amaro dad cho sluga, si llundo.

29O Jose dikhla truial, ta dikhla e Benjamine leko phlal datar ta i dadetar, ta phenda:

¿Si gava tumaro phlal o mai terno, kai diena mange orba letar? ¡O Del te avel leke zao tutar bre chaurrea!

30O Jose pherdilo zao kana dikhla pe phlale, ta sigarda te del ande pi soba, ta kote thodape te rovel. 31Kana achadape te rovel, jalada po mui, likisto ta phenda:

¡Thoven o jape!

32E Joseeke thode leke te jal pe iek sinia, a e chave e Jakobeke pe aver, ta pe aver sinia thode e ejipsionenge kai jana lea, soke e ejipsiure nasti jan e llenenchar kai si ebreura. 33E phlal katar o Jose besle kana o Jose phenda le, ta besle prema e bursa kai saia lenge, katar o mai purano llik kai o mai terno, ta von but chudinape ta dikhena iek pe aver. 34Ta o Jose dia len te jan katar piri sinia, ta e Benjamine thoda panch droma mai but neko ogolen. Ta pile lea ta but beselisaile.

Currently Selected:

Jenesis 43: BACHRO

Highlight

Copy