Jenesis 4
4
O Kain ta o Abel
1O Adan sovto e Evaia ande iek than, ta voi achili khamni ta maladila lake o Kain, ta phenda:
Pala e volia e Devleki avila man iek chaurro. 2Mapalal maladila lake o Abel, phlal katar o Kain. O Abel saia chobano bakrengo, a o Kain radila e phuv.
3Nakhlo o vreme, ta iek llive o Kain anda te del e Devle septelie katar so dia le e phuv. 4Ta i o Abel anda te del e Devle katar e purve bakre mai thule kai maladile. A o Del dikhla dragostimaia po Abel ta pe so anda leke, 5a po Kain ni dikhla dragostimaia ta ni pe so anda leke. Ta pala gava o Kain but jolailo, ta pinllardola pe leko mui e joli. 6Ondaka o Del phenda leke:
¿Soke jolailan ta cho mui si zalbako? 7Te chere o lachipe ka lav tut dragostimaia, a te chere o bilachipe, o bilachipe si po udar ta rodel te gazdaril pe tute, a tu sai gazdari pe lete.
8Iek llive o Kain ikharda pe phlale e Abele te phiravenpe ande umal, ta kana sea e dui ande umal, o Kain dia korvane ande po phlal o Abel, ta mundarda le. 9Ondaka o Del phenda e Kaineke:
¿Kai si cho phlal o Abel?
O Kain phenda:
Ni llanav. A so, ¿me morabi te arakhav le?
10Ondaka o Del phenda leke:
¿Soke mundardan che phlale? O rat che phlaleko kai peradan pe phuv, mangel mandar te krisiu tut. 11Goleke ka ache proketo ta tradino katar e phuv kai pila o rat che phlaleko kai tu mundardan. 12Kana ka radi e phuv, ni ka del tut pe septelie. Ta ka lla pe suako rig, ta ka ave sargo iek lleno kai inai le kai te zivil.
13Ondaka o Kain phenda e Devleke:
Me nasti terpiu iek duk gia bari. 14Allive tradian man katar gaia phuv, ta morabi te avav sargo iek lleno kai gurudol tutar ta kai inai le kai te zivil. Nikada nasti ka achav te lelpe mandar o chiñipe, a gia, vareko te malavela man ka mundarel man.
15A o Del phenda leke:
A vareko te mundarela tut, ka avel dukado efta droma. Ondaka o Del thoda po Kain vareso te dikhol, gia te malavela le vareko te na mundarel le.
16Gia si sar durilo o Kain katar o Del ta zivisarda ande phuv katar o Nod, kai si pe rig katar likel o kham katar o Eden.
O porodo katar o Kain
17Ta o Adan pale sovto e Evaia ande iek than, ta khamnili ta maladila lake o Enok. Mapalal o Kain vazdia iek foro kai thoda leko anav pe pe chaurreko o Enok. 18A o Enok saia o dad katar o Irad, a o Irad saia o dad katar o Mejuiael, a o Mejuiael saia o dad katar o Metusael, a o Metusael saia o dad katar o Lamek. 19A o Lamek saia le dui rromia, iek ikhardola Ada ta ogoia ikhardola Sila. 20A e Ada saia e dei katar o Jabal, kai letar likisti e vicha kai zivin ande chare ta bariaren guruva. 21A o anav katar leko phlal saia Jubal, kai letar likisti e vicha kai basalen e arpa ta o firo. 22A e Sila saia e dei katar o Tubal Kain, vou radila ando sastri ta cherela ezgode tuchne ta i sastrune. A leki phei ikhardola Naama.
23Iek llive o Lamek phenda pe rromienge e Adake ta e Silake:
Thoven sama so phenav tumenge:
Ka mundarav iekhe muruse te ranila man,
ta iekhe terne te chalavela man.
24A te ikanena e duk katar o Kain efta droma,
e duk katar o Lamek morabi te ikandol
eftavardes droma efta.
O Trito chaurro katar o Adan ta e Eva
25Ta o Adan pale sovto ande iek than e Evaia, ta achili khamni ta maladila lake iek chaurro, kai thoda leko anav Set, soke phenda:
O Del dia man aver chaurro po than katar o Abel, gole kai o Kain mundarda.
26Ta i o Set avila le iek chaurro, kai thoda leko anav Enos. Ta kotar angle e manusa thode te blagosin o anav e Devleko.
Currently Selected:
Jenesis 4: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
