Jenesis 37

E Josee bichinen le leke phlal

1O Jakob achilo te zivil ando Kanaan, kote kai leko dad zivisardaia nesavo vreme. 2Gava si so nakhla e familia e Jakobeki:

O Jose saia leke desefta burs ta arakhela e bakre pe phlalenchar, ta o Jose saia e chaurrenchar katar e Bila ta e chaurrenchar katar e Zilpa, e rromia leke dadeke, ta o Jose phenela pe dadeke e bilache ezgode kai cherena.

O Jose ta leke phlal

3O Israel volila e Josee mai but neko sa pe ogole chaurren, soke o Jose biandilo kana vou saia phuro. Goleke cherda leke iek fistano but sukar. 4A kana acharde leke phlal kai lengo dad volila le mai but neko len, thode te murzin pe lete ta ni dena orba lea postenimaia.

5Ta iek llive o Jose dikhla iek suno, ta phenda le pe phlalenge, a von ios mai murzisarde pe lete. 6A vou phenda lenge gia:

Asunen akana o suno kai dikhlem. 7Ando suno kai dikhlem saurre sama ande umal ta chidaia pe umpe o lliu, ta murni umpa thota pe pe porrne, a e umpe tumare thodepe truial katar murni, ta die tenemava angla la.

8Ondaka leke phlal phende leke:

¿Tu phene kai tu ka ave amaro charo, ta kai ka gazdari pe amende? Ta ios mai but murzisarde pe lete cheres leke sune, ta prema sar phenela len.

9Mapalal o Jose dikhla aver suno, ta phenda le pe phlalenge, ta phenda:

¿Llanen kai dikhlem aver suno, ta ande gua suno dikhlem kai o kham, o chon ta desuiek cheraia dena changa angla ma?

10Kana o Jose phenda o suno pe dadeke ta pe phlalenge, leko dad dia pe lete ta phenda leke:

¿So mange te phene gale sunea kai dikhlan? ¿Kai chi dei, che phlal ta me ka ava te da changa pe phuv angla tu?

11Ta leke phlal murzina pe lete, a leko dad mislilape ande gala ezgode.#Ech 7.9.

E Josee bichinen le

12Iek llive e phlal e Joseeke llele ando Sikem te roden char te den te jan pe dadeke bakren. 13Ondaka o Israel phenda e Joseeke:

Dik, che phlal si ando Sikem ta arakhen e bakren, mangav te lla te dikhe len. A o Jose phenda leke:

Kate sem. 14O Israel phenda:

Akana lla ta dik sar si che phlal ta sar si e bakre, ta irisao oma te llanav so llalpe. O Israel bichalda e Josee katar o Jebron, ta kana o Jose avilo ando Sikem, 15jasailo ande umalia. Ondaka iek lleno malada le ta puchla le:

¿So rode?

16O Jose phenda leke:

Me rodav me phlalen ¿Sai phene mange kai arakhen e bakren? 17O lleno phenda leke:

Von lleletar katar, ta me asundem len kai phende kai ka llan ando Dotan. Ondaka o Jose llelo te rodel pe phlalen, ta malada len ando Dotan. 18Von dikhle le kai avela duratar, ta mai anglal te avel lende von diepe orba te mundaren le. 19Ta phende iek avereke:

¡Dikhen, etalo avel gua kai dikhel sune! 20Akana, aven te mundara le, ta chuda le ande iek bunari, ta ka phena kai iek zivirinia divi jala le, ta ka dikha so ka avelpe katar leke sune.

21Kana o Ruben asunda gala orbe, mangla te braduil le katar leke phlal, ta phenda:

Na mundara le. 22Na peraven rat. Chuden le ande gava bunari kai si po pusto, ta na vazden o va pe lete. O Ruben phenda gala alava soke mangela te braduil e Josee ta te iril le kai leko dad. 23A kana o Jose avilo kote kai sea leke phlal, von ikande leko sukar fistano kai saia pe lete, 24istarde le ta chudie le ando bunari kai saia chucho, bi paieko. 25Ta mapalal thodepe te jan marrno. Ondaka dikhle kai avena nesave ismaelitura katar o Galaad, ta lenge deve anena but lache merisura, ta sukar patra kai khandena but sukar kai inllarena ando Ejipto te bichinen len.

26Ondaka o Juda phenda pe phlalenge:

¿So ka dobi te mundara amare phlale, ta mapalal te guruva leko meripe? 27Mai sukar si te bichina le gale llenenge kai si ismaelitura, a na te mundara le, soke sogo cheraia vou si amaro phlal, amaro mas, Ta leke phlal avila lenge drago so vou phenda.

28Ta kana nakhena kotar e madianitura kai chinena ta bichinena, e phlal e Joseeke ikande le katar o bunari ta bichinde le gole llenenge kai sea ismaelitura pe bis tolaria rupune. Ondaka gola llene inllarde e Josee ando Ejipto.

29Kana o Ruben irisailo kai o bunari ta ni malada kote e Josee, pharrada pe patave te dikhol leki duk. 30Mapalal irisailo kote kai sea leke phlal ta phenda lenge:

¡O chaurro inai talo! ¿Akana so ka cherav?

31Ondaka von lie o fistano e Joseeko ta makhle le e ratea katar iek busno kai mundarde, 32mapalal bichalde o fistano kai po dad, gale alavenchar:

Gava maladam, dik akana dal si o inai gava o fistano che chaurreko.

33Ta samo o Jakob pinllarda o fistano phenda:

¡Ea, gava si o fistano me chaurreko! Varesavi zivirinia divi chinda le pe kotora ta jala le. 34Ondaka o Jakob pharrada pe patave ta thoda pe pete patave zalosne, ta but vreme achilo zalosno pala po chaurro. 35Ta sa leke chaurre ta leke chorra mangena te pomozin le ande leki duk a vou ni mukela, ta phenda:

Ka avav zalosno pala mo chaurro, lligo ni ka prajon man lea. Ta rovela gua dad pala po churro.

36A e madianitura bichinde le ando Ejipto iekhe lleneke kai ikhardola Potifar kai saia sudo katar o Faraon, o charo katar o Ejipto, vou saia o mai baro katar e sudura kai arakhena e Faraone.

Currently Selected:

Jenesis 37: BACHRO

Highlight

Copy