Eksodo 33

O Del phenel te llan angle

1O Del phenda e Moiseseke:

Le tut ta llatar katar e foroia kai ikandan katar o Ejipto. Ta llan kai e phuv kai phendem e Abraameke, e Isaakeke ta e Jakobe kai ka dav la lenge porodoke.#Jen 12.7; 26.3; Jen 28.13; Ek 32.13.

2Ta me ka bichalav me suecho te inllarel tut, ta ka tradav avri katar e phuv gale llenen:

E kananeura, e amorreura, e jititura, e fereseura, e jeveura ta jebuseura. 3Llan kai e phuv kai o thud ta o aullin llan sargo paia. A me ni ka llav maskar tumende, te na zatriv tumen po drom, soke tumen sen llene kai ni kanden.

4Kana o foro asunda gaia bilachi viasta, thode pe pete patave zalosne ta niko ni furiadilo. 5Soke o Del phendaia e Moiseseke: Phen e israelenge: Tumen sen llene kai ni kanden. ¡Me te avilema maskar tumende zatrisardema tumen! ikanen isto akana tumaro sunakai tumendar, ta ondaka ka dikhav so ka cherav tumenchar.

6Ta katar o burdo kai ikardol Joreb, e israelitura ni thode pe pete po sunakai.

E chara kai maladon e Devlea

7Ondaka o Moises lia e chara e Devleki ta thodala dur katar o pero, ta ikharda la e chara kai maladon e Devlea. Kana vareko mangela te puchel e Devle llala kai e chara kai saia avri katar o pero. 8A kana o Moises llala kai e chara, sa e llene ustena ta achena pe porrne angla pe chare ta dikhena po Moises lligo ni dela ande chara e Devleki. 9Ta kana o Moises dela ande chara, o oblako fuliela ta achela po udar katar e chara ta o Del dela orba e Moisesea. 10Ta kana e llene dikhena kai o oblako achela po udar katar e chara e Devleki, suako lleno dela changa po udar katar pi chara ta blagosina.

11Ta o Del dela orba angla o Moises, gia sar del orba iek lleno pe amalea, ta mapalal o Moises irilape ando pero. A o terno kai pomozila le kai ikhardola Josue, chaurro katar o Nun, achela ande chara e Devleki.

O Del sikavel po baripe e Moiseseke

12O Moises phenda e Devleke:

Dik, tu mange mandar me te inllarav gale foro, a tu ni phene mange save llene ka bichale manchar. Ta i phene kai si tut but vera ande mande ta kai si chuke zao mandar.

13Te si gava de istina kai maladem o zao angla che akha, me molivman chuke, mangav akana te sikave mange cho drom, te sai pinllarav tut, ta te malavav o zao angla che akha, ta dik kai gava sueto si cho foro.

14Ta o Del phenda leke:

Isto me ka llav tuia, ta ka cherav te ache esmiro.

15A o Moises phenda leke:

Te na llaia isto tu amenchar, na cher te lika katar.

16Soke tu te na llaia amenchar, ¿sar ka llangliolpe kai cho foro ta me sam tuia? Gia si sar cho foro ta me gava thode pe iek rig katar sa ogola forura katar e phuv.

17Ondaka o Del phenda leke:

Gava so phendan ka cherav le soke maladan o zao angla me akha, ta phinllardem tut katar cho anav.

18Ondaka o Moises phenda:

¡Muk man te dikhav cho baripe!

19A o Del phenda leke:

Me ka cherav te nakhel angla tu sa mo volipe, ta angla tu ka phenav mo anav. Ta ka avel mange zao katar me mangava te avel mange zao.#Ro 9.15.

20A phenav chuke kai nasti ka dikhe mo mui, soke nisavo manus nasti ka dikhel mo mui ta te zivil.

21Ta i phenda o Del:

Dik, kate pasa ma si iek than. Thou tut pe porrne pe pechina.

22Kana ka nakhel mo baripe, ka thovav tut ande iek putardipe katar e pechina ta ka ucharav tut me vastea lligo ni ka nakhav. 23Mapalal ka ikanav mo va, ta sai ka dikhe me zea, a mo mui nasti ka dikhol.

Currently Selected:

Eksodo 33: BACHRO

Highlight

Copy