Eksodo 14
14
E israelitura nakhen pe ogoia rig katar e mora e Loli
1O Del dia orba e Moisesea ta phenda leke:
2Phen e israelenge te irinpe ta te loden angla o Piajirot, kai si maskar o Migdol ta e mora angla o Baalzefon ta te thoven pe chare angla gava than pasa e mora. 3Gia o Faraon ka phenel:
E israelitura ni llanen kai te llan. Von llan jasarde po pusto. 4A me ka zuriarav o lio e Faraonoko te sai llal pala tumende. Ondaka ka sikavav mi zor pe lete, ta pe sa e llene kai llan lea te marenpe, ta e ejipsiura ka llanen kai me sem o Del. Ta von cherde le gia.
5Ta phende e charoke katar o Ejipto kai e israelitura nasle. Ondaka o charo ta e llene kai radina leke pharrudilo lengo mislo cheres lende, ta phende isto von peke: ¿A sar amen muklam te llantar e israelitura te na radin ios amenge?
6Ta isto kote o Faraon phenda te lacharen leko bordon marimako, ta inllarda e llenen kai marenpe. 7Ta inllarda pea sov stotine bordona katar e mai lache, ta i sa e bordona katar o Ejipto, ta e kapitane llana upral pe lende. 8Ta o Del zuriarda o lio e Faraonoko o charo katar o Ejipto ta llelo pala lende te marel e israelen. A e israelitura likistea bare zoriaia.
9A ejipsiura llele sa e llenenchar kai marenpe, ta pe bordonenchar ta e llenenchar kai llan pe gra, llele pala lende te maren len. Ta resarde len pasa e mora, kai si ando Piajirot ta angla o Baalzefon, kote kai inzardea pe chare. 10Ta kana e israelitura dikhle kai o Faraon ta e ejipsiura llana pala lende, von but daraile ta molisaile e Devleke. 11Ta phende e Moiseseke:
¿Ni saia limoria ando Ejipto? ¿A soke ikandan amen kotar te sai mera kate po pusto? ¿Soke cherdan gava amenchar? ¿Soke ikanda amen katar o Ejipto?
12¿Inai gava so phendam chuke ando Ejipto kana phendam: Muk amen te radi e ejipsionenge? ¡Mai sukar avela amenge te ava lenge sluge a na te mera po pusto!
13A o Moises phenda lenge:
Na daran. Na kovlion ta dikhen so ka cherel o Del allive te braduil tumen, soke e ejipsionen kai allive dikhen, nikada ios ni ka dikhen len.
14Tumen na brigin tumen, soke o Del ka marelpe pala tumende.
15Ondaka o Del phenda e Moiseseke:
¿Soke mange te pomoziu tut? ¡Phen e israelenge te llan angle!
16A tu, vazde chi rovli ta vazde cho va karing e mora ta fulav la po dopas, te sai nakhen e israelitura po sukipe. 17A me ka zuriarav o lio e ejipsionengo te llan pala tumende. Ta me ka sikavav mi zor ando Faraon ta ande sa leke llene kai marenpe, ta ande leke bordona ta pe llene kai llan pe gra. 18Ta kana ka sikavav mi zor ando Faraon, ta ande leke bordona ta pe llene kai llan pe gra, e ejipsiura ka llanen kai me sem o Del.
19Ondaka kote o suecho e Devleko ta o oblako kai llala angla e israelitura, miskosaile kotar ta thodepe palal pala lende. 20Gia o oblako achilo po maskaral katar e ejipsiura ta e israelitura. E ejipsionenge o oblako saia truniariko, a e israelenge kletosarela len orachaia. Goleke e ejipsiura sorro riat nasti resarde e israelen.
21Ondaka o Moises vazdia po va karing e mora, ta o Del bichalda iek bari balav katar likel o kham kai phurdia sorro riat. Ta fulada e mora pe dui kotora. Gia o Del mukla po maskaral iek drom suko. 22Ta e israelitura nakhle pe iek drom suko maskar dui zidura paieke, iek pe chachi a aver po stingo.#Sal 77.16-20; 1 Kor 10.1-2; Ebr 11.29.
23Ta sa e llene pe gra ta e bordona e Faraoneke nakhle pala lende ta llele te marenpe lenchar llik kai o dopas katar e mora. 24A kana pharrona e zore o Del dikhla pe llene ejipsiura kai llana te marenpe, ta katar o oblako iagako, cherda te avel iek bari burkania maskar lende, 25ta ikanda e tochkura katar lenge bordona, ta nasti llana angle. Ondaka e ejipsiura phende: Nasa katar e israelitura soke lengo Del marelpe amenchar.
26A o Del phenda e Moiseseke:
Inzar cho va pe mora te sai irilpe o pai ta te perel pe ejipsiura, pe bordona ta pe llene kai llan pe gra.
27Ondaka o Moises vazdia po va upral pe mora, ta kana pharrona e zore o pai irisailo but zurale. A kana e ejipsiura nasena, maladile e moraia, ta gia o Del zatrisarda len po maskaral katar e mora. 28Ta kana e mora irisaili, ucharda e bordona ta e llenen kai llana pe gra, ta sa e llenen kai llana te marenpe, gola kai diea ande mora te marenpe e israelenchar. Ni iek boñiko e Faraonoko ni achilo llundo. 29A e israelitura nakhle e mora po sukipe maskar dui zidura paieke, iek pe chachi a aver po stingo.
30Ande gua llive o Del braduisarda e israelen katar e va e ejipsionenge, ta e israelitura dikhle e esnage mule katar e ejipsiura pasa e mora. 31Kana dikhle e israelitura e bari zor kai o Del bichalda te zatril e ejipsionen, von daraile e Devletar ta pachaie ando Del ta ando Moises e Devleko sluga.
Currently Selected:
Eksodo 14: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
