Mariko 8

Yesu uguvafa malëwa antu maghana anjou ane.

(Mat 15:32-39)

1Itungo rësëë, mwirundo üküü wa antu ugihaangwiya kangë, na naavëtikweti malëwa. Uvii, Yesu agavataana asëywi vakwe agavëëra, 2“Navoonea uvavi antu avaa gusoko vëkhaa na nee gwa matiku atatu, ëgweeso gwayo vëtikweti malëwa. 3Nena anyaghwisya vende umakhayawe vërefo në vëugwa munjëa na weha, gusoko mukhatë awe vërefo vëfumie kure engë.”

4Asëywi vakwe vëgamuwiiya, “Afaa mumbugha ëgigëa fee mëkaate a uvikutya antu avaa voong'e?” 5Yesu agavawiiya, “Mukweti mëkaate inga?” Veeso noo vëgamusucha, “Mufungatë,”

6Uvii, agavaraghëëya antu vëkhee fang'i. Agamëduya mëkaate ësëë ëmufungatë, agamurumba Muungu, agamëvegha, agavafa asëywi vakwe vëvavaghanie antu veeso noo vëgavavaghania. 7Naa vëkweti noo vënasomba vikevuu. Yesu agaviforya, agavaraghëëya vësëë noo vëasimëye antu. 8Antu vëgala, vëgikuta. Vëgahaangwiya masayo a makoko vëgijuya makaafu mufungatë. 9Na vasaa nënaa vëgala naa antu vëkhondie maghana a njou ane. Yesu agavanyaghwisya, 10na gënyafaafo aganatëa masua itambëëmwe na asëywi vakwe, agenda ung'andë a Udalimanuta.

Afarisayo vëufenja ndolyo

(Mat 16:1-4)

11Afarisayo vëgaja vëgaandya gironga inaa Yesu. Gwa umughema, vëgafenja kune mweeso avatendeye ndolyo në iguraghëëra ukweti gëyanjëyo ufuma girunde. 12Yesu agafya nkhoo, agahanya, “Asikë ufafo uruu ugufenja ndolyo? Tutë namwëëra, ufafo uruu utiufewa ndolyo mba nduvë.” 13Uvii, agavareka, aganatëa kangë masua, agaandya muhënjo gwenda gitumbë ra gavëë ra irambo.

Sasu a Afarisayo nanë amwa Herode

(Mat 16:5-12)

14Asëywi naavëwaa uhora mëkaate, naa vëkweti mukaate rumwedu gutufu mumasua. 15Yesu agavahughua, “Raraavi ino! Ighoji na sasu a Afarisayo nanë sasu amwa Herode.” 16Asëywi vëgaandya uvëëvëëtya veeso gwa, “Ugurëghëtya uvii gusoko gutikweti mëkaatena.” 17Yesu agamanya asaa, agavëëra, “Asikë muuvëëvëëtya gusoko mutikweti mëkaate? Wurë, ëkëë mwinamanyana, ëgweeso gwayo noo mutighunena? Wurë, nkhoo yanyu yakakufa du na? 18Wurë mukweti miho noo mutighune? Mukweti makutwë noo mutitegheeye? Wurë, mutikumbukiwe 19itungo iroo nënaa ngamëvegha mëkaate ëyoo itaano na uvafa antu maghana a njou ataano? Mugahaangwiya magugü anga a makhokho?” Vëgamusucha, “Ikumi na avëë. 20Na nënaa ngamëvegha mëkaate ëyoo ëmufungatë na uvafa antu, maghana a njou ane, mugahaangwiya magugü anga a makhokho?” Vëgamusucha, “Mufungatë.” 21Uvii, agavakhanëa, “Uu ëkëë mwinamanyana?”

Yesu ugumuforya mufoku wa Ubetisaida

22Yesu agafika Ubetisaida itambëëmwe na asëywi vakwe. Kuuko antu vëgamweetea mufoku umwe, vëgamuromba amutenye. 23Yesu agamukwata mufoku usuu mukhono, agamutongeera gunji a gëjiji. Agamwira mate mumiho agamutendea mëkhono, agamuwiiya, “Wurë, udahite goona intuna?” 24Mufoku wasuu agararaava, agahanya, “Noona antu vëghunëkie mwino mëtë në ëgweendeenda.” 25Uvii Yesu agamutendea kangë mëkhono mumiho, mweeso noo agakhamya miho, udaho wakwe wa goona ugamusukëa, agoona oong'e vija. 26Yesu agamwëëra ende kunu winjë ukhaakwe na umuraghëëya, “Utasuke mugëjiji!”

Fetero ugumuhanya Yesu mwino chu Masiha

(Mat 16:13-20; Luk 9:18-21)

27Uvii Yesu na asëywi vakwe vëgaenda muvëjiji vya uKaisarea Filipi: Nënaa vëëmunjëa, Yesu agavawiiya asëywi vakwe, “Antu vëuhanya nene në anyu?” 28Vëgamusucha, “Vangëja vëuhanya veve wë Yohana Mubadisi, vangëja Eliya na vangëja umwe wa anyagidaghu.” 29Mweeso noo agavawiya, “Na nyee, wurë? Muhanyaa nene në anyu?” Fetero agamusucha “Veve wë Masiha.” 30Yesu agavaghiya vëtamukhanie muntu mba umwe sayu yakwe.

Yesu uguyahanya makhasëko, ikuya na ufëtya kunë mweeso

(Mat 16:21-28; Luk 9:22-27)

31Yesu agaandya uvasëya asëywi vakwe, “Imunoneye MwanaaMuntu ahangwe na makhasëko mingë nanë uhitwa na anyampaa na akumbëki aküü na asëyi va Seria. Uguuraghwa na në matiku atatu akëra ugufëtya.” 32Yesu agavakhanëa ihanyo rësëë daaji. Uvii, Fetero agamuhora umpeo, agaandya umukenea. 33Ëgweeso Yesu agikengeeya, agavararaava asëywi vakwe, agamukenea Fetero uguhanya, “Hegha kunu nee vee, Setani! Masëgho ako ti agimuungu ëgweeso agimuntu.”

34Faafo noo agautaana mwirundo wa antu itambëëmwe na asëywi vakwe, “Gëkaku muntu nëugufenja utenda musëywi wane, inoneye ikhane mweeso mughonjo, aukenke musalaba wakwe, ang'onge. 35Gusoko muntu nëugufenja uwutyoa uduvi wakwe mweeso mughonjo uguuyaghaya, ëgweeso muntu nëuguuyaghaya uduri wakwe gusoko ranë na gusoko a Sayu Njija uguutyoa. 36Wurë, muntu uguhanga ntuni nëwauhanga urëmi woong'e na guuyaghaya uduvi wakwe? 37Mbanoo muntu uguduya ntuni gëkhawo ga udui wakwe? 38Muntu gëkaku mu ufafo uruu nee ufumbu na ubë na nëutimukeere Muungu nëugunyoneaa mënyaa nene na masëyo anë, MwaaMuntu ugumwonea mënyaa muntu wasuu itungo nëikwe waja mu aküü, wa weru wamwa Tata wakwe itambëëmwe na vamalaëka në veru.”

Currently Selected:

Mariko 8: RIMRC

Highlight

Copy