Matayo 8
8
Yesu ugumuforya munya matana
(Mrk 1:40-45; Luk 5:12-16)
1Yesu nënaa watununta ufuma guughongo, maburi mingë a antu ëgamuhonga. 2Uvii, agaja munyamatana umwedu, agamutungamëa uguhanya “Müküü, nëwayanja udahëte unjerya!” 3Yesu agaghoora mukhono wakwe agamutenia na uhanya, “Nayanjaa! Were.” Mu gënyafaafo muntu wasuu agafora matana akwe. 4Uvii Yesu agamwëëra, “Tegheeya, utamukhanëe muntu mbaumwe, ëgweeso enda wiraghëëre kunë mukumbëki na uduye dahwa mwino ëhanyiwe na Musa uvaraghëëra mwino chu waforaa.”
Yesu ugumuforya mutumami wamwa müküü umwe Muroma
(Luk 7:1-10)
5Yesu nënaa ugingëa umuji wa uKafarinaumu, müküü umwe Muroma agenda umuhanga, agamunena 6uguhanya, “Müküü, mutumami wanë uree ukhaya, ukure ighandi na weemetwe ino.” 7Yesu agamwëëra, “Nëjie umuforya.” 8Müküü wasuu agamwëëra, “Müküü, nene ntinonenye veve wingie ukhaanë. Ëgweeso hanya ukhani gutufu, na mutumami wanë ugufora. 9Gusoko, nanë neenoo antu vangëja vëë gunto anë, nkhweti asikee në nee në gunto awe. Ngumwëëra umwe, ‘Enda!’ Mweeso noo winjë, na ungëja ‘Njuu!’ Mweeso noo ujie, na mutumami wanë, ‘Tenda intu ërëë!’ Mweesonoo ugutenda.” 10Yesu nënaa wategheeya asaa, agataka, agavëëra antu nënaavëmuhongie, “Tutë namwëëra, ëkëë ntinoonaa mukhatë a Isiraeli uhuvëi nëwëë mwino uruu. 11Uvii, namwëëra mwino antu vingë vëjie ufuma kiya na umweri, veesonoo vëgikhaa mu malëwa itambëëmwe na Iburahimu, Isaka na Yakobo mu Utemi wa girunde. 12Ëgweeso vasaa nënaa vënoneye utendeka mu Utemi kunu vana va utemi vëujughutuwa gunji, mukiti, kunë vëgëëra na ula mino.” 13Uvii Yesu agamwëëra müküü Muroma wasuu, “Enda ukhaya na ëtendeke uvii mwino wahuvëaa.” Na mutumami wakwe agafora itungo ërëëroërëëro.
Antu vingë vëuforiwa
(Mrk 1:29-34; Luk 4:38-41)
14Yesu agafika ukhaya amwa Fetero, agamuhanga mukhema umwe, mukhwe amwa Fetero, uree guurii urue ino. 15Uvii, Yesu agamutenia mukhema wasuu mukhono, na urue ugamurekea, agimëka, agamutumamëa. 16Nënaa aa mpëndë, vëgamweetea antu vingë nënaa vina vinyonyinyonyi, mweesonoo, gwa uhanya ukhani gutufu, agavijuncha vinyonyinyonyi visii. Agavaforya noo antu voong'e nënaa vërue. 17Asaa nënaa ëgahanyiwa na munyagëdaghu Isaya ëkhondeke, “Mweeso wauhorie ulegheku witu, na wayahoire marue itu.”
Nëvënoneye umuhonga
(Luk 9:57-62)
18Yesu nënaa woona mwirundo wa antu umufiimëye agavëëra asëywi vakwe vende ung'andë ëngë a irambo. 19Musëyi umwe wa Seria agamuhanga agamwëëra, “Musëyi, nee nguguhonga goong'e kunë winjë.” 20Yesu agamusucha, “Mura vina mpanga, na nyonyi yina viuri, ëgweeso Mwaamuntu atikweti fana ugutuëya.” 21Faafo muntu ungëja mukhatë a asëywi vakwe agamwëëra, “Müküü, ndeka tanju nende umuvëka tata wanë.” 22Ëgweeso Yesu agamwëëra, “Ng'onga! Vareke akuyi vëavëke akuyi vawe.”#8:22 Vëavëke akuyi vawe: Avoo nëvëtungiwe na ntendo a Gëyahudi a ababanda uvavëka va ihe nëvakuya.
Yesu ugurëhavya ifefe ra mpefo ra majë
(Mrk 4:35-41; Luk 8:22-25)
23Yesu agingëa mu masua, na asëywi vakwe vëgenda itambëëmwe na mweeso. 24Gënyafaafo, ifefe ra mpefo ra umajë rëgadwëëra mwirambo, mafefe a majë ëgaandya umëkunëkëa masua. Yesu naa uree too. 25Asëywi vëgenda umuhanga, vëgamufëtya vëumwëëra, “Müküü, gutyoe, goohira!” 26Yesu agavëëra, “Nyee antu nëmwina uhuvëi ukeevuu, asikë nëmughooghofa?” Uvii agahumbuka agayikenea mpefo na mafefe a majë, ng'ë ëgatwa twëë. 27Antu vëgataka, vëgahanya, “Muntu wëë wurë uyuu? Nanë mpefo nanë mafefe a majë ëmutegheeye!”
Yesu uguvaforya antu vavëë nëvina vinyonyinyonyi vibë
(Mrk 5:1-20; Luk 8:26-39)
28Yesu agafika ung'ë a Ageraseno ung'andë a irambo, na kuuko antu vavëë nënaa vina vinyonyinyonyi vëgatang'ana inaawe vëfumie umbelelo. Antu avaa naa akharë ino, na naa gutie muntu nëagasoya ukëëra njëa ësëë. 29Veesonoo vëgaandya ukurya mukindo, “Wina ihanyokë nasee, vee Mwana a Muungu? Wurë wajie ugukhasya nëkëë itungo rayo rinafikana?” 30Fifë na faafo naa gwina nguuma nyingë igudëmwa. 31Uvii, vinyonyinyonyi visii vigamunena, “Nësa uguguheya, ugurekëe guyingëe nguruwe iyoo.” 32Yesu agavëëra, “Ari! Endi.” Faafo vigavadua antu vasaa, vëgayingëa nguuma. Idee roong'e ra nguuma rëgatununta muntununto asëë, ëgagwea girambo, nguuma yoong'e ëgakuya mumajë.
33Adëmi va nguuma vasaa vëgamanka, vëgenda umujini. Kuuko vëgafunya sayu yoong'e na mantu nëegavahanga antu vasaa nënaa vina vinyonyinyonyi. 34Uvii, antu voong'e mu muji wasuu vëgadua vëgamuhanga Yesu, na nënaa vamwona vëgamunena aheghe mung'ë awe.
Currently Selected:
Matayo 8: RIMRC
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.