Lucas 18

Mana ajayëpa Teyta Diosman mañakunapaq yaćhatsinqan

1Imëpis mana ajayëpa Teyta Diosman mañakuyänanpaqmi discïpulunkunata Jesús imamanpis iwalatsiypa yaćhatsir 2ñëqan: “Uk markaćhöshi Teyta Diosta mana cäsukoq juez kañaq. Runakunatapis manash respetaqtsu. 3Tsë markaćhöshi uk viüdapis täkuñaq. Pëshi tsë juezman kutin kutin ëwar ñiñaq: ‘Teytë, quejakunqäta arreglëkallämï’ ñir. 4Tsënö kutiptinpis juezqa manash cäsuñaqtsu. Tsëshi yarpaćhakur shonqullanćhö ñiñaq: ‘Diosta mana cäsurpis ni runakunata mana respetarpis 5kë warmipa demandunta sas arreglëkushaq. Mana arreglaptëqa umäta nanatsirmi imë hörapis kutimunqa’ ”.

6Tsënö ñiskirñam Teyta Jesús ñëqan: “Mana alli juez imata ñinqantapis chumaq tantiyakuyë. 7¿Manatsuraq Teyta Diospis kuyapanqa akranqan runakuna paqaspapis unaqpapis mañakuyaptin? ¿Pëqa mañakuyanqanta shuyarätsinqaku? 8Manaćhari. Mañakoq kaqtaqa Teyta Dios mana shuyarätsiypam yanapanqa. Peru Runapa Tsurin#18.8, 31 Runapa Tsurinpaq parlarqa kikinpaqmi Jesucristo parläqan. kë patsaman kutimur ¿pïllapis Teyta Diosman confiakïkaqta tarinqaraqtsuraq?”

Fariseuman y impuestu cobraqman iwalatsinqan

9Runa masinta manakaqman ćhurar allish tukoq runakunatam iwalatsir yaćhatsir Jesús ñëqan:

10“Ishkaq runakunash templuman Diosta mañakoq ëwayäñaq. Uk kaqshi fariseo kañaq y ukninñash impuestu cobraq kañaq. 11Tsë fariseushi shäkïkur Teyta Diosta mañakur ñiñaq: ‘Teyta Dios, wakin runakunanö mana kanqäpikmi qamta agradëcikoq. Pëkunaqa suwakoq, mana alli ruraq, uknin ukninwan kakurmi yaqakur utsa ruraq kayan. Ñoqaqa manam taqë impuestu cobraqnötsu kä. 12Ñoqaqa ayunäpis ishkë kutim cada semänaćhö. Tsënöllam llapan gänanqäpik imëpis templuman diezmöta#18.12 Diezmoqa llapan gänanqanta ćhunkaman rakiskir uk kaqta Diosman apanqanmi. apä’ ñir.

13“Impuestu cobrakoq kaqqash largullaman shäkukïkur mana ni umallantapis ciëluman pallariñaqtsu. Tsëpa rantinqa alläpa llakikurshi pëchunta takarraq ñiñaq: ‘Teyta Dios, llakipëkallämë. Ñoqaqa utsasapam kä’ ñir.

14“Ñoqam ñiyaq: Impuestu cobraq runam utsanpik perdonashqaña wasinman kutëqan. Fariseo kaqtaqam Teyta Dios perdonäqantsu. Allish tukoqkunaqa pinqakïman ćhurashqam kayanqa. Humildi kaqkunaqam alliman ćhurashqa kayanqa”.

Wamrakunapaq Teyta Diosman Jesús mañakunqan

Mateo 19.13-15; Marcos 10.13-16

15Tsëpikñam wamrakunata Jesúsman apayäqan umankunaman makinta ćhurëkur Teyta Diosman mañakunanpaq. Tsëta rikëkurmi discïpulunkuna mićhäyäqan. 16Tsënö mićhäyanqanta rikëkurmi wamrakunata qayaskir discïpulunkunata Jesús ñëqan: “Wamrakunata apayämunanta ama mićhäyëtsu. Wamranö kaqkunapaqmi Teyta Diospa mandakïninqa. 17Rasuntam ñiyaq: Pïpis Teyta Diospa mandakïninta wamranö mana ćhaskirqa manam pëpa ñöpanman ćhämunqatsu”.

Rïcu runa ajataraq salvakänanpaq kanqan

Mateo 19.16-30; Marcos 10.17-31

18Uk mandakoq runam Jesústa ñëqan: “Teytë, alli runam kanki. Mana ushakaq kawëta tarinäpaq ¿imatatan ruräman?”

19Jesúsñam ñëqan: “¿Imanartan alli runa kanqäta ñimanki? Teyta Diosllam alli ruraqqa. 20Musyankim mandamientukuna ñinqanta: ‘Ama yaqakï utsaćhöqa kankitsu. Ama runa masikita wañutsinkitsu. Ama suwakunkitsu. Ama llullakurqa manakaqta pïtapis tumpankitsu. Mamëkita y papänikita alli rikanki’ ”.#Éxodo 20.12-16; Deuteronomio 5.16-20.

21Tsënö ñiptinñam tsë runa ñëqan: “Tsëkunataqa wamra kanqäpikñam llapanta cumpliykä” ñir.

22Tsëñam Jesús ñëqan: “Ukraqmi cumplinëkipaq faltäshunki. Llapan imëkëkikunatapis rantikuskir waktsakunata yanapë. Tsëta rurarqa ciëluman riquëzëkita ćhurëkanki. Tsëpik qatimë”.

23Tsëta wiyëkurmi alläpa rïcu kar tsë runa llakiköqan. 24Llakishqa këkaqta rikëkurñam Jesús ñëqan: “¡Ima afanmi rïcu runakuna Teyta Diospa mandakïninman yëkuyänanpaq! 25Rïcu runa Teyta Diospa mandakïninman yëkunanpaq kaqpikqa mas fäcilmi camëllupis aujapa ućhkunpa päsanman”.

26Tsëta wiyaqkunañam Jesústa tapuyäqan: “Tsënö kaptinqa ¡pïraq salvakunqa!” ñir.

27Jesúsñam ñëqan: “Runakunapaq afán karpis Teyta Diospaqqa manam afantsu”.

28Ñiptinñam Pedro ñëqan: “Teytë, ñoqakunaqa llapan imëkäkunatapis itaskirmi qamta qatirëkäyaq”.

29Jesúsñam ñëqan: “Rasuntam ñiyaq: Pïpis wasinta, mamanta, papäninta, öqinkunata, paninkunata, warminta o tsurinkunata Teyta Diospa mandakïnin rëku dëjarqa 30kë vïdaćhö mas atskatam ćhaskinqa. Tsënöllam gloria vïdaćhö mana ushakaq kawëta tarinqa”.

Wañutsiyänanpaq kaqta Jesús yapë willakunqan

Mateo 20.17-19; Marcos 10.32-34

31Ćhunka ishkë discïpulunkunata qayëkurmi Jesús ñëqan: “Jerusalénman ćhänantsikpaq uchukllañam faltan. Tsëćhömi profëtakuna qellqayanqannölla Runapa Tsurinta llapanpis päsanqa. 32Uklä autoridäkunapa makinmanmi qoyanqa. Pëkunam burlakurnin qayapäyanqa y toqapuyanqa. 33Astar maqarmi wañutsiyanqa. Peru kimsa unaqtam kawarimunqa”.

34Tsënö ñiptin discïpulunkunaqa manam tantiyayäqantsu ni musyayäqantsu imapaq parlanqantapis.

Jericó markaćhö qaprata Jesús kutikätsinqan

Mateo 20.29-34; Marcos 10.46-52

35Jericó markaman Jesús yëkïkaptinñam nänićhö uchurëkaq uk qaprayashqa runa limusnata mañakur këkäqan. 36Atska runakuna ëwëkäyaqta wiyarninmi tsë qapra tapuköqan: “¿Imatan päsëkan?” ñir.

37Runakunañam ñiyäqan: “Nazaretpik Jesúsmi päsëkan”.

38Willëkuyaptinñam qapra runa qayarar ñëqan: “¡Rey Davidpa Tsurin#18.38 Teyta Dios kaćhamunqan Cristutam runakuna ñiyäqan rey Davidpa Tsurin kanqanta. Tsënö ñiyäqan rey Davidpik miraq imëyaqpis mandakunanpaq Teyta Dios prometishqa kaptinmi. Jesús, llakipëkallämë!”

39Tsënö qayakuptinmi ñöpata ëwëkaqkuna piñapar ñiyäqan: “¡Upälla kë!” Tsënö ñiyaptinpis pëqa mas qayararraqmi ñëqan: “¡Davidpa Tsurin, kuyapëkallämë!”

40Tsëta wiyaskirmi Jesús shäkïkur tsë qaprata apapäyänanpaq ñëqan. Ñöpanman ćhëkatsiyaptinñam tapöqan: 41“Qampaq ¿imata ruranaqtatan munanki?”

Qaprañam ñëqan: “Teytë, ñawë rikänantam munä”.

42Jesúsñam ñëqan: “¡Rikëña! Confiakamunqëkipikmi kutikäqonki”.

43Tsënö ñiptinmi qapraqa tsinan höra ñawin kićhakaskiptin Teyta Diosta alabarëkar Jesúspa qepanta ëwäqan. Tsëta rikëkurñam llapan runakunapis Teyta Diosta alabayäqan.

Currently Selected:

Lucas 18: qcgPB

Highlight

Copy