MATAYO 25

1“I luŋa ŋani lu tumata na ’dikona igbo’da be ke’diti naga mere gele naga a’dumadru talaki kase kine‚ utuni i momora kasi ka’depani lo nokalo. 2Mukana kasiko i dridriŋini kine gbo ’ba tobodo‚ mukana ku’de kine gbo ku tobodo. 3’Bo kugbo ko naga ’ba tobodo kine naga a’dumadru talaki kase kine‚ ko aku zonga weleta itro. 4’Bo ko naga ku tobodo kine azonga weleta i ’ulu’buwe katani ku talaki kase kine. 5Ti inga ka’depani lo nokalo a’dutoro, ko giri apoki i luru druga tototo. 6’Bo i tukaze kideni rorolo druga kuu adi‚ Boŋeta‚ ka’depani lo nokalo! Lupundrita ku momoranita kasi lepe!’ 7Ke’diti kine giri druga pure pure druga mokakindra talaki kase kine. 8Ko naga ’ba tobodo kine druga takindra ko naga ku tobodo kine adi‚ ‘Tikita yi weleta kasu kine ’bazi ’bazi po‚ igbonaga talaki kaya kine kine tatuwa tatuwa.’ 9’Bo ko naga ku tobodo kine druga teyitokindro adi‚ ‘Ŋo laga de‚ aka romoki yi kasi tani. Utita i ŋutu lo totogbodru lu, ku gboruta nasuŋa.’ 10Ku ko iutu i gboro yu‚ ka’depanilo druga yeyeŋundra‚ ko naga akukundra ’beri kine druga lubo kugele kasi lepe i tokomona na ’depani nokana kata yu. Kakana druga kikinu. 11I bo ŋanina ke’diti ku’de kine druga yeyeŋundra itro‚ druga kulia adi‚ ‘Mata‚ Mata‚ ŋaki yi.’ 12’Bo lepe druga teyitokindro ko adi‚ ‘Na takindra ta a ’diri‚ na aku deni ta.’ 13Kuwade gbo’dita ku konye‚ igbonaga ta aku de luŋalo kugbo baŋena ina. 14“Igbogbo’da be ŋutu lo pilara i ne’de ka, laga alungu upi kanye kilo‚ druga tikindra kapazi kanye kilo kasiko i kenini. 15Lepe druga tikindra upiye gele riye alifu mukana‚ le’delo alifu mure‚ le’delo alifu gele‚ atikindra ko giri beti naga ma ko romokinina. Lepe druga tutu. 16Ŋutu laga lo rumbi alifu mukanalo druga utu agbole‚ i towudra na kara‚ lepe druga rumbi ku’de alifu mukana kini. 17Ŋutu laga ku alifu murelo druga kondra kita de itro‚ arumbi ku’de mure kini. 18’Bo ŋutu laga lo rumbi alifu gelelo autu i ’boga na drili‚ druga ’dandru riye ti mata lonye kine. 19I bo na luŋazi rodri mata lo kulu upi delo druga yeyeŋundra‚ druga kendra riye kine kugele kasi ko. 20Ŋutu laga lo rumbi alifu mukanalo druga pondra‚ druga tikindra alifu mukana ku’de‚ druga kulia adi‚ ‘Mata‚ do atikindra na alifu mukana. Mete‚ na arumbi ku’de alifu mukana kini.’ 21Mata lo lepelo druga takindra lepe adi‚ ‘Do akondra a lo’bu do laga a upiye lo’bu‚ ku teili lo to’diri. Do akondra ku teili lo to’diri ku ŋo laga a lotrilo, na i’delakindra do a mata lo ŋo laga a druma. Lupundri i nyola na mata lolulona katani.’ 22Ŋutu laga ku alifu murelo druga pondra‚ druga kulia adi‚ ‘Mata‚ do atikindra na alifu mure. Mete‚ na arumbi alifu mure ku’de kini.’ 23Mata lo lepelo druga takindra lepe adi‚ ‘Do akondra a lo’bu‚ do a upiye lo’bu ku teili lo to’diri. Do akondra ku teili lo to’diri ku ŋo laga a lotrilo, na i’delakindra do a mata lo ŋo laga a druma. Lupundri i nyola na mata lolulona katani.’ 24Ŋutu laga lo rumbi alifu gelelo druga pondra‚ druga kulia adi‚ ‘Mata‚ na adeni do a ŋutu laga a riŋi‚ do lo ’didra i piri naga do aku kuruna‚ do lo tundra i piri naga do aku wezina. 25Kuwade na akuze‚ na autu i ’dandru na riye konu kine i kuzo kata yu. Mete‚ riye konu kine ma kine de.’ 26Kuwade mata lo lepelo druga teyitokindro lepe adi‚ ‘Do laga a upiye loro lo tolu’beto! Do ade adi na a ŋutu lo ’didra i piri naga na aku kuruna‚ lo tundra i piri naga na aku wezina. 27A na’bu kedri kodro kugbo do a’deya riye kuwe kine i zoko yu‚ kedri kodro i luŋa lo pondri nalo na irumbi riye kuwe kine ku ku’de kugele. 28Kuwade ’dumarata riye ti lepe kine‚ tikita ku ŋutu laga ku riye alifu mere gele lo. 29’Bo ku ŋutu laga ku kapalo‚ ititiki ku’de kini‚ kapazi ti lepe kilo ilalangu. ’Bo ŋutu laga ’ba kapalo‚ ŋo laga ma lepe gbo’dinilo ilo i’du’dumazi kaŋo ku lepeni. 30Guparata upiye laga ’ba logulo de i mude kata yu. Yu de gbiye ku ŋira na rubi nyena igbo’da.’ 31“Ku Ŋiro lo ŋutulo laga iyeyeŋundra ku mo’yu nanyena ku malaika kilo giri kugele kasi lepe‚ lepe igbigbi’diki i si’de nanye na todrumana. 32Zuro kilo giri itundra ’beri ku lepe i koŋoni‚ ’bo lepe ige’ya ko‚ beti naga ma kayukuni lo ge’yi kebilizi ku lidina, 33lepe i’gelakindra kebilizi kine i keni lonye lo lutatelo, lidi kine i keni lo kaduŋelo. 34’Bo Matalo itakindra ko laga i keni lonye lo lutatelo kilo adi, ‘Pondrita, ta ŋutulu laga ma Monye lio tikindri koŋo na’bu kilo, lumeta tumata naga akukunaki ta ŋiyu i luŋa lo gbekini kana luna. 35’Bo na kazu atika ku mago‚ ’bo ta atikindra na nyosu‚ na kazu aleŋa ku kure na pio‚ ’bo ta atikindra na pio. Na kazu a lege‚ ’bo ta atikindra na piri‚ 36na kazu asaka a pilili‚ ’bo ta asozu na ku bongo. Na kazu asaka ku mugu na mimiye‚ ’bo ta apondra i medra na na. Na lu saka i kadi naga a drodrorena kata yu‚ ’bo ta apondra kuweni.’ 37Ŋutulu laga mŋgba kilo ipiza lepe adi‚ ‘Mata‚ yi kazu amedra do ku mago‚ ’bo yi atikindra do nyosu nanu ya? Yi kazu amedra do ku kure na pio, ’bo yi atikindra do pio nanu ya? 38Yi kazu amedra do a lege‚ ’bo yi atikindra do piri‚ kugbo a pilili, ’bo yi asozu do ku bongo nanu ya? 39Yi kazu amedra do ku mugu na mimiye‚ kugbo i kadi naga a drodrorena kata yu‚ ’bo yi apondra konuni nanu ya?’ 40’Bo Matalo iteyitokindro ko adi‚ ‘Na takindra ta a ’diri‚ beti naga ma ta konakindri ŋutu laga iloŋadroo i dridriŋi na luŋaseri kuwe kilona‚ ta konakindra na.’ 41’Bo lepe itakindra ŋutulu laga i keni lo kaduŋelo kilo adi‚ ‘Utita kuweni kaŋo‚ ta ŋutulu laga alomo! Lubita i kima naga ani lengana‚ naga akukunak i kasosoyini lo kulialo ku malaika ti lepe kilona kata yu. 42’Bo na kazu atika ku mago‚ ’bo ta aku tikindra na nyosu‚ na kazu aleŋa ku kure na pio‚ ’bo ta aku tikindra na pio‚ 43na kazu a lege‚ ’bo ta aku tikindra na piri‚ a pilili‚ ’bo ta aku sozu na ku bongo‚ ku mugu na mimiye‚ kugbo i kadi naga a drodrorena kata yu‚ ’bo ta aku pondra i medra na na.’ 44Ko iteyitokindro lepe adi‚ ‘Mata‚ yi kazu amedra do ku mago nanu‚ kugbo ku kure na pio‚ kugbo a lege‚ kugbo a pilili‚ kugbo ku mugu na mimiye‚ kugbo i kadi naga a drodrorena kata yu‚ ’bo yi aku logu do nanu ya?’ 45Lepe iteyitokindro ko adi‚ ‘Na takindra ta a ’diri‚ beti naga ta aku konakindra ŋutu laga iloŋadroo i dridriŋi na kilo ŋutulu dena‚ ta aku konakindra na.’ 46’Bo ko itutu i lubo i piri na rieni ropeta ti toro naga ani lengana, ’bo ko laga mŋgba kilo ilulubo i yeŋo naga ani lengana kata yu.”

Currently Selected:

MATAYO 25: KNT77

Highlight

Copy