MATAYO 17

1I bo na luŋa bukiye Yesu azonga Petero seku Yakobo ku Yoane, luŋase lo lepelo, autuni ko i mere laga a lozolo ki yu ka’delo. 2Koŋo na lepena druga wudra mugu ka’de kasiko i koŋoni, ’bo koŋo na lepena amo’yu be kolo, ’bo bongola ti lepe kine ayeŋundra a nakpe salala. 3Mose ku Eliya druga puku kasikoni i kulia kasi lepe. 4Petero druga takindra Yesu adi, “Mata, a na’bu ti yi sakani inide. Kugbo do nyadru, na i’dugo muruguzi musala inide, gele a nonu, gele a na Mose, gele ne’dena a na Eliya.” 5Inga ti lepe ilo kukulia, ’diko ne’de na momo’yu ina druga ’diyundra i muluzu na ko, druga roro le’de kuu i ’diko ŋanina kata yu adi, “Ilo de a Ŋiro lio laga ma na nyadrilo, na anyola koru ku lepe, yiŋeta yiŋ lepe.” 6Kugbo lotodiniki kilo laga ayinga kine kulia de, ko druga memereke rupu ka, druga poki i kuze koru. 7’Bo Yesu apondra, druga ’bo’yu ko, druga kulia adi, “Ŋineta ki, ku kukuzeta.” 8Ku ko laga aboŋadru ki yu, ko aku medra le’de ŋutu, ŋolo a Yesu ka’delo. 9Ma ko kiyundri i mere ki yu kanina, Yesu akukuzu ko adi, “Ku trutrukokita le’de ŋutu ŋo lo meri ta ilo ti inga Ŋiro lo ŋutulo aku ŋiyu i dridriŋi na ŋutulu laga atatuwa kilo.” 10Lotodiniki kilo druga piza lepe adi, “Kuwade katogolo ti kukuzuna kilo akulia adi ti Eliya pondri a nze gbandra ya?” 11Lepe druga teyitokindro ko adi, “Eliya ipondra a ’diri i ’delakindra na kapazi kilo giri a loluduko. 12’Bo na takindra ta adi Eliya apondra azo, ’bo ko aku deni lepe, ko a kondra lepe beti naga ma se nyadrinina. Gbode ko isasandru Ŋiro lo ŋutulo de itro.” 13Lotodiniki kilo druga dendra adi lepe takindra ko kulia ti Yoane lo tikindra baputizilo. 14Nyenaga ku ko laga ayenga ku mongoyona yu le’de ŋutu druga pondra ku Yesuni druga ruguŋo ka ku lepe i koŋoni‚ akulia adi, 15“Mata‚ gbo’di ku ediyo ku ŋiro liolo‚ igbonaga lepe gbo ku kpekpe‚ ’bo lepe sasanya a loro ina. Luŋa rodri lepe ’do’do i kima kata yu‚ luŋa rodri i pio kata yu. 16Na azondra lepe ku lotodiniki kolu kiloni‚ ’bo ko aku romoki toruzo na lepe.” 17Yesu druga teyitokindro ko adi‚ “Ta laga a yuŋe naga ’ba rugo‚ ta laga a ’bureniko kilo de, na isasaka kasi ta luŋa muda ya? Na isasanyadru mugu ku ta ŋoru da ya? Zowuta lepe kuweni.” 18Yesu druga ringa lepe, druga drerilo lupundro ku lepe i muguni kaŋo‚ kuwade ŋirolo atoruwe agbole. 19Lotodiniki kilo druga pondra ku Yesuni ka’de‚ druga piza adi‚ “Yi aku romoki rikodru lepe kaŋo gbandra ya?” 20Yesu druga teyitokindro ko adi, “Igbonaga rugo nasuna a natrina. Na takindra ta a ’diri, kugbo rugo nasuna gbo be koyita lo nyumuti lo mutadi, ta itakindra ilo mere de adi, ‘Ŋiyoro inide, uti i nu ka de,’ ’bo lepe iŋiŋiyoro. Kuwade le’de ŋo laga ani romoki ta igbo’da ’bayi. [ 21’Bo ŋo de ani romoki lupandro gele ’du ku maka na Ŋun ku kuka na nyosu.]” 22Kugbo ko laga atunundra ’beri Galili yu, Yesu druga takindra ko adi, “Ŋiro lo ŋutulo ititiki i kenisi ti ŋutulu kilo. 23Ko irerembu lepe, ’bo i luŋa lo musala lu lepe itotoŋiye.” Ko druga gbo ku luŋuli koru. 24Kugbo ko laga ayeŋadru Kaperinauma yu, kawuro ti mosoro lo kadi na Ŋun ina kilo druga yeŋundra ku Peteroni, druga piza adi‚ “Katogoloni lolulo ani roba mosoro ŋanilo ya?” 25Petero druga kulia adi, “Lepe bita roroba.” Kugbo Petero laga ayite i ’bani, Yesu druga piza lepe a kayo adi‚ “Do rambu adinyo, Simona? Mataki ti ka kilo ko magu mosorolo ku luwalolo ku ŋa ya? Ku ŋutu kase kilo kugbo ku monyazi kiloni ya?” 26Petero druga teyitokindro lepe adi, “Ku monyazi kiloni.” Yesu druga teyitokindro lepe adi, “Kuwade ŋutu kasiko kilo ikokoloki. 27’Bo ka’bi yi ku tikindra kulia i ’doro kasiko i teiliko yu a naro, uti suburi yu ku biriŋoro golita, ’dumara sumuti lo bitu do a kayolo, ku do laga aŋazu kutu na lepena‚ do irurumbi sekeli gele. ’Dumu lepe ku tiki a nika seku do.”

Currently Selected:

MATAYO 17: KNT77

Highlight

Copy