Luk 14

Yesus lua gute ka tarna song

1Ke oklou sabat gesa Yesus la sep ke gute Farisi ina ka angaine omba ila ninu ma iye ngen kap iye. E osep tipalem Yesus itau. 2E gute dong ke Yesus bitna ka paia e tarna song omba. 3Deka Yesus pmi osep Farisi ina e osep ka tile itau ke Moses ila sogongon langane. “Langka gute due gute silang ila paiangan yagos ke oklou sabat elio are dar Moses ila sogongon koke aurou?” 4E tikoli tiwai ke iye kovok. Deka Yesus kis gute tonari e due ila paiangan yagos e pagei iye la. 5E Yesus pmi isak blang langane. “Langka gute kene ke umu otno arang koke ila bulmakau tigene ke aki ina ovuk ke oklou sabat ma iye due wansua? Lokono ma iye pie ka ovuk i? Ee.” 6E dau tikaranga tikoli tiwai ke iye kovok.

Yesus waiki osep tipes angainsak

7E Yesus vati elio ka osep ka time ma tingen ngangon tiwaiki tidong ke kova ka mgongon ina deka iye wai pelengon ano ke isak langane. 8“Alo ka gute pmi wom ma omo ke gingen ina rogo omdong ke kova ka mgongon ina kovok. Omdue langane kovok lama gute tonari pmi gute silang ka angaine mole angain wom ma iye me blang. 9E langka langane deka gute ka pmi umorwo umomo ke gingen ina rogo me ke wom e wai langane. ‘Ate ngawaiki gute ane dong ke kova ka omdong ine.’ E wom mnak wom ine e amla e omdong ke kova ka batne lokono. 10Wan ka itau alo ka gute pmi wom omo amla omdong ke kova ka batne lokono paide. E alo ka gute tonari vati wom omdong are iye ma wai ke wom langane. ‘Ate omo omdong ke kova ka omba boto.’ Deka osep leklou ka tidong ke rogo ma tidue anit ke wom. 11Kesua gute ka kakai iye tona angaine ma Ida Tapolngon pes angaine duru e gute ka pes iye tona angaine ma Ida Tapolngon kakai angaine tito.”

Ma itodue elio itau ke osep ka pula keniye

12Deka Yesus wai ke gute ka pmi iye me ngen ngangon langane. “Alo ka ompou rogo empmi lem saten koke ngap titovro koke ngap saiver koke lem osua time kovok. E empmi osep ka tidong olwo boto ke wom ka urok mani pula time kovok. Langka empmi isak ma tipmi wom ke rogo ka tipoue blang e tikoli batne ke wom ine. 13E alo ka ompou rogo empmi osep ka langane ma time. Empmi osep ka urok wan isuk boto vala e osep ka pampamu lisak soulu e osep ka kamsak soulu e osep ka amtarsak evin time. 14E ma aitno lugom itau itau ine. Kesua lama tikaranga tikoli batne ke wom kovok mase alo ka Ida Tapolngon due osep ka tidong itau e osuk ke bitna titito tidong blang ma iye koli batne ke wom.”

Yesus wai pelengon ano ke rogo

(Matyu 22.1-10)

15Gute kene ka ngen kap Yesus klingen ila pelengon tonari deka wai ke iye langane. “Gute ka ngen ngangon ke omur ka Ida Tapolngon plaue aitno itau itau.” 16E Yesus koli wai ke iye langane. “Oglou gute gesa waiki pou rogo e pmi osep pula ma time ine. 17Alo ka rogo ina taim polou iye vai ila gute bokongon ina gesa ma iye wai ke osep langane. ‘Umomo kesua imekere rogo ina wan kodong.’ 18E osep keniye tiwai tikaranga time kovok. Gute kene wai langane. ‘Ngakli taklak oku e ngawaiki ngala ngavati yage. Amwai ke ngap puda iye songon ngong ngame kovok.’ 19E gute silang wai langane. ‘Ngakli bulmakau bokongon ina songotno e ngala ma ngatok isak. Amwai ke ngap puda ma iye songon ngong ngame kovok.’ 20E gute silang blang wai langane. ‘Ngagi lou asap oku ane e ke batne ane ngakaranga ngame kovok.’ 21Gute bokongon ina tonari iding e palongo ina puda ine deka gute amnga lokono e wai ke ila gute bokongon ina langane. ‘Omsuong amla ke ekreng omba e ekreng daudeng ke armok ane e omdue osep ka urok wan isuk boto vala e osep ka pampamu lisak soulu e osep ka amtarasak evin e osep ka kamsak soulu ma time.’ 22Gute bokongon ina didi ila pelengon kodong deka wai ke iye langane. ‘Ngau puda ngadue wan ka amwai ine e dau ninu bon kovok.’ 23Deka gute wai blang langane. ‘Amla ke ekreng omba e ekreng daudeng ke omur ka lelei armok e amwai dagar ke osep time ma ninu bon ke osep. 24Ngawai ke wom langane. Gute kene ke oep ka ngapmi isak mgo ma time ke rogo ma tingen lou ngangon sasi boto vala kovok.’”

Ma itedidi Yesus

(Matyu 10.37-38)

25E osep pula pula tilila kla kap Yesus e iye bauluk e wai ke isak langane. 26“Langka gute gesa me ke ngong e iye lana iye omba ke timla koke tna koke ina titovro koke ina saiver koke sulutno koke iye tona vala e iye lana iye daudeng ke ngong iye karanga dong lou disaipel kovok. 27E langka gute pli tarna e didi ngong kovok iye karanga dong lou disaipel kovok. Iye ma pli tarna langka ila mosongon ke taklak ane wan gesa kovok.”

28“Langka gute gesa ke umu waiki uri ninu omba ka tito egim io paide ma iye dong e aitno mter langane. ‘Ninu ina uringen ina wan bitna bitna urok klingen sesue? Ngakaranga ngakli wan bitna bitna tonari koke aurou?’ 29Langka iye due langane kovok e sin opmu ka ninu dong ine paide e mase iye karanga babrum ninu ina uringen kovok osep ma tidue apok ke iye. 30E ma tiwai langane. ‘Gute ane nogrum uri ninu e oku ane iye karanga babrum ninu ina uringen kovok.’”

31“Koke langka gute ka vri mgo ke omur kene waiki due evlei ke gute ka vri mgo ke omur silang. Mgo ma iye dong e aitno mter langane. ‘Ngong kap lou osep ola ina 10,000 itakaranga itodue evlei e itomole gute ka vri mgo ke omur silang kap ila osep ola ina 20,000 koke aurou?’ 32E langka iye karanga mole isak kovok deka alo ka gute silang dau dong mawa ma iye pagei osep ke iye ma tiwai langane. ‘Ma imodue sua ma aitno lugom epen kap imi?’ 33E langane ke umu blang. Langka umosongon lumu wan keniye kovok umakaranga umodong lou disaipel kovok.”

Yesus wai pelengon ano ke sol

(Matyu 5.13 e Mak 9.50)

34“Sol wan ka itau. E dau langka sol ina galou yagos ma itodue sua ma sol tonari polou galou blang? Itakaranga kovok. 35E itakaranga itobuli sol tonari kap taklak ke yage koke kap bulmakau tena ma itau ke yage kovok. Ma itourie la vala. Gute ka karanga klingen lou pelengon ane ma iye klingen itau.”

Currently Selected:

Luk 14: ANT

Highlight

Copy