YouVersion Logo
Search Icon

Aposel 4

4
Osep tisin elio vri ke Pita orwo Jon
1Pita orwo Jon dau tiwai ke osep pula deka osep loulou ina leklou tigosok gute ka vri mgo ke osep ka tiplau Ida Tapolngon ila ninu e osep Sadyusi ina leklou tipolou ke isak. 2Osep tonari aitno lisak soulu ke isak orwo kesua tiparere osep ke elio ka osep timole metengen deka tipoga titito ke inarak denga batne ke Yesus. 3Deka tikis Pita orwo Jon e tipaur isak kla tidong ke kalabus aitno kesua kirui polou kodong. Tiwaiki tidong ine ma kotkotu tiklingen urok pelengon. 4E osep epmes ina pula tiklingen Pita orwo Jon urok pelengon deka aitno lisak la dagar ke Yesus. E ari osep ka aitno lisak dagar ke Yesus inarak sasa tires tipolou 5,000.
5Deka ke kotkotu osep Yuda ina ka ngongle e ka osep plaungan ina tigosok osep ka tile itau ke Moses ila sogongon tiduni pulu ke Jerusalem. 6Tiduni pulu kap gute Anas ka iye gute loulou ina ka mgo e Kaiafas e Jon e Aleksander e osep leklou ka isak Anas ila osua blang. 7Deka osep tidue Pita orwo Jon tisongon kalabus e tipaur isak kla tivri ke gute loulou ina ka mgo gosok sisrok amtarsak e tipmi isak langane. “Sei ila arit dong kap umu e lua umu deka umodue gute are kamla polou itau blang? Umesir sei angaine deka elio ane polou?”
8Deka Ano Itau due Pita aitno e iye wai ke isak langane. “Umu ka osep ngongle e ka osep plaungan ina umoklingen lou pelengon ane. 9Eknikane umepmi imi ke elio arit ina ka narep due gute ane kamla polou itau blang ina poloungon batne. 10Ma ngapalongo lumu umogosok osep Yuda ina ka pula keniye ma umeile omur ke elio ane ina poloungon batne. Gute Yesus ila arit due gute ane kamla polou itau blang. Oglou umenilim Yesus kamla e limla ke ina akai deka iye mana ine e mete. Deka osep tipaur pampamu ine la munu ke ina denga. Mase Ida Tapolngon didi ila arit e due poga tito ke ina denga. Deka eknikane gute ka umavati ane iye vri ane batne ke Yesus Krais ka Nasaret ina ila arit due kamla polou itau blang. 11Oglou ari gute Devit sogo Ida Tapolngon ila pelengon palma langane.
‘Opmu ane itau. Lama iye itau umeplie e umourie la. Lama umodue langane mase iye polou opmu ka due opmu leklou tinepir pulu.’”
12“Umoklingen. Oglou Ida Tapolngon kar itosep Ida Luangan Yesus. Iye tona Ida Luangan lokono e eknikane gute gesa dong langka iye kovok. Gute silang angaine dong ka karanga lua ite kovok. Aurou. Yesus vala Ida Luangan lokono.”
13Osep kaunsil ina tiklingen urok kolingen e aitno lisak mter tidue skul kovok. Deka tidigrik ine e tile omur isak orwo tiulou tarna lisak kovok. Deka aitno lisak mter oglou tidong kap Yesus. 14Osep ka tisin elio vri ke Pita orwo Jon tivati gute ka kamla polou itau blang vri ke galna lisak. E tikaranga tikoli urok pelengon kovok. 15Deka osep tiwai ke Pita e Jon langane. “Umopolou umala ke dogur.” Tipolou kla ke dogur deka osep ka tisin elio vri ke isak timter pelengon pulu langane. 16“Eknikane itodue sua ke osep orwo ane? Tidue elio arit ina gesa e itakaranga itebisi ine kovok. Aurou. Osep Jerusalem ina ka pula keniye tile ine kodong deka ma itousine? 17Elio ane ina omon ma pakes lila ke osep pula pula. Ma itakar isak pelengon dagar ka dangdang isak lama tiwai ke osep leklou blang ke gute Yesus.” 18Deka tigi Pita orwo Jon langane. “Umesep umomo.” Tisep ke ninu deka osep tikar pelengon dagar ke isak langane. “Umoklingen limem pelengon. Eknikane umanapapra osep ke Yesus sakam. Elio ane yagos.” 19Pita orwo Jon tiklingen urok pelengon dagar deka tikoli tiwai langane. “Umu tona aitno lumu lange? Langka imosongon Ida Tapolngon ila pelengon e imedidi lumu pelengon are itau? Aurou. Ma itedidi Ida Tapolngon ila pelengon vala. 20Umoklingen. Ma imodong vala kovok kesua batne oglou imavati Yesus ila elio bitna bitna e imeklingen ila pelengon. E eknikane imanapapra ine.” 21Pita orwo Jon tiwai yagos deka osep kaunsil ina tiwai pelengon dagar ke isak. Tiwai yagos deka tisongon Pita orwo Jon deka isak kla. Osep kaunsil ina tidue agegeng ke isak kovok kesua tiulou tarna lisak ke osep. Osep pula tile ke elio arit ina ka tidue deka tikakai Ida Tapolngon angaine tito la egim ine. 22Kesua gute ka kamla polou itau blang ina tobor ina sasa mole isapanal kodong.
Osep ka aitno lisak dagar ke Yesus tiwai itau ke Ida Tapolngon
23Alo ka osep tisongon Pita orwo Jon isak kla tipolou ke sisrok e tipalongo urok ke osep loulou ina ka omba e osep ngongle urok pelengon. 24Tipalongo urok ine yagos deka isak keniye aitno lisak kene pulu e tiwai itau ke Ida Tapolngon langane. “Ipem Puda wom tona omdue omur ka pula keniye. Omdue omur ka egim e omur ka moli e aki keniye blang. Omdue wan bitna bitna keniye ka tidong ke omur ka pula keniye. 25Oglou Ano Itau due limem eia Devit ka iye lem gute bokongon ina aitno deka iye wai langane.
‘Ina lange osep ka tile wom kovok aitno lisak engil ke wom? Ina lange osep pula pula aitno lisak mter ma tidue elio bitna bitna ulik ulik? 26Osep ka tivri mgo ke omur pula tikere isak ma tidue evlei. Deka osep plaungan ina pula tiduni pulu e tiwaiki tipaiavu wom Ipem Tapolngon e gute Krais ka lua osep e ka emrere Ipem Puda kodong.’”
27“Pelengon ane ka oglou Devit wai ine polou lokono ko-dong. Oglou Herot orwo Pontius Pailat tigosok osep ka tile Ida Tapolngon kovok e osep Israel ina tiduni pulu ke armok ane. Deka tidue agegeng ke Yesus ka emrere iye lem gute bokongon ina ka itau lokono. 28Tiduni pulu e tidue elio bitna bitna ka oglou emrere ma tipolou ke iye. 29Eknikane Ipem Puda imepmi wom ma omlua imi ka lem osep bokongon ina ma imoulou tarna limi kovok. Kesua osep ari orsak teitei e tiwai soulu ke imi. Omlua imi ma imawai lem pelengon ke osep pula. 30Omlua imi ke lem arit e ma lem arit due osep ka tipaia tipolou itau blang. Omlua imi ke lem arit ma imodue elio arit ina bitna bitna ke Yesus ka lem gute bokongon ina ka itau lokono angaine.” 31Tiwai ke Ida Tapolngon yagos deka ninu ka tiduni pulu ine nemilmil. Deka Ida Tapolngon Ano Itau due aitno lisak e tiulou tarna lisak kovok e tiwai Ida Tapolngon ila pelengon ke osep pula.
Osep ka aitno lisak dagar ke Yesus tilua isak pulu
32Alo ari osep ka aitno lisak dagar ke Yesus aitno lisak kene pulu e tilua pulu ke urok wan bitna bitna. Osep pula tiwai urok wan bitna bitna ina gute osep keniye. Tidue elio langka gute kene wai langka ila wan iye tona ila kovok. 33Deka osep aposel urok pelengon ila arit omba. E tipalongo osep pula ke elio ka Ida Puda Yesus mole ina metengen deka poga tito ke ina denga. Alo ari Ida Tapolngon due elio itau ke isak. 34E alo ari gute gesa ka ila wan isuk boto vala dong kap isak kovok. E osep ka inarak taklak koke urok ninu tidong io tidue burong ke isak e tipaur wan ka tidue burong ke isak ina mani la ke osep aposel. 35Deka osep aposel tidue mani tonari e titongo ine la ke osep ka urok wan isuk boto vala. 36Alo ari gute dong ka angaine Josep e osep aposel tisir iye Barnabas. Angaine Barnabas lana ine gute ka due osep aitno lisak tidong itau. Barnabas gute Livai ina gesa ka ila omur batne aidunu Saiprus. 37Ina taklak gesa dong deka iye due burong ine e paur ina mani la ke osep aposel ma titongo ine.

Currently Selected:

Aposel 4: ANT

Highlight

Share

Copy

None

Want to have your highlights saved across all your devices? Sign up or sign in