Aposel 26

Pol vri ke Agripa bitna e wai ke ila elio

1E Agripa wai ke Pol langane. “Amwai ke imi ke lem pelengon ma imeklingen ine.” Deka Pol kamadu isak e wai ke isak ke ila elio langane. 2“Wom Agripa ka emvri mgo ke omur gesa emklingen lou pelengon. Eknikane aitno lungong itau kesua ngavri ke emtem ma ngakoli osep Yuda ina urok sinngen elio ka tisin isak tivri ke ngong. 3Aitno lungong itau ngavri ke emtem ma emklingen lou pelengon kesua emile omur ke imi osep Yuda ina limem elio bitna bitna ka imedidi isak. E silang blang emile imi osep Yuda ina aitno limi para pulu ke limem pelengon. Deka eknikane ngapmi wom ma emklingen lou pelengon ane.”

4“Oglou me iding ke eknik-ane osep Yuda ina tile omur ke ngong. Tile ngong alo ka ngong dau agau e ngadong ke lou omur batne. E tile omur ke alo ka ngong agau e ngadong ke Jerusalem blang. 5Tile ngong e lou elio tauni kodong. Oglou ngong gute Farisi ina gesa e ngadidi imi osep Farisi ina limem elio ka engil lokono. Langka osep Yuda ina tiwaiki tiwai ke wom ke lou elio tikaranga tidue kesua tile omur ke ngong. 6Eknikane ngapolou ngavri ke emtem kesua aitno lungong dagar lokono e ngapara ke Ida Tapolngon ila promis ka oglou ari iye wai dagar ke limem seia. 7Oglou kodong imi osep Yuda ina limem osua songotno orwo aitno lisak dagar ke Ida Tapolngon ila promis. Langka oklou e epmes tilotuim Ida Tapolngon vala. Silang blang tipara ke alo ka Ida Tapolngon didi ila promis tonari. E gute ka vri mgo ngawai langane. Eknikane osep Yuda ina tisin elio vri ke ngong batne aitno lungong dagar langane blang. 8Ina lange aitno lumu karanga mter ke elio ka Ida Tapolngon due osep ka timete kodong tipoga titito ke inarak denga kovok?”

9“Oglou aitno lungong mter langka ngadue elio ka pes Yesus ka Nasaret ina angaine deka lou elio itau. 10Ari ngadue elio langane ke Jerusalem e ngala ngapolou ke osep loulou ina ka omba e tikar urok pelengon ke ngong e ari ngala ngadue Ida Tapolngon ila osep ma ngapaur isak tisep ke kalabus e tidong ine. Silang blang alo ka osep tidue burwa ke isak aitno lungong kene ke elio are. 11Aling pula ngala ngapolou ke limem duningen ina ninu bitna bitna e ngatok osep ma tipul dogur ke Inarak Puda. Alo ari aitno lungong engil pula e ngala ke armok leklou blang ka mawa ma ngadue agegeng ke osep ka aitno lisak dagar ke Yesus.”

Pol wai ke alo ka aitno la dagar ke Yesus

(Aposel 9.3-19 e Aposel 22.6-16)

12“E osep loulou ina ka omba tikar pelengon e arit ke ngong deka ngala ke Damaskus. 13E gute ka vri mgo ngong dau ngadidi ekreng e langka oklou airavu ngavati bublongon lelei ngong gosok sipmi. Bublongon tonari mole oklou ila bublongon. 14E ngagosok sipmi imegene ke taklak e ngaklingen gute gesa wai ke ngong ke pelengon Hibru langane. ‘Sol Sol ina lange omdue agegeng ke ngong? Ane langka omuri kevep ke akai ka bitna tei e omdue pogle ke wom tona vala.’ 15Deka ngapmi iye langane. ‘Ngau Puda wom sei?’ Deka Ngau Puda koli wai langane. ‘Ngong Yesus ka omdue agegeng ke ngong. 16Emtito emvri. Ngapolou ke wom kesua ngarere wom lou gute bokongon ina gesa. E ma ampalongo osep ke elio ka oku ane amvati e ke elio ka mase ma nganis wom ine. 17Ma ngalua wom ke lem bokongon lama osep Israel ina e osep ka isak osep Yuda ina kovok tidue elio soulu ke wom. E ma ngapagei wom ke osep ka isak osep Yuda ina kovok. 18Ngapagei wom ke isak ma lem pelengon due osep ari amtarsak pal ma tibauluk aitno lisak ke urok elio epmes ina e aitno lisak la ke elio itau. E ma tisongon Satan limla e tidong ke Upu Tapolngon limla vala. Ma aitno lisak la dagar ke ngong e ma ngasak urok elio epmes ina la e ma tidong kap osep ka Upu Tapolngon rere isak ila osep itau lokono kodong.’”

19“Gute Agripa ka emvri mgo ke omur gesa ngavati ano ka omur heven ina yagos e ngapul dogur ine kovok. Aurou. Ngaklingen ine vala. 20Ari mgongon nganapapra Ida Tapolngon ila pelengon ke osep ka tidong ke Damaskus. Deka nganapapra ke osep ka tidong ke Jerusalem. Deka nganapapra ke osep ka tidong ke omur Judia. Deka nganapapra ke osep ka isak osep Yuda ina kovok. Nganapapra ke isak keniye langane. ‘Osep umabauluk aitno lumu ke lumu elio epmes ina e aitno lumu la dagar ke Ida Tapolngon vala. Deka umodue elio itau ka nis osep umabauluk aitno lumu ke lumu elio epmes ina kodong.’ 21Ngadue elio langane e mase osep Yuda ina tikis ngong dagar ke Ida Tapolngon ila ninu. E tiwaiki tidue burwa ke ngong batne ke lou elio ka ngawai ine kodong. 22Oglou me iding ke eknikane Ida Tapolngon lua ngong e ngadong itau. Deka ngapolou ngavri ane ke umu ka angainmu omba e umu ka angainmu daudeng boto omtomu e ngapalongo lumu ine. Eknikane ngawai ke elio ka oglou kodong osep napaprangan ina e Moses tiwai ma polou. 23Oglou tiwai osep ma tidue burwa ke gute ka Ida Tapolngon rere Krais ka iye lua osep ke urok elio epmes ina. E ma iye mgo ke osep keniye ka tipoga titito ke inarak denga. Deka ma iye napapra ke osep Yuda ina e ke osep ka isak osep Yuda ina kovok ke elio ka iye lua osep ke urok elio epmes ina. E elio ane langka bublongon ke isak.”

24Pol wai langane deka Festus koli wai omba langane. “Pol wom manga manga lokono. Omdue skul pula e lem ilengen ka ombatno due wom manga manga lokono.” 25Deka Pol koli wai langane. “Gute namor Festus ngong langane kovok. Ngong manga manga kovok. Aurou. Aitno lungong mter itau e ngawai pelengon lokono vala. 26E silang blang gute ka vri mgo Agripa ile omur ke pelengon ka ngawai ine kodong. Ngawai malak ine kesua ngaile omur iye ile ine kodong. Kesua elio ka ngawai ine polou kukwop kovok.” 27Deka Pol wai ke gute Agripa langane. “Gute Agripa ka emvri mgo ke omur gesa aitno lugom dagar ke osep napaprangan ina urok pelengon koke aurou? Ngaile aitno lugom dagar ine.” 28Deka Agripa koli wai langane. “Aitno lugom lange? Aitno lugom mter langka amwai sasi boto e lem pelengon mter aitno lungong ma ngapolou gute Kristen koke aurou?” 29Deka Pol wai langane. “Langka ngawai dau tauni koke ngawai isuk boto vala eknikane ngawai ke Ida Tapolngon ngawaiki umu keniye ane umopolou eriar langka ngong ngadong. E dau ngawaiki osep tipou umu ke sen e umodong ka kalabus langka ngong kovok.”

30Pol wai langane deka Agripa ka vri mgo ke omur gesa tito vri deka Festus ka plau omur ari orwo Bernaisi tivri blang. E osep ka tidong are tivri blang. 31E isak keniye tipolou ke eliang tonari e tiwai pulu langane. “Gute Pol ila elio vri ke iye ma iye dong ke kalabus e mete ine kovok.” 32Deka Agripa wai ke Festus langane. “Langka Pol wai ma iye waiki la polou ke Sisar bitna kovok eknikane itakaranga itosongon iye ma iye la.”

Currently Selected:

Aposel 26: ANT

Highlight

Copy