Aposel 15

Ida Tapolngon ila osep tiduni pulu ke Jerusalem

1Ari osep leklou ka tidong ke omur Judia time ke Antiok e tiparere osep ka aitno lisak dagar ke Yesus langane. “Langka umedidi elio ulangngan ina ka oglou Moses kare ke imi osep Yuda ina kovok Ida Tapolngon karanga lua umu ke lumu elio epmes ina kovok.” 2Deka Pol orwo Barnabas tigosok osep tonari tikot pulu e timter pelengon pula pulu ke urok pelengon. E osep leklou ka aitno lisak la dagar ke Yesus tirere Pol orwo Barnabas gosok osep leklou blang ma isak kla ke Jerusalem. Kesua tiwaiki timosi pelengon tonari kap osep aposel e osep ka tiplau Ida Tapolngon ila osep.

3Ida Tapolngon ila osep ka tidong ke Antiok tipagei osep tonari kla ke Jerusalem. E tisongon Antiok e tididi ekreng e tilila ke omur Fonisia e omur Samaria. Ari tipalongo osep ka tidong ke omur orwo tonari ke elio ka osep ka isak osep Yuda ina kovok tipul dogur ke urok elio epmes ina e aitno lisak la dagar ke Ida Tapolngon. Osep ka aitno lisak dagar ke Yesus kodong tiklingen ine e aitno lisak neser ine. 4Pol orwo Barnabas tipolou ke Jerusalem deka Ida Tapolngon ila osep e osep aposel e osep ka tiplau Ida Tapolngon ila osep ke armok ari aitno lisak itau ke isak orwo e tikere isak itau. Deka tipalongo osep ke urok bokongon ka Ida Tapolngon lua isak ine. 5E osep Farisi ina leklou ka aitno lisak dagar ke Yesus kodong tivri e tiwai langane. “Wan ka itau imawaiki umapalongo osep ari ka aitno lisak dagar ke Yesus ma tididi elio ulangngan ina e tididi Moses ila sogongon keniye ka oglou iye kare ke imi.”

6E osep aposel e osep ka tiplau Ida Tapolngon ila osep tiduni pulu ma timter pelengon pulu ine. 7Ari timter pelengon pula pulu ine deka Pita vri ke amtarsak e wai ke isak langane. “Sipmi. Umeile omur oglou Ida Tapolngon rere ngong ke ite ma nganapapra ila omon itau mgo ke osep ka isak osep Yuda ina kovok. Kesua iye waiki osep tonari tiklingen ine ma aitno lisak la dagar ine. 8Ari Ida Tapolngon ile osep ka pula keniye aitno lisak e iye kar Ano Itau ke isak eriar langka oglou iye kar iye ke ite. Elio ka iye kar Ano Itau ke isak keniye nis ite aitno itau ke isak. 9Elio tonari nis ite Ida Tapolngon aitno kene ke osep ka pula keniye ka aitno lisak dagar ke Yesus. Ari aitno lisak la dagar ke Yesus deka Ida Tapolngon sak urok elio epmes ina. 10E ina lange umakar elio ka opru ke osep ka aitno lisak dagar ke Yesus? Oglou udo seia tikaranga ke elio tonari kovok e ite blang itakaranga ine kovok. Ina lange umotok Ida Tapolngon ine langane? 11E aitno lite dagar langane. Ida Tapolngon lua ite ke udo elio epmes ina e due noklok la batne ke Ida Puda Yesus ila makaingan. E iye lua osep tonari langane blang.”

12Osep keniye ka tidong ke duningen tikoli Pita ila pelengon kovok e tidong vala. Deka Pol orwo Barnabas tipalongo osep tonari ke nisngen e elio arit ina ka Ida Tapolngon lua isak ine ka tidue airavu ke osep ka isak osep Yuda ina kovok.

13Tiwai yagos deka Jems wai langane. “Sipmi. Umoklingen lou pelengon. 14Saimon wai ke ite ine kodong. Iye wai ke elio ka Ida Tapolngon aitno kro mgongen ke osep ka isak osep Yuda ina kovok deka iye rere isak leklou ma isak ila osep. 15Elio ka Ida Tapolngon aitno kro ke osep ka isak osep Yuda ina kovok e pelengon ka oglou osep napaprangan ina tisogo ine la pulu. Oglou ari tisogo langane.

16Ida Puda wai langane. ‘Mase ma ngabauluk blang deka ma ngadue Devit ila ninu ka oglou gene kodong e ngaurie oku. Ma ngadue ila ninu polou oku ina. 17E osep ka pula keniye leklou ma tikrim ke Ida Puda. E osep ka isak osep Yuda ina kovok ka ngarere isak lou osep kodong ma tikrim ke ngong blang. 18Ida Puda wai pelengon tonari kodong e due osep tile ine oglou lila me kodong.’”

19Jems wai ke osep blang langane. “Osep leklou ka isak osep Yuda ina kovok aitno lisak la dagar ke Ida Tapolngon kodong. Aitno lungong mter ma itakar isak pelengon ka opru isak kovok. 20Ma itosogo pas gesa ka dangdang isak langane. ‘Ma umangen ngangon ka kakai sapingen gesa angaine e ke elio langane umopolou soulu ke Ida Tapolngon bitna sakam. Ma umodue elio okwa e elio isungon sakam. Ma umangen marau e ongwa ka osep tiger agune e ka ina marau dau dong ine sakam.’ 21Kesua oglou me iding ke eknikane osep leklou tidong ka tinapapra Moses ila sogongon ke armok pula pula. E sabat aling aling osep tiritim Moses ila sogongon ke urok duningen ina ninu ka tidong ke armok armok.”

Osep tipagei pas la ke osep ka tidong ke armok armok

22Jems wai yagos deka osep aposel e osep ka tiplau Ida Tapolngon ila osep e Ida Tapolngon ila osep ka tidong ke duningen ari aitno lisak itau ke Jems ila pelengon. Deka tirere sisrok orwo ma tigosok Pol e Barnabas isak kla ke Antiok. Tipagei Judas ka angaine silang Barsabas e Sailas ma tigosok Pol orwo Barnabas isak kla. Ari isak orwo tonari timgo ke Ida Tapolngon ila osep e osep pula tidue anit ke isak. 23Deka tikar isak apanal pas ma tikalke ka wai langane. “Imi ka osep aposel ina e Ida Tapolngon ila osep inarak plaungan ina imosogo pas ane uti ke umu ka osep Yuda ina kovok ka umodong ke Antiok e ke provins Siria e ke provins Silisia. Imawai oklou itau ke umu. 24Imeklingen sipmi leklou tikar pelengon ke umu ka didi aitno lisak vala e aitno lumu kro ine. Imi ane imapalongo urok langane kovok. Aurou. Tididi aitno lisak vala. 25Deka imawai pele-ngon pulu ine deka aitno limi kene e itau ine. E imerere osep leklou ma tigosok limem saten Pol e Barnabas ka imi lana imi ke isak tiuti tipolou ke umu. 26Aitno lisak dagar lokono ke Ida Puda Yesus Krais lama oglou agegeng polou ke isak batne aitno lisak dagar ke iye. 27Deka imapagei Judas orwo Sailas ke umu ma tiwai ke umu ke pelengon ka dong ke pas ane. 28Kesua imi osep e Ano Itau aitno limi kene pulu langane. Ma imakar pelengon ke umu ka opru umu kovok. Aurou. Imakar pelengon ke umu ka lua umu vala. 29Ma umangen ngangon ka kakai sapi-ngen gesa angaine e ke elio langane umopolou soulu ke Ida Tapolngon bitna sakam. Ma umangen marau e ongwa ka osep tiger agune e ka ina marau dau dong ine sakam. Ma umodue elio okwa e elio isungon sakam. Langka umadar pelengon ane kovok ma umodong itau. Limem pelengon ane yagos.”

30Ida Tapolngon ila osep tipagei Pol e Barnabas tigosok sisrok e tisongon Jerusalem e tibauluk kla ke Antiok. Tipolou ine deka tiduni pulu kap Ida Tapolngon ila osep e tikar isak pas ka tikalke. 31Deka osep tiritim pas tonari ila pelengon. Tiritime deka aitno lisak neser ine kesua pelengon tonari due aitno lisak itau. 32Deka Judas orwo Sailas ka isak osep napaprangan ina blang tikar pelengon itau pula ke osep ari ka lua isak e due aitno lisak tidong dagar lokono. 33-34Osep tonari ka tikalke pas tidong sasi boto ke Antiok deka sisrok ka Antiok ina tipagei isak e aitno lisak epen e isak kla e tipolou ke osep ka oglou tipagei isak ke Antiok.#15.33-34 — Osep leklou ka tile pelengon Grik itau aitno lisak mter langka pelengon leklou dong ke ves ane. Pelengon tonari langane. E Sailas aitno mter ma iye dau dong ke Antiok. 35Ari Pol orwo Barnabas dau tidong ke Antiok deka tigosok osep pula tiparere osep e tinapapra Ida Puda ila pelengon.

Pol e Barnabas tidardar pulu

36Pol e Barnabas dau tidong ari e mase isuk boto Pol wai ke Barnabas langane. “Ma itabauluk itala ke armok keniye ka oglou itanapapra Ida Puda ila pelengon ine ma itavati sudo e iteile omur ke isak.” 37Pol wai langane deka Barnabas wai ke iye langane. “Ngawaiki itodue Jon ka angaine silang Mak itogosok itabauluk itala.” 38E Pol koli wai langane. “Aurou. Iye ma gosok ite itala kovok kesua oglou alo ka itoboko ke omur Pamfilia iye songon ite.” 39Aitno lisak engil pulu ine e tikot pulu deka tidardar pulu. E Barnabas due Mak e isak orwo tidue sip e isak kla ke aidunu Saiprus. 40E Pol rere Sailas ma isak orwo kla. Deka sisrok ari tiwai ke isak langane. “Ida Puda ila makaingan dong kap umu.” Deka tisongon armok e kla. 41E Pol lila ke provins Siria e provins Silisia e ke omur orwo tonari iye kar pelengon ke Ida Tapolngon ila osep ka due aitno lisak tidong dagar lokono.

Currently Selected:

Aposel 15: ANT

Highlight

Copy