Aposel 1

Yesus wai ma iye pagei Ano Itau me

1Ate. Oglou ngasogo buk kene uti ke wom Tiofilus. Buk ka ngasogoe kodong la ke Yesus ila bokongon e ila parerengen. 2Ke mgongon alo ka iye me mgo iding ke oklou ka iye bauluk tito ke omur heven. Ke oklou ka iye tito ke omur heven Ano Itau due Yesus aitno ma iye kar ila pelengon ke osep ka oglou iye rere isak ila aposel. 3Oglou osep epmes ina tidue agegeng ke iye e timluk iye ma iye mete. Timluk iye ma iye mete deka iye munu ke ina denga mase iye poga tito ke ina denga. Alo ka iye dau dong ke taklak iye polou ke ila aposel amtarsak deka tivati ila elio isuk isuk e tile omur iye mole metengen e iye dong blang. E iye parere isak ke alo ka mase Ida Tapolngon ma plau omur ka pula keniye. Iye dong ke taklak oklou isapanal. 4Alo ka iye dau dong kap ila aposel oklou gesa tiduni pulu e iye wai ke isak langane. “Oku ane umosongon armok Jerusalem ko-vok. Umodong itau ine e umapara ke Pmada ila promis ka oglou ngapalongo lumu ine. Deka eknik-ane umodong ke Jerusalem e umapara ke Ano Itau. 5Oglou Jon me deka iye paunim osep ke aki. E eknikane dau tauni kovok ma Ano Itau duru me dong ke aitno lumu.”

6Mase ke oklou kene iye gosok ila disaipel tiduni pulu. Deka tipmi iye langane. “Ipem Puda eknikane ma wom mgo amplau imi langka oglou Devit plau imi osep Israel ina ma imomole ipem oul keniye koke aurou?” 7Deka iye koli wai ke isak langane. “Oglou kodong Livou didi aitno deka rere wan bitna bitna keniye ka ma tipolou ke lesen ma tipolou. Iye tona ile ine e umeile ine kovok. Deka aitno lumu kro ke lesen ma wan bitna bitna tipolou kovok. 8E umoklingen lou pelengon langane. Mase ma Ano Itau duru deka dong ke aitno lumu e ma iye kar ila arit ke umu deka ma lua umu ine. Deka ma umanapapra ngau basikngen ke osep ka tidong ke armok Jerusalem e omur Judia e omur Samaria. Deka ma umala ke omur ka pula keniye ke taklak e umanapapra ngau basikngen ke osep pula.”

Yesus tito la ke omur heven

(Mak 16.19-20 e Luk 24.50-53)

9Yesus wai ila pelengon ke ila disaipel yagos deka Ida Tapolngon ila arit due Yesus tito la egim e ila disaipel tivati iye tito la sep ke gaup ka mana egim. Deka gaup tonari dim iye e tivati iye kovok. 10Osep tonari amtarsak dau tinekek dagar ke omur ka Yesus sepe deka lokono osep orwo ka urok klos okou lokono tipolou ke isak e tivri ke galna lisak. 11Deka osep orwo tonari tiwai ke isak langane. “Umu ka osep Galili ina ina lange omtomu dau tinekek dagar ke omur ka Yesus sepe? Eriar langka eknikane umavati Yesus tito la ke omur heven mase ma iye iding me blang.”

Gute Matias kasip Judas amune

12Tiklingen osep orwo urok pelengon yagos deka tiduru ke gigri Oliv e tibauluk ke Jerusalem. E Jerusalem dong olwo boto ke gigri Oliv langka kilomita kene. 13-14Osep aposel tipolou ke Jerusalem deka tidong ke ninu gesa ina eliang ka dong egim. Tidong ine deka tiwai itau ke Ida Tapolngon oklou aling aling kesua aitno lisak kene ke iye. Osep ka tidong ine angainsak langane. Pita e Jon e Jems e Andru e Filip e Tomas e Bartolomyu e Matyu e Alfius otno arang Jems e Saimon ka Selot ina deka Jems silang blang otno arang Judas. E Yesus tna Maria e ina saiver tigosok apmang leklou blang tidong kap osep tonari.

15Alo ari Pita vri airavu ke osep ka tiduni pulu ke ninu tonari. Osep tonari inarak sasa langka 120. 16Deka Pita wai ke isak langane. “Sipmi. Umoklingen lou pelengon ane. Oglou Ano Itau due Devit aitno deka iye sogo ke Judas ila elio ma iye due ke Yesus. Mase Yesus dong deka Judas la mgo ke osep e iye lai Yesus ina eriar langka oglou Devit sogo ine. 17Oglou Yesus ila disaipel ite e Judas. E Judas lila boko kap ite. 18Mase iye waiki lai Yesus ina deka osep loulou ina tikli iye ine. Deka iye due ila mani ka ila elio soulu ina klingen deka kli taklak gesa ine. Iye klie deka mase gene duru ine deka pele nabak e mogolu ine polou. 19Osep Jerusalem ina tile elio ka polou ke Judas deka tisir omur tonari omur Akeldama. Angaine Akeldama lana ine omur ka marau ina. 20Oglou Ano Itau due Devit aitno deka iye sogo pelengon ka itesire Buk Song ila pelengon palma ka lana ine la ke Judas ila elio. Devit sogo langane.

‘Ina taklak tonari ma dong adai vala. E ma gute silang dong ine kovok.’

“E sogongon silang wai ma gute silang kasip amune deka ma due ila bokongon. 21Deka ma iterere gute kene ma kasip Judas amune. Ma iterere gute ka iye lila kap ite blang ke oglou alo ka itogosok Ida Puda Yesus itelila me ke oku ane. 22Ma iterere gute ka oglou iye dong kap ite ke alo ka Jon paunim Yesus lila me ke oklou ka iye tito la egim. Ma iterere gute kene ka vati Yesus ila bokongon batne la gurno. Deka ma iye lua ite ke udo bokongon. E ma itogosok itaparere osep pula ke elio ka Yesus mole metengen deka poga tito ke ina denga.”

23Pita wai langane yagos deka tirere osep orwo ma gute kene ke isak kasip Judas amune. Tirere gute kene ka angaine Josep ka tisir iye Barsabas e angaine silang blang Jastus. E tirere gute silang ka angaine Matias. 24-25Deka tiwai itau ke Ida Tapolngon ine langane. “Ipem Puda emile osep ka pula keniye aitno lisak. Eknikane emnis imi ke gute ka emrere ma iye kasip Judas amune. Emnis imi ine deka ma iye polou aposel gesa deka ma iye boko ine. Oglou Judas songon ila bokongon ka amwaiki iye due deka iye la ke ila omur.” 26Deka tiuri opmu orwo ka angainsak dong ine ma tile Ida Tapolngon aitno. E nisngen tonari la ke Matias. Deka tile omur ke gute ka Ida Tapolngon waiki ma kasip Judas amune. Deka iye neklep ke osep aposel songotno kene deka iye boko kap isak.

Currently Selected:

Aposel 1: ANT

Highlight

Copy