Marko 2

1Akaingiawa ghati ya Kapernaum kutera kwa misi ila, ikasikiwa ti eoho nyumbeni. 2Chwi wakawunganyika weingi, mtano tehenawa handu nete msongorana wa mbenge, akawawurra kiteto. 3Wakaza hakwe wamwetie mwenye kuwia, ekitikwa ni wanne; 4nete teweidima kumsongeria hena matorano. Wakajughua guu eoho, wakatumbura wakaseja wui ekiyeie mwenye kuwia. 5Yesu ekiwona kuitikija kwawo akamburra mwenye kuwia, Mwana wangu, kutekwa kwako kuwushijwa. 6Weokie uko watami weikee si, wekikusara ngoroni, 7Nikini uu eteta huwo uwiwi? Niani eidima kuwushija kutekwa nde mwe, niye Izuwa? 8Chwi Yesu ekitisiwa ngoroni hakwe ti awa wekusara huwo ndeni hawo, akawawurra, Nikini mukusara ama ngoroni henyu? 9Nikihi kianguhe, kumburra mwenye kuwia, Kutekwa kwako kuwushijwa, kana ndekuteta, wuka, Wushija wui wako, utonge? 10Mbone kutisiwa ti Mwana wa Adamu ena zinya masangeni kuwushija matekwa, (amburra mwenye kuwia), 11Nakuwurra, wuka, wushija wui wako, utonge hako nyumbeni hako. 12Akawuka chwi, akawushija wui wakwe, akafuma msongorana wawo wose, mtano wakarighiwa wose, wakamwisisa Izuwa, wekihamba, Totumewona sa huwo pia.

13Akafumawa mbai ya ndiwa, matorano mose makaza hakwe, akawalosha.

14Mtano ekivetia akambona Lawi wa Alfayo eikee si forthani, akamburra, Niratere. 15Akaimuka akamratera. Ikaoka ghati ya kuikaa mezeni nyumbeni hakwe, mapublikano weingi na wenye kutekwa weoho weikee hamwe na Yesu na waanalosha wakwe, amu weokie weingi, wakamratera. 16Nao watama na Mafarisayo wekimbona ekila hamwe nawo mapublikano na wenye kukekwa, wakawawurra waanalosha wakwe, Nikini iki? ela na enywa hamwe na mapublikano na wenye kutekwa? 17Mtano ekisikia Yesu, akawawurra, Wenye zinya teweendawo mughanga, nde wala wewadjua; sizie kuwaitanga wedi nde wala watekwa hena kuchwa‐muti.

18Wakaoka waanalosha wa Yohana na wa Mafarisayo wekichunga; wakaza wakamburra, Nikini waanalosha wa Yohana na wa Mafarisayo wachunga, nde wako tewechunga? 19Akawawurra Yesu, Teweidima waana wa ngasu kuchunga, mwenye ngasu ekioka nawo. Magheri mala wekioka naye mwenye ngasu hawo, teweidima kuchunga. 20Misi ineza, mwenye ngasu eneikawushijwe hawo, niho wenechunga misi ila. 21Tehena mundu efuma kidame cha suke sha wanga ya suke isakae, amu ila sha iizuje iwushija ghati ya ila isakae, nayo ineta kubajika. 22Nete tehena mundu egera mawa masha ghati ya vikuchu visakae, mawa masha mesibaje vikuchu, mawa mesiitike, nete vikuchu visiputuke. Kake mawa masha megerwa ghati ya vikuchu visha.

23Ikaoka ekiwetia musi wa sabato ghati ya miteme wakawoka waanalosha wakwe wekitonga kubughutua masuke. 24Mafarisayo wakamburra, Yoa, nikini weareha isiwe musi wa sabato? 25Akawawurra, Tomusomie sandu earehie Daud, ekinawone ukiwa, akasikia nzaa, yee nawo hamwe naye? 26Sandu eingie ghati ya nyumba ya Izuwa, ekioka Abiathar mkohani mbaha, wakala mabumunda ma kuwondja, isiwe kula, nde hena wakohani, akawainga wala weoho hamwe naye? 27Akawawurra, Sabato yaoka hena lwa mundu, nete si mundu hena lwa sabato. 28Amu ii Mwana wa Adamu ni Mzuri mtano wa sabato.

Currently Selected:

Marko 2: TAVETA

Highlight

Copy