Mattayo 6
6
1Yoeni musikete ngalo yenyu msongorana wa wandu, nesa kuwonwa nawo; amu mukaketa huwo tomuwona wuzuri hena Waweo wenyu eoho wanga.
2Huwo ukiareha itasi usigere ngalala msongorana wako sa wawiwi ha masunagogi na nzieni, wawone nganyi hena wandu. Kididi namburra, waidiwa kuwona wuzuri wawo.
3Kake we ukiareha itasi lako, mkono wako wa kumoso usitisiwe mkono wa kuume ukiareha:
4Nesa itasi lako lioke la mbiso, naye Waweo ewona hena mbiso enekuinga wuzuri hena raa.
5Na unywi mukiomba, musioke sa wakeleki, amu wekundie kuimuka kuomba ghati ya masunagogi na mbai ya nzia, nesa wawonwe ni wandu. Kididi namburra, Waidiwa uwona wuzuri wawo.
6Kake we ukiomba, uingie na wojiwo wako wa ndeni, na ukiidiwa kufinga luwi, umwombe Waweo eoho hena mbiso; na Waweo ewona hena mbiso enekuinga wuzuri.
7Na mukiomba, musitete viteto tiki, sa wandu wa mbare; amu weghamba wenesikiwa hena viteto vyawo kuoka viingi.
8Musifwanane na awa, amu Waweo wenyu etisiwe vindu muvikundie magheri musimemwomba.
9Amu ii unywi ombeni huwu, Apa wetu uoho wanga, izina lako lirume:
10Ufumwa wako uze: wundu ukundie kiketike masangeni, sandu kiketika wanga:
11Utuinge yoo kidjo chetu hena musi:
12Utushighie sile jetu, sandu na uswi twawashighia wala weawa ni uswi:
13Usitugere kugheshwa, kake utukije kiwiwini.
14Amu kwakicha muwashighia wandu matekwa mawo, naye Waweo wenyu wa wanga enemshighia unywi:
15Kake kwakicha tomuwashighia wandu matekwa mawo, nete Waweo wenyu tenemshighia matekwa menyu.
16Mkachungawa, msioke, sa wakeleki, wa wusho wa wukiwa, amu wenyamara wusho wawo, nesa wawonwe ni wandu ti wechunga: kididi namburra, Waidiwa kuwona wuzuri wawo.
17Kake we, ukachunga, ukuwire mafuta mtwini, ukuoje wusho;
18Nesa usiwonwe ni wandu ukichunga, nde ni Waweo eoho hena mbiso: na Waweo ewona hena mbiso enekuinga wuzuri.
19Musikuwikie mali masangeni, inyamarikaho ni ndondoghoro na ngeu, na wahiwi weforaho na kuhiwa;
20Kake kuwikieni mali wanga, isinyamarikaho ni ndondoghoro nete ngeu, nete wahiwi tewefora nete tewehiwa:
21Amu handu ioho mali yenyu, na ngoro yenyu ineoka ukowa.
22Taa ya muri ni ijiso; ijiso lako likioka imwe, muri wako wose waizua kiangaji:
23Kake ijiso lako likioka iwiwi, muri wako wose waizua kija. Kiangaji kioho ndeni hako kikioka kija, kija kihi kibaha?
24Teidima mundu kuwatumikia wazuri weri, amu enemshishira mwe ekimkunda wa keri; kana enemgura mwe ekimdaa wa keri. Tomuidima kuwatumikia Izuwa na mamona.
25Amu ii namburra, Musikurisha wukiwa hena kukia kwenyu, munela kini, kana munenywa kini; nete hena muri wenyu, munedoka kini? Si kukia kubaha kukela kidjo, na muri kukela suke?
26Yoeni ndeghe ja wanga, ti tejihandajo, nete tejifindikajo, nete tejigerajo kilaloni; kake Waweo wenyu wa wanga ejirisha jila: Unywi tomujikelie jila?
27Niani wenyu hena kukurisha wukiwa eidima kukunetijia weeza wakwe hena mkono mwe?
28Na nikini mukurisha wukiwa hena suke? Kumbukeni viwaro vya mbuwa, sandu vimea, tevihira ndima nete teviiwita:
29Kake namburra, nete Sulemani ghati ya ubaha wakwe wose tedokie sa kimwe chawo.
30Amu Izuwa ekimadoka huwo mani ma mtemeni, meoho yoo, na yawo metaghwa motoni, tenetaye kumdoka unywi, unywi wa luitikijo ludongo?
31Amu ii musikurisha wukiwa mkiteta, Tunela kini? kana, tunywa kini? kana, tunedoka kini?
32Amu vindu ivi vyose Mbare wevikundie; amu Waweo wenyu wa wanga etisiwe ti muvienda ivi vyose:
33Endeni ini ufumwa wa Izuwa na ngalo yakwe, na ivi vyose muneetiwe.
34Amu ii musikurisha wukiwa hena yawo, amu yawo ina wukiwa wakwe mwenye. Mafika hena musi mawiwi makwe.
Currently Selected:
Mattayo 6: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
