Kufuma 13

1Mzuri akamburra Musa, ekiteta. 2Unishenetijie wa mbele wose, chose chajughua ndeni ghati ya waana wa Israeli, cha mundu na cha nyama: ni changu.

3Musa akawawurra wandu, Kumbukeni musi uu, ghati yakwe mwafuma na Misri, kufuma nyumba ya uzoro; amu hena zinya ya mkono Mzuri emung’olie kufuma handu aha: mesiliwe mabumunda mafushwa. 4Yoo mufumaho mweji wa Abib. 5Ineoka Mzuri akamuete mtano isanga la Wakanaani, na Wahiti, na Waamori, na Wahiwi, na Wayebusi, ekurarie hena wawaweeo wenyu akuinge, isanga liizue mavee na @oke, muuhire mhiro uu mweji uu. 6Misi mifungate munela visigeriwe kifusha musi wa kafungate musi mbaha hena Mzuri. 7Visigeriwe kifusha viliwe misi mifungate, kisiwonwe hako kigeriwe kifusha, kisiwonwe kifusha hena mihaka yako yose.

8Umtindia mwana wako musi ula mukiteta, Amu ya vindu eviarehie Mzuri nikifuma hena Misri. 9Ineoka sa luwano mkononi hako, na lukumbusho hena meso mako, iwone kuoka aghanyo la Mzuri itumbuni hako, amu hena mukono uduwie Mzuri akakung’ola ghati ya Misri. 10Gura aghanyo ili hena magheri makwe mwaka hena mwaka.

11Ineoka Mzuri eneikaakuete mtano isanga la Wakanaani sandu ekurarie we na wawawee wenyu, na enekuinga, 12Ti unemvetijia Mzuri chose chajughua ndeni, na wa mbele ose wa nyama una, wa kiume weneoka wa Mzuri. 13Na wa mbele ose wa njoe unemkombola na kaghonji; na usamkombole, niho unembaa singo: na wa mbele ose wa mundu unemkombola. 14Na ineoka mwana wako eneikaekuwujanya magheri ma akenya, ekiteta, Nikini iki? unemburra, Hena zinya ya mkono Mzuri etungolie ghati ya Misri, kufuma nyumba ya wuzoro. 15Mtano ikaoka Farao ekinakete ukaehe asitushighe, Mzuri akamko@a wa mbele ose ghati ya isa nga la Misri, wa mbele wa wandu na wa mbele wa nyama; amu ii namng’olia Mzuri ose ejughua ndeni ekioka wa kuume, na wa mbele ose wa waana wangu namkombola. 16Nakyo kineoka hena @luwano mkononi hako na hena uwedi ghati ya meso mako; amu hena luidimo lwa mkono Mzuri etung’olie ghati ya Misri.

17Ikaoka Farao ekinawashighirie wandu, ti Izuwa tewatikie hena nzia ya isanga la Wafilisti, niyo afuhi: amu Izuwa etetie, wandu wasichwe‐muti wekiwona ngondo, na wahunduke na Misri. 18Kake Izuwa ewajungulishie wandu, hena nzia ya shighati ya bahari ya Sham: waana wa Israeli wakakwea kufuma Misri wekitika nareta. 19Musa akatika naye mawindi makwe Yusuf: amu ewararije muno waana wa Israeli, ekiteta, Kididi Izuwa enemughenja; mukweje mawindi mangu kufuma aha hamwe na unywi.

20Wakawuka Sukkoti, wakatua hena Etami, hena kuidiwika kwa shighati. 21Akatonga Mzuri msongorana wawo hemusi hena ngujo ya ijumbi, kuwarongoria nzia, na kio hena ngujo ya moto kuwalimikia; watonge hemusi na kio. 22Tawushija ngujo ya ijumbi hemusi, nete ngujo ya moto kio, msongorana wa wandu.

Currently Selected:

Kufuma 13: TAVETA

Highlight

Copy