Matthew 14
14
John Baptist apape hari
1La hoa Herod amua haela Iesu ve hari veveke iapape: 2Are areve uvi haela mari maeaeape, Ma va John Baptist la, are api kai uroupe haela la, laelave horova aheke oaria are ve hihika leilula. 3Ehovea Herod John mai pae hahai uvi muru le aipepe, ehovea areve apoheari Philip ve uva Herodias v'ila. 4Ehovea John arero maeape, A arero laeakive pupu ila. 5Are va ikivere leipe arero harive la hoa are haela oaria oaoka leipe, ehovea ere arero peroveta hovea kelavape. 6Ere Herod ve epape hare hurai leipe la hoa Herodias ve mari Herod oropa ve mahea harape, kai Herod ikiveveke leipe. 7Ehoveala are okoare o heaha ila maeape, are velavela leiki la eharu avara hiki. 8Are lou ve oharo overa iapape, laelave are maria maeape, John Baptist ve haro haita aivaopi avikiaraki. 9Amua ikihuru leipe, aka haroapo ehovea areve okoare overa, ae va are ila hareho eapai avai lalavahaeape la haela, are la eharu arero avarakive maeape. 10Are haela paraea uvi muru ureve John ve haro haerapape. 11Ere areve haro haita ve aivaopi aviki la mari le avarape. Are areve lou la avarape. 12Areve kilea haela ekevahaeape, kai areve maea kaivi koru le ihape. Ere hoahuka ma oharo Iesu la maeape.
5,000 haela eapai aiarape
13Iesu la oharo iapai vevaea horeai la ita le harepape, kai ita merava le pekape. Haela oaria laria iapape ere karikara harepai areve loa huru kai auvahaeape. 14Iesu mea hoai haela lakea eavape. Are erero ikiheheroe eapapo leivahaeape. Are ereve maea heahaha haela oaria lei makukuripe. 15Hailaea, mea murumuru leipe hoa, areve kilea haela arero kai iki maria maeape, Maia ita hauaka, hare karia leilai, ma haela paparaehai ere k'aula karikara lahua lahua elare eapai ilaea leikive. 16Iesu erero mari maeaeape, Ere auvahaea va ka — e havahu ve oki erero eapai here aiaraki. 17Ere arero kavale maeape, Ela va maia pai hue ila, ekaka orahokaila hiki. 18Are maeaeape, Hoa aikeila. 19Are haela oaria hohe akea ve avavahaeakive maeaeape: Are pai hue ila ekaka orahokaila ila kaili, ovohae kaia ve iupe, ivaiva lei pai haivavaela kilea haela ra aiarape. Kilea haela la haela oaria la aiarape. 20Ere oaria lalavahaeape, eharau le mohoavape. Ere eapai hohoe hara 12 ila heheloekoavi kaili auvahaeape. 21Eapai lalavahaeape haela 5,000, uavila i akoremari ila kepea kara.
Iesu ahea ma akea ve loa veavelaripe
22La hoa Iesu kilea haela vevaea horeaki ve maeaeape, ukai oropa elahukakive, are ve aire: are lahua haela oaria elare ita paparaehape. 23Are haela oaria oropa paparaehai aire are lahua ivaiva arive kela pekape. Hailaea, mea murumuru i are lahua aeape. 24Vevaea la hoa ma hihi ve murai veape, marukaumarukau avelaripe, ehovea mea heaha. 25Oroa hoa, mea opa ka, Iesu erero kai horerape, ma akea ve. 26Kilea haela arero ma akea ve veavila eavape iki ihahai maria maeape: Maia haelaharihu la. Ere oaoka lei āra hape. 27Iesu erero elavelave maeaeape, Ikiveveke leila, ara mae: Oaoka kalaivahaelue.
28Peter arero kavale mari maeape, Amua e, a iele la leikilava, araro kimaeaki, ara kara ma akea aro kai aukive. 29Are va arero maeape, Kihoau! Peter vevaea ve hoai ma akea ve Iesu kai aupe. 30Are mea eapapo ra kekelape la hoa are oaoka lei ma ihauki maia iele: Are āra hape maria, Amua, iki araro hukapaki. 31Iesu elavelave mai horavai paeape kai mari maeape, Ave ikikekela hekai iele: A va ikihorahora ehovealeve? 32Ere vevaea horeape la hoa mea le haerapape. 33Vevaea ureve haela iki areve rare morapaeape maria, O iele havahu, A Aualari ve Akore havahu.
34Ere ukai elahuka Genesaret ita pekahavape. 35La ita haela areve ekeki hari iapape la hoa ere karikara lahua lahua oaria oharo paraeai maea heahaha haela oaria arero kai kari ekekive.
36Ere arero here leipe, ere areve pura kao hiki paeakive. Paeape la haela oaria maea mekaka leivahaeape.
Currently Selected:
Matthew 14: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
