John 8

Airi pavora leipe uamari

1Iesu Olivet kela pekape. 2Vevelare havahu are Hehe Uvi pekape. Haela oaria areve leia; are haiavi erero kileavahaeape. 3Hohoa haealula haela i Pharisee haela ila areve leia airi pavora mai leipe uamari lai ekepe. Ere arero aru hihi la aepape. 4Ere arero kai maeape. Ma uamari haela airi pavora mai leivila eavi paeape. 5Moses ve pupu le aeave, Maria uamari have koa harive. Ave oharo learia ha? 6Ere arero ma oharo v'ila arero au amuraeape, ehovea ere va ikivere arero au hahakive. Iesu ekaopi mai lekoka kekele ve hohoa hape. 7Ere arero aeka velavela leivahaeape la hoa are ovohae iupei maria maeape — E ka mai haeae karia la haela, are arero have koaki. 8Are kai ekaopi hohoa kekele ve hape. 9Ere la oharo iapai oaria haroapoharoapo le loape, haela hoaha oropa, haela are aireaki aiai Iesu hiki le pavape — la uamari aru hihi ve epavape. 10Iesu urai uamari mari maeape, Uamari — ere lahoa ha? Haela aro oharo au hahakue ha? 11Are arero maeape, Haelapo — haela karia. Iesu mariape, Ara kara aro haha va ka — elare ita aula — aireaki mai heaha kalailue.

Meahaiapo ve Ovava

12Iesu oharo kai erero maeaeape, Ara va meahaiapo ve ovava — arave airekai ekeki la haela muru hoa loa vea va ka, aka ovokake ve ovava avakilai. 13Pharisee haela arero maeape, A va a havahu v'ila vavavavila — ave vavavaki oharo iele ka. 14Iesu erero kavale maeaeape, Ara ara havahu v'ila la vavavakilava, arave vavavaki oharo va iele; ehovea ara ekepe la oki kai auki la okiharo ara ore. Aka e va ara i ekepe la ita haveva, ara aukilai la ita kara. 15Eva aivau v'ila heheavalula — ara haela heheava va ka. 16Kaire, ara la heheavakilava, arave heheavaki mai va iele, ehovea ara lahua aea va ka, ara araro kiparaeape la Oa i hareho aeavila. 17Kaire; eve pupu oharo maria hape, Haela orahokaila ve vavavaki oharo va iele. 18Ara ara v'ila vavavaivila la haela, araro kiparaeape la Oa ara v'ila vavavaivila. 19Ere arero maeape, Ave Oa lahoa? Iesu kavale maeaeape, Eva araro haveva — e arave Oa kara haveva. Eva araro ore araikilava, e arave Oa kara ore le araiki. 20Are erero ma oharo moni korukaiaki la ita ve maeaeape — Are Hehe Uvi ureve kileape la hoa — haela ae arero au paeaila — ehovea areve hoa are, au kihoreraila.

Aireaki kihoreraki heaha oharo

21Are erero kai maeaeape, Ara va ita lahua aukilai — e va araro haropi apeapea elarelare mai heaha v'ila apihae ka leikilai. Ara va aukilai la ita e auvahaea va ka. 22Laelave Jew haela maeape, Are elare maea harilai, ehovea are maria laila, Ara v'aukilai la ita e auvahaea va ka. 23Are erero maeaeape, Eva ipi ve haela, ara va akea ve — eva meahaiapo ve, ara va ma meahaiapo ve ka. 24Laelave ara ero lamaeaila, Eva eve mai heaha v'ila apihae ka leivahaeakilai. Eva araro Messiah rare iele kelevaki aue la leikilava, e va eve mai heaha v'ila apihae ka leivahaeakilai. 25Ere arero maeape, A va leita ha? Are erero kavale maeaeape, Hoveahovea ara ero avare koare hoa maeaeape la oharo. 26Ara e v'ila hukavi kai kileaki oharo oaria le apearo. Lae vi va, araro kiparaeape la haela va iele. Ara are v'ila iapape la oharo oaria ara meahaiapo kileakilai: 27Ere haveva are erero Oa ve oharo maeaeape. 28Laelave Iesu erero maeaeape, E va haela ve Akore urapaki la hoa, e va ore leikilai are va ara ma — aeva ara ara havahu v'ila horova lei va ka, aka Oa araro kileape la oharo ara hukavavila. 29Araro kiparaeape la haela ara i hareho aeavila. Are araro lahua au hakorepaila — ehovea mea oaria are ikivere leivahaevila la eharu ara leivila. 30Are ma oharo maila haela perehekai oaria arero ikikelavape.

Jew haela ila o hahari

31Laelave Iesu areve oharo iapavahaeape la Jew haela oaria maeaeape, E va arave oharo v'ila la apeakilava e va arave kileavahaevila haela iele. 32E oharo iele ore leivahaeakilai — la oharo iele ero ovokake ila paparaehakilai. 33Ere arero kavale maeaeape, Ela va Abraham ve meavohula — haela ae elaro au hahaila. Laelave a va learia ave, Ero ovokake ila paparaehakilai?

34Iesu erero kavale maeaeape, Mai heahaha leilula haela ere va mai heaha ve horova v'ila au hahaiape haela. 35Au hahape la haela are uvi mea oaria aea va ka — akore mea oaria aeavila. 36Laelave, Akore ero ovokake ila la paparaehakilava, e va ovokake iele havahu leivahaeakilai. 37Ara v'ore e va Abraham ve meavohula, ehovea arave oharo eve ureve auhohi araea va ka. 38Ara Oa i hareho eavape la eharu ara maeaevila. E kara e va oa ila eavape la eharu e leivahaeakilai.

39Ere arero kavale maeape, Ela va Abraham ve meavohula. Iesu erero maeaeape, Eva Abraham ve akoremari iele va laila, e va Abraham la horova overa la araivahaeaki. 40Aka e va ma hoa araro harive ikivere. Aualari ve iapape la o iele ero maeaeape haela ma. Abraham maria au leila. 41E va eve oa ve horova leivahaea va ka. Ere arero maeape, Ela va airi pavora mai ve au eraila. Ela ka Oa haroapo, Aualari la. 42Iesu erero maeaeape, Aualari eve Oa iele araikilava, e va araro ikiheroe le araiki. Ehovea ara Aualari ve leia ve la kihoaupe. Ara ara havahu v'ila au ekeila — are araro kiparaeape. 43Ehovealeve e arave kilea oharo auhohi kelava va ka? Iele, ehovea e arave oharo kara iapa va ka. 44Eve oa va haelaharihu la. Aeka eve oa ve mai heahaha e ikivere leivahaelula. Are overa haela haeaveape haela. Are mai iele ikivere au leila, ehovea oharo iele areve ureve karia. Are opore oharo maeaki la hoa are are havahu v'ila arilai, ehovea are opore haela: Are kara opore haela ve oa. 45Aka ehovea ara o iele la maeavila, e araro kelava va ka. 46Eva leita haela araro haeae ve hahakilai ha? Ara va o iele la maeakilava, ehovealeve e araro iki kelava va ka? 47Aualari ve la haela are Aualari ve oharo iapaivila. Laelave e la oharo iapa va ka, ehovea e va Aualari ve haela ka.

48Jew haela arero kavale maeape, Elava oharo iele maeaive — A ka Samaria haela, a va ovehahu ila? 49Iesu erero kavale maeaeape, Ara va ovehahu ila va ka: ara arave Oa morapaeavila, e va arave rare heaha arula. 50Aka ara elare morapa eaki ikivere va ka. Haropi kai heheavaki haela le aeave. 51O iele havahu ara ero maeaeaive — haela arave oharo iapai kiva la leikilava, are apaki hoa eava va ka. 52Jew haela arero maeape, Mahau ela va ore — a va ovehahu ila. Abraham i peroveta haela ila le apihaeape — aka a maria lailava, Haela arave oharo iapai kiva la leikilava, are apaki hoa ore lei va ka. 53A va akea ve ha, elave oa Abraham i apihaeape la peroveta haela kara, ere oaria ipi ve ha? A va a havahu ve leita rare avila ha? 54Iesu kavale maeaeape, Ara elare rare la morapaeakilava, ara iele va ka; arave Oa araro morapaeavila — e are v'ila arula are eve Aualari — eva arero ore au leila. 55Aka ara arero ore. Ara maria la aikilava ara arero ore va ka, ara ka e hovea le leikilai, opore le arilai: aka ara arero ore, areve oharo kara ara iapai leivahaevila. 56Eve oa Abraham arave hoa eavakive ikiveveke leipe. Are eavi ikiveveke le leipe. 57Laelave Jew haela arero maeape, A va hitolo 50 hoa, āre iele. A va Abraham eavape ha? 58Iesu erero maeaeape, O iele havahu, ara ero maeaeaive — Abraham va aireaki, ara va oropa aeaveape. 59Ere have papaehaupe ehovea arero koavakive, aka Iesu muruhari ai Hehe Uvi ve le hoaupe.

Currently Selected:

John 8: ORO

Highlight

Copy