John 17

Iesu ve Ivaiva

1Iesu ma oharo maeai ovohae kaia ve iupei maria maeape Oa! Hoa havahu ma! Ave Akore morapaeaki — ave akore kara aro morapaeakilai. 2A va arero aivau oaria akea ve aheke la avarape, ehovea a arero aiarape la haela oaria are ovokake haiapo avarakilai. 3Ovokake haiapo maria Aualari iele haroapo la i Iesu Keriso, a kiparaeape la haela ila, ere ore leivahaeakilai. 4Ara aro meahaiapo ve morapaeape, a araro avikiarape la horova kari le leipe. 5Oa e, a mahau a i hareho araro morapaeakive, elavaila avare koai meahaiapo aue hoa aeape la haharika v'ila.

6A araro meahaiapo ve aikiarape la haela ara ave rare kileape. Ere va ave haela, a erero araro aikiarape: ere arave oharo iapai kiva auhohi leivahaeape. 7Mahau ere va ore a araro aikiarape la eharu oaria v'ila kihoahukape. 8Ehovea a araro aikiarape la oharo oaria ara erero aiarape. Ere erero avape: ere kai ore leipe ara a v'ila kihoaupe: ere kara ikikelavape a araro kiparaeape. 9Ara ere v'ila ivaiva leive. Ara meahaiapo v'ila ivaiva lei va ka, a araro aikiarape la haela v'ila hiki ara ivaiva leive. Ehovea ere ave haela. 10Arave eharu va ave eharu hoveahovea: ave eharu kara arave eharu: ara ere v'ila lei morapaeavila. 11Ara ma hoa meahaiapo aea va ka — ere meahaiapo apealula: ara ave leia pekakilai. Oa, Hehe Iele, a araro aikiarape la haela ave rare v'ila kiva hela leivahaeaki — ere va haroapo hovea leikilai, elavaila haroapo laria. 12Ara ere i hareho aeape la hoa a araro aikiarape la haela ara ave rare v'ila kiva leivahaeape — ara erero kiva auhohi leivahaeape, laelave ere va haela oaria heaha au leila, haroapo hiki, la havoavaki akore la, ehovea buka hape la ohare iele leikilai. 13Ara mahau ave leia pekakilai. Ara va ma eharu meahaiapo kileavahaeavila, ere oaria arave la ikiveveke hareho avakilai. 14Ara ave oharo erero aiarape — meahaiapo erero ikiheaha leivahaeape ehovea ere meahaiapo v'ila ka, hoveahovea ara kara meahaiapo v'ila ka. 15Ara aro velavela lei va ka, ehovea erero meahaiapo ve hareavakive, aka ehovea a va erero haelaharihu ve oki ve hareavakive. 16Ere meahaiapo v'ila ka, hoveahovea, ara kara meahaiapo v'ila ka. 17Ave o iele v'ila erero hehe leikive — ave oharo iele la. 18A va araro meahaiapo ve kiparaeape — ara erero meahaiapo ve laria paparaehakilai. 19Ara ere v'ila araro hehe leikilai, ere kara o iele v'ila lei hehe leivahaeakilai.

20Ara ere v'ila hiki ivaiva lei va ka. Ara ereve oharo v'ila iapavahaeaki la haela oaria. 21Ehovea ere oaria haroapo hovea leivahaeakilai. Hoveahovea, Oa e, a va arave ureve aeavila, ara kara ave ureve aeavila, ere kara elavaila ve ureve apeakilai: laelave meahaiapo iki kekelakilai, a araro kiparaeape. 22A araro avikiarape la haharika ara erero avarape, ehovea ere haroapo leikilai, hovea hovea elavaila va haroapo. 23Ara va ereve ureve, ere va arave ureve, erero oaria haroapo ureve mekakure leikilai; meahaiapo laria ore leikilai a araro kiparaeape, aeva hoveahovea a araro ikivere leivila, a kara erero ikivere leivahaeape. 24Oa e, a araro aikiarape la eharu oaria ara va ikivere ara aeavila la ita ere kara apeakilai: laria a araro avikiarape la haharika ere eavakilai: ehovea a va araro meahaiapo avare koai leipe la hoa a va araro ikiheroe oropa leipe. 25Mai ehoe Oa e, meahaiapo aro ore au leila, aka ara aro ore leipe; ma haela ore leipe a va araro kiparaeape. 26Ara ave rare erero hihika kileape, kai aeka kileakilai — ehovea a araro leipe la ikiheroe ereve ureve aeakilai, ara kara ereve ureve aeakilai.

Currently Selected:

John 17: ORO

Highlight

Copy