John 10

Mamoe kiva haela veveke

1Iele havahu, ara ero maeaeaive mamoe ve kara okiape havahu ve hoauki aue, kara ikupa muruhari hareauki la haela, are va opore korea haela va la. 2Aka okiape havahu hoauki la haela are va mamoe kiva haela iele. 3Okiape kiva haela are v'ila okiape la hapakilai, mamoe areve āra iapakilai. Are elare mamoe ereve rare la itavi kari hoaukilai. 4Are elare mamoe kari hoai ereve oropa aukilai — ere kara areve aire auvahaeakilai — ehovea ere areve āra ore. 5Ere haela lahua ve aire auvahaea va ka: ere arero oaoka lei hukaukilai, ehovea ere haela lahua ve āra ore va ka. 6Ma parabole Iesu erero maeaeape — aka are erero maeaeape oharo ve iele ere auhohi au iapaila.

7Laelave Iesu erero aeka maeaeape, O iele havahu, ara ero maeaeaive — mamoe oaria ve okiape ara ma. 8Araro oropa ve ekevahaeape haela va opore haela i korea haela ila, aka mamoe ereve oharo au iapaila. 9Okiape va ara ma. Haela ara v'ila la pekakilava, are ovokake leikilai areve aula kelari hoa eapai veveke koarakilai. 10Korea haela korea lei haela hai ka leivahaeakive ekelula. Ara erero ovokake leivahaeakive ekepe. Ovokake veveke iele avakive. 11Ara va mamoe kiva haela veveke. Mamoe kiva haela veveke elare ovokake mamoe v'ila avarakilai. 12Kavale horova leivila haela are va mamoe kiva haela havahu ka; mamoe are havahu ve mamoe ka, laelave are viva meikila eavi mamoe haitapai oaoka lei hukaukilai; viva mamoe korea huveverai koharuapakilai. 13Are oaoka lei hukaukilai, ehovea are va kavale horova leivila haela hiki, are mamoe kekela va ka. 14Ara va mamoe kiva haela veveke; ara havahu ve mamoe ara ore, arave mamoe kara araro ore. 15Hovea hovea Oa araro ore, ara kara Oa ore: ara arave ovokake mamoe v'ila avarakilai. 16Arave mamoe lahua le apearo. Ere ma kara ure hiki apea va ka. Ara erero kara kari ekekilai: ere arave āra iapakilai, ere oaria hiru haroapo leikilai, mamoe kiva haela va haroapo. 17Laelave Oa araro ikivere leivila ehovea arave ovokake ara avari kai aireaki le avakilai. 18Haela ae arave ovokake hareava va ka, ara havahu avarakilai. Ara va aheke hovea — avarakilai kai aireaki avakilai. Ma oharo Oa araro kimaeaepe.

19Jew haela oaria iki lahua lahua kelavape ehovea ma oharo. 20Ereve haela uku maria avahaeape, Are ovehahu ila, ihape iele — e areve oharo leve iapakilai ha. 21Haela uku maeaeape, Ma oharo ovehahu ila haela ve oharo ka. Haelaharihu ovohae kariri haela ve ovohae leari lei kohelaukakive?

Iesu Jerusalem hurae eapapo pekape

22La hoa Jew haela ve Okoare Hurai Jerusalem ve leia leipe. Mea vevehere hoa la. 23Iesu Hehe Uvi leia Solomon ve okiape maelai loa veavelaripe. 24Jew haela areve leia korukaiavahaeai maria maeape, Elave ikihorahora hoa a leahau haerapakilai ha? A va Keriso iele la leikilava, elaro hihika kimaeaeaki. 25Iesu erero kavale maeaeape, Ara ero maeaeape — e va iki au kelavaila. Ara Oa ve rare v'ila leivahaevila la horova — ere ara v'ila vavavailula. 26Aka e va kelava va ka, ehovea e va arave mamoe ka 27Arave mamoe arave āra iapailula — ara erero ore — ere kara arave airekai auvahaelula — ara erero ovokake haiapo avarakilai. 28Ere apihaea va ka; haela erero arave mai ve huveveraia va ka. 29Erero araro aikiarape la Oa areve haela oaria ve akea ve — aheke iele, haela ae erero Oa ve mai ve huveveraia va ka. 30Ela i Oa ila haroapo iele.

Jew haela ve ikiheaha

31Jew haela have kailape ehovea arero have koavakive. 32Iesu erero kavale maeaeape, Ara Oa ve horova veveke oaria ero amoeavahaeape. E va araro have la koakilava — le la horova ae kavale leikilai ha? 33Jew haela arero maeape, Ela aro have koava va ka, ehovea horova veveke, aka ehovea Aualari ve rare heaha leikive la oharo — aeva ehovea a va haela, a va elare maea Aualari maea hovea leivila. 34Iesu erero maeaeape, Eve pupu buka au haila ha, Ara ero maeaeape, e oaria va aualari? 35Are aualari rare erero itavi maea araikilava, Aualari ve oharo avape la haela (hohoa hape la oharo hakurepa va ka). 36Aualari hehe lei meahaiapo kiparaeape la haela v'ila e va leve arula, A Aualari heaha leivila, ehovea ara maeape, Ara Aualari ve Akore? 37Ara arave Oa ve horova leiki aue la leikilava, arave oharo ka iaparue. 38Aka ara erero iele la leikilava, e kara araro iapaki aue la leikilava, heroe, e va horova la kelavaki, ehovea e ore leivahaeakilai, Oa ara i aeavila, ara kara Oa i aeavila. 39Ere arero mai paeakive ikivere leivahaeape, aka are ereve mai ve le aupe.

40Are kai ita lahua ai Jordan ukai ve elaupe — John oropa hoa bapatiso horova leipe la ita. Are leia aeaveape. 41Areve leia haela oaria auvahaeape. Ere maeaeape, John ihova ae va au leila — aka John ma haela v'ila maeape — oharo oaria iele havahu. 42Haela perehekai oaria arero leia iki kelavape.

Currently Selected:

John 10: ORO

Highlight

Copy