Genese 31
31
Iakobo Labana ve leia ve vivilape hoa
1Iakobo iapape, Labana ve akoremari oaria avahaeape, “Elave oa ve eharu oaria Iakobo le avi, aeka areve ma erohoho oaria are elave oa ve leia avape.” 2Iakobo ovohae eavape, Labana ve oropape areve ukai ve overa la ikiveveke hovea ka. 3La hoa Iehova Iakobo maeape: “Helari, ave oa ve la ita i apavara leia kai aukive, ara a i hareho aukilai.” 4Laelave Iakobo Rahela i Lea ila areve mamoe hiru ve la āra kihoahukakive itavape, 5are erealilara maeaeape: “Ara ovohae eavi, ealila ve oa ve oropape arave ukai ve overa la ikiveveke hovea ka. Aka arave oa ve Aualari ara i hareho leikila. 6Ealila ore ara ealila ve oa ve horova kiva auhohi leiveape; 7aka ealila ve oa araro hehepo lei arave kavale hoa 10 ila lahua leipe, aka Aualari arero araro lei heaha leikive oki au hereavape. 8Are la maeakilava, ‘Hohoa ila la mamoe ave kavale.’ mamoe oaria hohoa ila leivahaeape; are la maeakilava, ‘Karoro karoro ila ave kavale,’ ere karoro karoro le leivahaeape. 9Laria, Aualari ealilave oa ve mamoe hareavi araro aikiarape. 10Mamoe ve ero eavi ape la hoa, ara ovohae iupepe, ara ivahi ureve eavape, abu koaravahaeape la nanikosi mea va maea karoro karoro i hohoa ila. 11La hoa Aualari ve aneru araro ivahi hoa maeape, ‘Iakobo’. Ara kavale maeape, ‘Ara ma!.’ 12Are maeape, ‘A va ovohae iupe ovohae eavaki, abu koaravahaeape la nanikosi mea va hohoa i karoro karoro ila, ehovea Labana aro leivila la mai ara overa eavi. 13Ara va Betela ve Aualari, a have urapai arave okoare ape la ita la. Urou, ma ita harepai aro epape la ita aeka helari aukive’.”
14La hoa Rahela i Lea ila arero kavale maeape: “Elalila ve eharu kepea elare oa ve uvi ureve apearo ha? 15Are ma hoa elalilara ita lahua haela hovea kekelavila. Are elalilara haela aea ve marita hovea leipe, elalilave kavale leipe la moni are elare ikivere horova leipe. 16Aualari elave oa ve hareavape la eharu oaria va o iele elalilave, kai elalilave akoremari ve. Kahara, Aualari aro maeape la horova leiki.”
17Laelave Iakobo urai areve akoremari i areve uavila ila kamela akea ve aipe aupe; 18are areve boromakau i mamoe ila oaria, are koarape la eharu oaria, kai Padana‐arama koaravahaeape la eharu oaria paparaehape, ehovea areve oa Isako ve ita Kanana leia auvahaeakilai. 19Labana areve mamoe ve kolo haelaeakive hoaupe la hoa, Rahela areve oa ve uvi harihu korea kailape. 20Iakobo Aramaea haela Labana au amuraeape; are arero areve helari hukaukive la oharo au maeaila. 21Are i eharu oaria ila vivilape, are urai Euperate mai elaupe, kai kela ita Gileada ve la okiharo aupe.
Labana Iakobo airekai aupe
22Hare 3 karia leipe la hoa Labana Iakobo vivilape la oharo iapape, 23la hoa are i areve lalava haela hare 7 ila areve airekai auvahaeape aiai Gileada la kela ita. 24Aka Aualari Aramaea haela Labana oroa hoa ivahi ureve maeape: “A kiva leiki, Iakobo oharo ae kamaealue, veveke aka heaha.”
25Labana Iakobo heaorapape. Iakobo areve kovo uvi kela ita leia urapape, Labana i lalava haela ila Gileada la kela ita pekahavi apeape. 26Labana Iakobo maeape: “A va learia maea leipe ha? A araro au amuraeape, kai arave marita au hahaeape haela hovea kari auvahaeape. 27A va hehepo lei muruhari lei hukaupe ehovealeve ha? E va araro lamaeakilava, ara ero ikiveveke i hivi ila, gitara i auri hivi ila paparaehakilai. 28Ehovealeve a va araro oki au avikiaraila, arave akoremari i marita ila ape popoakive? A va iki haveva mai leipe. 29Ara aro heaha leikive ore, aka ave oa ve Aualari haila oroa araro maria lakimaeaila, ‘A kiva leiki, o veveke aka o heaha Iakobo kamaealue.’ 30A va elaro haitapape iele ehovea a va ikivere eapapo ave oa ve ita, aka a arave uvi harihu eharu korea leipe ehovealeve ha?” 31Iakobo Labana kavale maeape; “Ehovea ara oaoka leipe. Arave ikikekela a va ave marita hahari iele huveve?-?raiaki ave. 32A va leita ve ita ave la harihu eharu la koaraki leive, la haela apa va heroe. Elaviilave apavara oropa ve, ara ave eharu aeva arave ita a la koarakilava, arero kaivakive.” Aka Iakobo ore au leila, Rahela la eharu korea kailape.
33Laelave, Labana Iakobo ve kovo uvi, Lea ve kovo uvi i horova marita orahokaila ve kovo uvi ila ureve humahaelape va au koaraila. Are Lea ve la kovo uvi kihoai Rahela ve la kovo uvi ve araeape. 34Kahara, Rahela la harihu eharu overa kaivi areve kamela ve haiavaki haha ureve avarapai, ereve akea ve haiavape. Labana areve kovo uvi ureve haropi au koaraila. 35Are areve oa maeape: “Arave aitapo e, hihiri kalailue; ara uroukive hovea ka, ehovea ara uavila la maea hovea leive.” Are haropi haropi harihu eharu au eavaila.
36Kahara, Iakobo hihiri lei Labana oropai maeape; Iakobo Labana maeape: “Arave haiae le ha? Ara le heaha leipe, ehovea a va araro maria avakape ha? 37A va arave eharu oaria ureve laharopila la hoa a va ave uvi harihu lakoaraila ha? La eharu arave apavara i ave lalava haela ila oropa ve aipekive, ere havahu elavaila ve aru ve heheavakilai. 38Ara va ma hitolo 20 ila a i hareho aeaveape, ave mamoe abu i nanikosi abu ila ero eavi aeape heaha au leila; ara ave mamoe mea kara au lalavahaeaila. 39Animala merava erarapai la mamoe ara ave uku au leila, ara havahu la heaha avape; hare aka oroa titavape la eharu oaria a va arave ukai la mehau avikiarape. 40Ara laria hiki, hare hoa ve la ahea i oroa hoa la vevehere ila, arave maea le koape, mea oaria arave ovohae hoaevi avuku veveke au uavaila. 41Ma hitolo 20 ila ara ave uvi aeaveape; ara va ave horova hitolo 14 ila lei lei ave marita orahokaila ve kavale la, hitolo 6 ila ave mamoe ve kiva laiki horova va, a kai arave kavale hoa 10 ila helari lahua lahua leipe. 42Arave oa ve Aualari, Aberahamo va Aualari, kai Isako ve Aualari oaoka leiki la mai, araro kiva leiki aue la leikilava, ore ka, a va araro ma hoa mai ka le paraeakilai. Aualari arave heraho i arave mai ve horova ila ovohae eavi, haila oroa aro oropai lamaeaila.”
Iakobo i Labana ila elare okoare ape
43Labana Iakobo kavale maeape: “Marita va arave marita, akoremari va arave akoremari, mamoe hiru va arave mamoe hiru, a eavaki eharu oaria va arave. Aka arave ma marita kai erealila erape akoremari, ara va mahau learia leikilai ha? 44Ekela, elavaila okoare arilai, a kai ara; la va elaila ve aru ve vavavaki oharo la.” 45Laelave Iakobo have eapapo kaivi urapape. 46Iakobo areve lalava haela maeaeape: “Have oaria korukaiavahaeakive.” Ere la have kaili hoa haroapo korukaiavahaeape; ere la have maeamaea avai eapai le lalavahaeape. 47Labana arero rare itavape rare Ie‐ga‐sahadu‐ta; aka Iakobo arero rare itavape rare Galeeda. 48Labana maeape: “Mahau hare ma have oaria elaila ve aru ve okoare ve avaraki eharu.” Laelave are rare Galeeda rare itavape. 49Au urapape la have haroapo are rare Misipa rare itavape, ehovea are maeape: “Elavaila ita apehai lahua lahua apeaki la hoa, Iehova elavaila ve aru ve kiva leikive. 50A va arave marita haiae la leikilava, aka uavila aea la karakilava, haela elavailara eavaki aue la leikilava, iki auhohi kekela, Aualari elavaila ve aru ve vavavakilai.”
51Labana Iakobo maeape: “Elavaila ve aru ve ma have oaria i au urapape have haroapo eavaki. 52Ma have i au urapape have ila vavavakilai, ara ave la ukai ve elau va ka, a kara arave ma ukai ve kilau va ka, ehovea heaha leikive. 53Aberahamo ve Aualari i Nahora ve Aualari ila, ereve oa ve Aualari ila, elavaila ve aru ve heheavakilai.” Laelave Iakobo areve oa Isako ve oaoka mai v'ila okoare ape, 54Iakobo arura eapai la kela ve leipe; are lalava haela pai larive itavape; ere pai lala oroa heaikiapo kela apeape.
55La opoa vevelare iele Labana urai areve meavohula i marita ila ape popoape, kai erero lei momorapupe. Aireaki are helari elare ita kai itaupe.
Currently Selected:
Genese 31: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
