Genese 15
15
Aualari i Aberamo ila Okoare leipe
1Ma eharu karia leipe la hoa, Iehova ve oharo ivahi hoa Aberamo maeape maria: “Aberamo e, oaoka kalailue; ara ave laua hovea. A va aireaki kavale veveke avakilai.” 2Aka Aberamo maeape: “Iehova Aualari, a va araro le eharu aikiarakilai, ehovea ara va akoremari karia, kai arave haruku avaki haela va Eliesera, Damaseka haela, arave uvi kiva haela.” 3Aberamo aeka maeape: “Eavaki, a va arave mere aea au avikiaraila; arave uvi ureve epape horova akore hiki haruku avakilai.” 4Iapai, Iehova ve oharo areve leia kihoaupe maria: “Ma haela haruku avaki haela lei va ka; a havahu ve akore ave haruku avakilai.” 5Are arero mea lai hoaupe kai mariape: “Ovohae kaia iupeki, kou ve numera kaoakive, a va erero kaoakive hovea ha?” La hoa are arero maeape: “Ave meavohula lahovea leivahaeakilai.” 6Are Iehova ve oharo iapai kekelape; are kai arero lei ehoe lei kekelape.
7Are arero maeape: “Ara va Iehova. Ara aro Kaladea haela ve Ura karikara lai kihoaupe, ehovea aro ma ita avarakive, ehovea o iele avakive.” 8Aka are maeape: “Iehova Aualari e, ara learia ore leikilai, ara va iele avakilai ha?” 9Are arero maeape: “Boromakau abu āre hitolo 3 hovea, nanikosi abu, hitolo 3 hovea, hivi haroapo kai huva āre ara v'ila aikiaraki.” 10Are ma eharu oaria aikepe, erero ukai ukai kovavaelape, kai ukai hiru ukai hiru aea koperereape, aka ori are au kovavaelaila. 11Ori merava iki la aivau korea larive, la hoa Aberamo erero haruapape.
12Hare hoaupe la hoa Aberamo avuku havahu uavape, kai oaoka eapapo leipe; kai mea muru arero aerape. 13Iehova Aberamo maeape: “A ore iele havahu leiki, ave meavohula ita lahua apeakilai, kai haela ae ve ita haiapo apeakilai, kai ereve horova haela leivahaeakilai, kai hitolo 400 hovea leia heraho leivahaeakilai. 14Aka, ere horova leivahaeaki la ita haela ara heheavakilai; ere va aireaki eharu oaria ila la ita ve kihoahukakilai. 15A havahu maria leikilai, a va havila ila ave houva hoa haela ve leia hoaukilai; a va haela eapapo lei karu ihaki hoa avakilai. 16Ere va aireaki vilakao 4 hovea kihoahukakilai, ehovea Amori haela ve haiae karia havahu au leila.”
17Hare overa hoaupe la hoa, mea muru leipe hoa, iapai, la hakakaea ve aru hihi ve, kemo ahea i mahuvu ila, kai a hari eapapo ila, kihoaupe. 18La hare Iehova Aberamo ila okoare mariape: “Ara ma ita ave meavohula aiarakilai, Aigupito ve la mai aiai mai eapapo rare Euperate, 19Keni haela, Kenisi haela, Kademoni haela ila ve ita, 20Hiti haela, Perisi haela, Repaimi haela ila ve ita ila, 21Amori haela, Kanana haela, Giragasa haela, Iebusi haela ila ve ita ila.”
Currently Selected:
Genese 15: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
