Matayo 28
28
UYesu iidzulubuka
(Maluko 16:1-10; Luka 24:1-12; Yohana 20:1-10)
1Ikigono ikya Sabato pe kíhelaniidze, pe kwitandaaluka pa Mulungu, uMaliya Magadalena pamwinga nu Maliya uyungi, vaaheliye kulola imombwe. 2Baaho na baaho, ikilindima kikomi kiihumilaga, pakuva umunyamwandza va Mutwa Nguluvi iikaga ukuhuma kukyanya, iihelelaga pa mombwe, iibiilusilaga pa lubali iliganga ilyo, akulikalilaga. 3Umunyamwandza uyo aangʼaalaga uluhwano ngita lumuli lwa libalamusi, imyenda gyakwe gyali mivalafu ngita maseve. 4Avakolakyanda avo pe vamuweene, viikoogopaga hiilo, viikagahalaga ngita váfuwe. 5Neke kangi umunyamwandza uyo avalongelage avamwayuuva avo atigilage, “Mutane ukoogopa! Ndiidzeela ukutigila mwádzile ukumusakula uYesu ye vakamutoveleliye pa kipindulihidzo. 6Sipwali apa! Ádzulubwike ukuhuma ku wulungu ngita kye akavalongiye. Mwadze mulole pe vakamugoniike. 7Lino muhelelage kisaatu mukavalongele avanyigendwa vaakwe ukutigila, ‘Ádzulubwike ukuhuma ku wulungu, nave ávalonguwe ukuhelela ku Galilaya. Uko kwe kwene kwe muhadza mukumuwona.’ Lino ndívalongiye!”
8Neke avamwayuuva avo vahegage kisaatu pa mombwe vali nu woogofi nu lukeelo lukomi. Viinyilaga kuhelela kuvalongela avanyigendwa va Yesu, ngita umunyamwandza uyo kye akavalongiye. 9Baaho na baaho, uYesu iitaangʼanaga navo, akuvahungilaga iitigilaga, “Kamwene!” Viihegelelaga kwa Yesu, viikoleelaga amagulu gaakwe nu kumugondamila. 10Neke uYesu avalongelage atigilage, “Mutane ukoogopa. Muhelelage mukavalongele avanyalukolo#28:10 Avanyalukolo Kwe kutigila, avanyigendwa va Yesu. vangu vahelelage ku Galilaya kwe vahadza vakuumbona.”
Imola ya vakolakyanda
11Avamwayuuva avo pe vali mu ngʼaasi viihelela, avangi mu vakolakyanda avaaloleelaga imombwe ya Yesu, viihegaga, viikwingilaga mu wudzenge wa Yelusalemu. Viifikaga, vakuvalongelaga avateekedzi avakomi dzonda ídzihumiye.
12Neke avateekedzi avakomi avo valundanage pamwinga na vavaha va Vayahudi, valonganage, viidiingʼanage, vavapeelage avakolakyanda avo amagoobeli goloofu. 13Vakuvafundaga viitigilaga, “Ngana umuunu ye avedzaga akuvawuudza ulwa idzo ídzihumiye mutigilage, ‘Avanyigendwa va Yesu vakaadzile pakilo ukuhiidza umufimba gwakwe pe tukaagoneeliye.’ 14Ngana uPilato apulike idzo, tuhadza twilongana nave, ukuta mutane ukwingila mu lutalamu.” 15Neke avakolakyanda vaanukilage amagoobeli ago nu kulonga ku vaanu, ngita kye vakaalongeliilwe na vavaha va Vayahudi. Imola idzo dziitagalilaga hiilo ku Vayahudi, kangi vaave vapisimanila ni neengʼuli.
UYesu akuvatuma avanyigendwa
(Maluko 16:14-18; Luka 24:36-49; Yohana 20:19-23; Malimo ga Vatume 1:6-8)
16Avanyigendwa vanyikyumi na yumwinga (11) viihelelaga ku Galilaya ku kidunda ikyo kye avalagiidze uYesu. 17Uko vakumuwonaga, vakumugondamilaga, neke kangi avangi mu vanyigendwa avo vavedzage nu wugayagaya. 18Neke uYesu ahegelelage, avalongelage avanyigendwa vaakwe atigilage, “UNguluvi áameeliye uwutawulilwe wonda uwa kukyanya nu wa mwe naanyi. 19Lino muhelelage ku vaanu va nyi dzonda, mukavahambusage ukuvedza vanyigendwa vangu. Mukavadzabikage mu litaawa lya Daada, ni lya Muswamuve, ni lya Mubepo uMwimike. 20Mukavawulanidzage ukuniniila dzonda dze ndívalagiidze unyeenye. Lolage, uneene ndili pamwinga naanye umusika gonda ukufikila pa wudugilo wa nyi.”
Currently Selected:
Matayo 28: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
