Yohana 7
7
UYesu na vanungʼuve
1Pe dzíhelaniidze idzo, uYesu iivangaga ukudzungutila mu mugoola gwa Galilaya. Asaasakaga ukudzungutila mu mugoola gwa Yudeya, pakuva avalongodzi va Vayahudi vaasakaga vamukome. 2Umusika gwa kyaka kya fitinga#7:2 Kyaka kya fitinga Lole Ikyaka kya fitinga ku Figanulo. ku Vayahudi gwali biihi. 3Neke avanungʼuve va Yesu vamulongelage vatigilage, “Uhege apa, uhelele ku Yudeya, ukuta avanyigendwa vaako vakagawone amalimo ge wiilima. 4Umuunu pe iisaka ukudzeeleka ku vaanu, asiilima amalimo gaakwe ku kinyele. Ngana uveeve wiilima dzonda idzi, wiiwoneese ku vaanu vonda, ukuta vakudzeele.” 5Avanungʼuve vaalongile ewo, pakuva navo vasamufuuwaga.
6UYesu akuvalongelaga iitigilaga, “Umusika gwangu ugwa kuhelela gusinaa gufika, neke kangi unyeenye musiilemwa ukuhelela umusika guguvedzaga. 7Avaanu va pe naanyi apa vasiigela ukuvaviipila unyeenye, nda haamu, vakuumbiipila uneene, pakuva ndikuvalongela ukutigila amalimo gaawo maviifu. 8Muhelelage mwiveene ku Yelusalemu ku kyaka. Uneene sindiihelela, pakuva umusika gwangu gusinaa gufika.” 9Pe aaviye álongile idzo, iisigalaga mu Galilaya.
UYesu iihelela ku Yelusalemu ku kyaka
10Neke kangi avanungʼuve pe vaaviye váheliye ku kyaka, uYesu nave iihelelaga kinyele kitadzeeleka. 11Lino avalongodzi va Vayahudi, pe vali mu kyaka, vamutemulaga uYesu. Vaawuudzaga viitigila, “Ali kwiya umuunu uyo?” 12Avaanu voloofu mu lilugu, viipwepanilaga ulwa Yesu. Avangi vaatigilaga, “UYesu muunu munofu,” avangi viitigilaga, “Nambi, uyu akuvadzanga avaanu.” 13Napo kangi sikwali umuunu ye aagelile ukulonga pa weelu ulwa Yesu, pakuva vavoogopaga avalongodzi va Vayahudi.
UYesu iiwulanidza avaanu mu tembeli
14Pe fíhelaniidze ifigono fikeefu fya kyaka ikyo, uYesu iikwingilaga mu lipaala lya tembeli, iivangaga ukuvawulanidza avaanu. 15Neke avalongodzi va Vayahudi vadzumage, valongage vatigilage, “Umuunu uyu akudzidzeela wuli dzonda idzi kuno we asiimbile?” 16UYesu akuvalongelaga iitigilaga, “Imbulanidzo dze ndiiwulanidza si dzangu, nda haamu, dziihuma kwa ye áanumile ukwenyo. 17Umuunu ye iikeela ukulima dze iikeela uNguluvi, ahadza iidzeela ngana imbulanidzo idzo dziihuma kwa Nguluvi, enewuli ndiilonga mu wutawulilwe wangu. 18Umuunu ye iilonga mu wutawulilwe waakwe, iitemula uluginiyo lwakwe yumwene. Neke kangi ye iitemula uluginiyo lwa uyo ye ámutumile, uyo iilonga idza ndakyene, nu wudesi simoowuli mugati umwakwe.”
19UYesu iiginaga ukulonga iitigilaga, “Ongo, uMose asavapeeliye imilagililwe unyeenye? Neke kangi sikwali umuunu umwenyo ye iikwinatila imilagililwe igyo. Lino kye kiki mwisaka ukuungʼoma?” 20Ililugu lya vaanu likumuhigaga liitigilaga, “Uveeve uli nu mubepo umuviifu! Ye ani ye iisaka ukukukoma?” 21UYesu akuvahigaga iitigilaga, “Ndaahuufiidze ikilole kimwinga#7:21 Ikilole kimwinga UYesu iilonga lwe amunaniidze umutamwa mu liseela lya Betisata pa kigono ikya Sabato, Yohana 5:1-15. mu kigono ikya Sabato, unyeenye mwidzumaga. 22Lolage, uMose avalagiidze muvasingage avaana#7:22 Muvasingage avaana Lole Uwusinge ku Figanulo. veenyo avadiimi. Si kutigila imivedzehedze igyo gyahumile kwa Mose yumwene, nda haamu, gyahumile ku vakuhwenyo va kutala.#7:22 Vakuhwenyo va kutala Avo vaali uAbulahamu, uIsaka nu Yakobo. Lino unyeenye mwisinga avaana veenyo nambe mu kigono ikya Sabato. 23Mwigimba ukwinatila imilagililwe gya Mose igya kusinga avaana veenyo avadiimi mu kigono ikya Sabato. Neke kangi kye kiki mukuumbiipila pe ndikumunaniya umuunu mu kigono ikya Sabato? 24Mutanage ukumuhiga umuunu wiimila wa idziiwoneka mwivala hela, nda haamu, mumuhigage wiimila wa wugolofu.”
Avaanu vakwiwuudza ulwa Yesu ye ani
25Neke avaanu avangi mu Yelusalemu vawuudzage vatigilage, “Ongo, umuunu uyu siye mwene ye vakumutemula avalongodzi, ukuta vamukome? 26Lolage, ineengʼuli iilonga pa weelu, neke kangi aveene vasiilonga kikivedzaga! Apangi avalongodzi viidzeela ukutigila uyu ye Mesiya? 27UMesiya pe alaadza, sikwali umuunu ye alaadzeela kwe áhumile, neke kangi uneefwe twidzeela umuunu uyu kwe áhumile!”
28Neke uYesu pe aawulanidzaga mu lipaala lya tembeli, iinusage isawuti atigilage, “Ndakyene múundzeeliye uneene na kwe ndiihuma. Uneene sindaadzile mu wutawulilwe wangu, neke kangi uNguluvi ye áanumile ye va ndakyene. Unyeenye musimudzeeliye, 29neke kangi uneene ndímudzeeliye, pakuva ndíhumile ukwakwe, kangi ye mwene ye áanumile ukwenyo.” 30Wiimila wa idzo, viisakaga ukumwibata, neke kangi sikwali umuunu ye aagelile amwibate, pakuva umusika gwakwe gwali gusinaa gufika.
31Neke kangi avaanu voloofu avaali baaho, vamufuuwage uYesu. Vaalongaga vaatigilaga, “Ngana uMesiya iikwadza, ongo, ahadza iihuufya ifimanyilo fyoloofu ukulutila fye áhuufiidze umuunu uyu?”
Avakolokolooni viitumwa ukumwibata uYesu
32AVafwalisayo na vateekedzi avakomi#7:32 Vateekedzi avakomi Lole Avateekedzi ku Figanulo. vaapuliike avaanu viipwepa ulwa Yesu. Neke avateekedzi avakomi na Vafwalisayo vavatumage avakolokolooni va tembeli, ukuta vakamwibate uYesu. 33Neke uYesu avalongelage avaanu avo atigilage, “Ndili pamwinga naanye mu musika mudebe hela, neke pambele ndiipiluka kwa ye áanumile. 34Mulaanemula, neke kangi musilaambona, kangi mwilemwa ukwadza kwe ndigenda.”
35Neke avalongodzi va Vayahudi valonganage veene vatigilage, “Umuunu uyu iihelela kwiya kwe tusimuwona? Ongo, iisaka ukuhelela ku nyi iya wugendzi kwe vátagaliye aVayahudi, ukuta akavawulaniidze avasili Vayahudi? 36Iisaka ukutulongela kiki pe iitigila, ‘Mulaanemula, neke kangi musilaambona, kangi mwilemwa ukwadza kwe ndigenda’? ”
UYesu iilonga ulwa Mubepo uMwimike
37Ikigono ikya wusililo kya kyaka kya fitinga, ikyali kigono kikomi kiifikaga. Neke uYesu iimage, iinusage isawuti atigilage, “Umuunu ye avedzaga ye ali ni ngʼelo, aadzage ukwangu anyuwe. 38Ndeviye kye wiilonga uWusimbe uWiimike ukutigila, umuunu ye avedzaga ye akuufuuwa uneene, iivedza ni mikoga gya lulenga ulwa wuumi uluhadza lwinyilimaga ukuhuma mu numbula yaakwe.”#Isaya 44:3; 55:1; 58:11 39Mu ulo, uYesu aalongaga ulwa Mubepo uMwimike, ye ahadza iikwanukilwa na vaanu vonda avakumufuuwa uYesu. Navo vasaapeeliilwe uMubepo uMwimike umusika ugo, pakuva uYesu aali aave ukwinuswa ukuhelela kukyanya ku ndolo dzaakwe.
Avaanu viilekeengʼana wiimila wa Yesu
40Avaanu avangi mu lilugu ilyo, pe vaapuliike amadzwi ago, viivangaga ukulonga viitigilaga, “Ndakyene umuunu uyu ye muvidzi.”#Lwiwuko 18:15, 18 41Avaanu avangi viitigilaga, “Umuunu uyu ye Mesiya.” Neke kangi avangi vatigilage, “Nambi, uMesiya asiihuma mu mugoola gwa Galilaya. 42Ongo, uWusimbe uWiimike wusiilonga ukutigila, uMesiya ahadza iihuma mu kipelela kya mutwa Dawudi?#2 Samweli 7:12-16; Ndzimbililo 89:3-4; Isaya 9:7; 55:3 Kangi ukutigila ahadza iiholwa mu Betelehemu,#Mika 5:2 mu wudzenge we aaholiilwe uDawudi?” 43Neke lino, avaanu valekeengʼanage wiimila wa Yesu. 44Avangi viisakaga ukumwibata, neke kangi sikwali umuunu ye aagelile ukumwibata.
Avalongodzi va Vayahudi vasikumufuuwa uYesu
45Neke avakolokolooni va tembeli avaatumiilwe ukumwibata uYesu, vapilukage kangi ku vateekedzi avakomi na Vafwalisayo. Vakuvawuudzaga viitigilaga, “Kye kiki musimuleetile?” 46Avakolokolooni viihigaga viitigilaga, “Sikwali umuunu uyungi ye áwudzeeliye ukulonga ngita kye álongile umuunu uyu.” 47AVafwalisayo vakuvawuudzaga viitigilaga, “Ongo, ávadzangile na yuunye? 48Kuli yumwinga mu valongodzi enewuli mu Vafwalisayo ye akumufuuwa? 49Neke kangi ililugu lya vaanu ili ilisigidzeeliye imilagililwe gya Mose, lili nu luleko.”
50Neke uNikodemu, yumwinga va valongodzi va Vafwalisayo, ye aali áheliye kwa Yesu pakilo mu figono fya kumbele, avawuudzage avayagwe atigilage, 51“Ongo, imilagililwe gyesu giikwidika ukumuhiga umuunu pe tusinaa tumupulikidza tandi nu kudzeela lwe iilima?” 52Aveene vakumuhigaga viitigilaga, “Uveeve naave úhumile ku Galilaya? Uhelele ukiimbe kangi wunofu uWusimbe uWiimike, apo naave ukulufika ukutigila sikwali umuvidzi ye iihuma ku Galilaya.”
Currently Selected:
Yohana 7: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
