Yohana 3
3
UNikodemu akumuhelelela uYesu pakilo
1Lino aali kwali uMufwalisayo wuli, ye aatambulwaga Nikodemu. Uyu aali yumwinga va valongodzi va kiwungu kya Vayahudi.#3:1 Kiwungu kya Vayahudi Lole Ikiwungu kya Vayahudi ku Figanulo. 2Ikilo yimwinga aaheliye kwa Yesu, akumulongelaga iitigilaga, “Muwulanidzaave, twidzeela ukutigila uveeve ve muwulanidzi ye útumiilwe nu Nguluvi, pakuva sikwali umuunu ye iihuufya ifimanyilo fye wiihuufya, ngana uNguluvi asili pamwinga naave.” 3UYesu akumuhigaga iitigilaga, “Ndakyene ndikukulongela ukutigila, sikwali umuunu ye aliingila ku wutwa wa Nguluvi,#3:3 Wutwa wa Nguluvi Lole Uwutwa wa Nguluvi ku Figanulo. ngana asiholiilwe ulwa kavili.”#3:3 Ulwa kavili Ikiganulo ikingi kiitigila ukuhuma kukyanya, kwe kutigila ukuhuma kwa Nguluvi, Yohana 1:13. 4UNikodemu akumuwuudzaga uYesu iitigilaga, “Umugogolo iiholwa wuli ulwa kavili? Asiilemwa ukwingila ulwa kavili mu lileme lya ngʼina, ukuta aholwe kangi!” 5UYesu akumuhigaga iitigilaga, “Ndakyene ndikukulongela ukutigila, sikwali umuunu ye aliingila ku wutwa wa Nguluvi, ngana asiholiilwe wugendela wa lulenga nu Mubepo va Nguluvi.#Esekyeli 36:25-27; Yohana 4:24 6Avaanu viiholwa ukuvedza nu wuumi ulwa muvili hela, neke kangi uMubepo va Nguluvi iihola avaanu ukuvedza nu wuumi ulwa mubepo. 7Utane ukudzuma dze ndíkulongiye ukutigila, ‘Lwisakulwa muholwe ulwa kavili.’ 8Ilivelo lyalipuga kuhelela kwe liikeela. Wiipulika ikyuyililo kyakwe, kangi usiidzeela kwe liihuma nambe kwe liihelela. Ndeeni kye lugenda kwa muunu ye avedzaga ye áholiilwe ukuhuma mwa Mubepo va Nguluvi.”
9UNikodemu akumuwuudzaga uYesu iitigilaga, “Umuunu iiholwa wuli ukuhuma kwa Mubepo va Nguluvi?” 10UYesu akumuhigaga iitigilaga, “Uveeve uli muwulanidzi va Vaisilaheli. Usikugafika amadzwi ago? 11Ndakyene ndikukulongela ukutigila, uneefwe twilonga dze túdzidzeeliye, kangi twikoolela dze túdziweene. Neke kangi unyeenye musikuwufuuwa uwoolesi weesu. 12Ndikuvalongela idziilimika mu nyi umu, neke kangi unyeenye musikudzifuuwa idzo. Lino mwilemwa wuli ukuufuuwa, ngana ndikuvalongela idziilimika kukyanya? 13Sikwali umuunu ye ágelile ukuhelela kukyanya, nda haamu, yu Muswamuve va Muunu ye aahumile kukyanya.
14“UMose iinwise ikihwano kya liyoka lya saba,#Mbalilo 21:8-9 ukuta avapoke aVaisilaheli pe vaali ku lungʼalangʼala. Ndeeni, nayu Muswamuve va Muunu munya kwinuswa,#3:14 Muswamuve va Muunu munya kwinuswa Kwe kutigila, uYesu ahadza iikwanukila indolo, wugendela wa kwinuswa pa kipindulihidzo, nu kwinuswa kuhelela kukyanya. 15ukuta avapeele uwuumi uwa mbeepali avaanu vonda avakumufuuwa.”
16UNguluvi aveendile avaanu vonda pe naanyi apa, lwe lwene amutawuwe uMuswamuve uMunyakimwinga, ukuta umuunu ye avedzaga ye akumufuuwa uyo, atane ukuyaga, nda haamu, avedzage nu wuumi uwa mbeepali. 17UNguluvi asamutumile uMuswamuve mwe naanyi ukuta avahige avaanu, nda haamu, ukuta avapoke wugendela mwa Muswamuve.
18UNguluvi asikumuhiga umuunu ye akumufuuwa uMuswamuve. Neke kangi umuunu ye asikumufuuwa, akapihigwa, pakuva asinaa amufuuwa uMuswamuve uMunyakimwinga. 19Uluhigo lwe ulu ukutigila, uMuswamuve va Nguluvi áleetile ulumuli mwe naanyi umu, neke kangi avaanu vákeeliye ikiisi ukulutila ulumuli, wiimila wa malimo gaawo amaviifu. 20Umuunu ye iilima imbiifu, akulusuula ulumuli ulo. Kangi asiikwadza ku lumuli, ukuta amalimo gaakwe amaviifu gatane ukuwoneka pa weelu. 21Neke kangi umuunu ye iilima amalimo ga ndakyene, iikwadza ku lumuli ulo, ukuta gasiikukage ukutigila gálimiike mu ngufu ya Nguluvi.
UYohana uMudzabisi iikoolela imola dza Yesu
22Ifigono fikeefu pambele, uYesu na vanyigendwa vaakwe vaaheliye ku mugoola gwa Yudeya. Vakwikalaga uko musika wuli, nayu Yesu avadzabikaga avaanu. 23Mu musika guugo, uYohana nave avadzabikaga avaanu ku Enoni, biihi nu wudzenge wa Salemu, pakuva kwali nu lulenga loloofu. Avaanu voloofu vaahelelaga ukwakwe, ukuta avadzabike. 24Umusika ugo, uYohana uMudzabisi aali asinaa adindilwa mu ndinde.#Matayo 14:1-12; Maluko 6:14-29; Luka 3:19-20
25Ikigono kimwinga, avanyigendwa wuli va Yohana vaavangile ukwibeedza nu Muyahudi yumwinga, ulwa mivedzehedze gya kukalava ukuta viivaladze. 26Neke vahelelage kwa Yohana, vamulongelage vatigilage, “Muwulanidzaave, umuunu yula ye aali naave ku mwambu ya mukoga Yolodani, ye wooleliye imola dzaakwe, lolage iidzabika avaanu. Kangi avaanu vonda viihelela ukwakwe.”
27UYohana akuvahigaga iitigilaga, “Umuunu asiikwanukila ikiinu, ngana uNguluvi asimupeeliye. 28Unyeenye nye voolesi vangu, mu dze ndaalongile ukutigila, ‘Uneene siye Mesiya, nda haamu, uNguluvi áanumile ukuta ndimulongolele.’ 29Umudala va noolane iisakulwa ukuhelela kwa mutoodzi. Uneene ndili ngita mudzeela va mutoodzi, ndíimile pa lubali apaakwe nu kumupulikidza, ndiikeela pe ndiipulika isawuti yaakwe. Wiimila wa ulo, ulukeelo lwangu lúkwiliye. 30UYesu munya kuvedza mukomi kulutila, uneene munya kuvedza mudebe kulutila.”
Imola dza ye áhumile kukyanya
31Umwene ye iikwadza ukuhuma kukyanya, ye mukomi ukulutila vonda. Umwene ye iihuma mwe naanyi, iilonga amadzwi ga mwe naanyi hela. Umwene ye iikwadza ukuhuma kukyanya, ye mukomi ukulutila vonda. 32Nave iikoolela amadzwi ge ágaweene nu kugapulika ukuhuma kukyanya, nda haamu, sikwali umuunu ye akuwufuuwa uwoolesi waakwe. 33Umuunu ye avedzaga ye iifuuwa uwoolesi waakwe, iikoolela ukutigila uNguluvi ye ndakyene, 34pakuva uNguluvi ámutumile uMuswamuve ukulonga amadzwi ga Nguluvi. Kangi akumupeela uMuswamuve uMubepo uMwimike kingaya kigelelo. 35UDaada akumwenda uMuswamuve, kangi ámupeeliye fyonda fivedzage paanyi pa wutawulilwe waakwe. 36Umuunu ye akumufuuwa uMuswamuve, ali nu wuumi uwa mbeepali. Neke kangi ye akumukaana uMuswamuve, asili nu wuumi uwa mbeepali, pakuva iligooga lya Nguluvi liisigala pakyanya apaakwe.
Currently Selected:
Yohana 3: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
