Yohana 2
2
Ulukeelanilo lwa noolane ku wudzenge wa Kana
1Ikigono ikya wudatu, kwali nu lukeelanilo lwa noolane ku wudzenge wa Kana, mu mugoola gwa Galilaya. Ku noolane iyo, aali kwali ungʼina va Yesu. 2UYesu na vanyigendwa#2:2 Vanyigendwa Lole Avanyigendwa ku Figanulo. vaakwe, navo vaalaaliikwe ku noolane iyo. 3Umusika avagendzi pe vaamalile idifwayi#2:3 Idifwayi Lole ku Figanulo. yonda, ungʼina va Yesu akumulongelaga iitigilaga, “Muswamu-vanguave, avagendzi vámalile idifwayi.” 4UYesu akumuhigaga iitigilaga, “Yuuva, kye kiki ukuundongela ewo? Umusika gwangu gusinaa gufika.” 5Ungʼina akuvalongelaga avalimila-vangi iitigilaga, “Luluvedzaga lwe ahadza akuvalongela umuswamu-vangu, mulimage.”
6Apoono apo, dzaali poodzili indziilo mutanda (6), idzaawuyiipwe na maganga. AVayahudi vaasopaga umo ululenga lwa kulimila imivedzehedze gyawo gya kukalava, ukuta viivaladze.#Maluko 7:3-4 Indziilo yimwinga yaamemaga mateneka gahaanu enewuli mutanda. 7UYesu akuvalongelaga avalimila-vangi avo iitigilaga, “Mumemye ululenga mu ndziilo idzi.” Navo viimemyaga ululenga mu ndziilo idzo ukufikila pa mulomo. 8Neke uYesu avalongelage atigilage, “Lino munege, mumupeele umukomi va lukeelanilo.” Navo viilimaga ewo. 9Umukomi uyo aagedziidze ululenga ulo, lwe aahambwise uYesu ukuvedza difwayi. Umukomi uyo asaadzeeliye kwe yíhumile, neke kangi avalimila-vangi avaanegeeliye ululenga, vaadzeeliye kwe yíhumile. Neke amukemeelage umutoodzi. 10Akumulongelaga iitigilaga, “Avaanu vonda vaavitala tandi ukutawula idifwayi inofu, neke kangi umusika avagendzi pe vágaalile, apo viileeta idifwayi indzulufu. Neke kangi uveeve úyilekile idifwayi inofu iyi ukufikila lino!”
11UYesu aahuufiidze ikimanyilo#2:11 Ikimanyilo Uwugulume wa Yohana waali wa kuwoneesa ukutigila, uYesu ye Muswamuve va Nguluvi, lwe lwene aatambulaga ifilole fya Yesu ukutigila fimanyilo, Yohana 20:31. iki ku wudzenge wa Kana ya mu Galilaya. Wugendela wa kimanyilo ikyo, ikyali kya kutala, aawoneesiidze indolo dzaakwe, avanyigendwa vaakwe navo vakumufuuwaga. 12Ulukeelanilo lwa noolane pe lwaviye lúsilile, uYesu pamwinga nu ngʼina, avanungʼuve, na vanyigendwa vaakwe, viihelelaga ku wudzenge wa Kapelenahumu, vakwikalaga uko figono fikeefu.
UYesu iivaladza itembeli
(Matayo 21:12-13; Maluko 11:15-17; Luka 19:45-46)
13Umusika ikyaka kya Paasaka#2:13 Ikyaka kya Paasaka Lole ku Figanulo. ya Vayahudi pe kyali biihi, uYesu iihelelaga ku Yelusalemu. 14Neke iingilage mu lipaala lya tembeli,#2:14 Tembeli Lole Itembeli ku Figanulo. avawonage umo avaagudzaga isenga, ingʼolo ni ngundya, na vafundza-magoobeli. 15UYesu pe adziweene idzo, iivilasaga indegesi guvedze mukopodzi, akuvadagaga vonda avaagudzaga mu lipaala, pamwinga ni senga ni ngʼolo. Iikunamulaga ifitagala fya vafundza-magoobeli, nu kutaagasa amagoobeli gaawo. 16UYesu akuvalongelaga avaagudzaga ingundya iitigilaga, “Muhedze apa ingundya idzi! Mutane ukuhambusa inyumba ya Daada ukuvedza ligulilo!” 17Avanyigendwa vaakwe pe vaapuliike idzo, viikwiwukaga uWusimbe uWiimike kye wiitigila, “Uwende wangu ku nyumba yaako, wuhadza wukuungʼoma.”#Ndzimbililo 69:9
18Neke avalongodzi va Vayahudi pe vadziweene dze aalimile uYesu, vamuwuudzage vatigilage, “Uhadza wiihuufya ikimanyilo kiki ukuwoneesa ukutigila uli nu wutawulilwe wa kulima idzo?” 19UYesu akuvalongelaga iitigilaga, “Mumamule itembeli iyi, uneene ndihadza ndiidzenga mu figono fidatu.” 20Neke aveene vamuhigage vatigilage, “Itembeli iyi yaadzengiilwe musika gwa myaka makyumi gatayi nu mutanda (46). Uveeve wiidzenga wuli mu figono fidatu?”
21Neke kangi uYesu asaalongaga ulwa tembeli, aalongaga ulwa muvili gwakwe. 22Pe aadzulubwike ukuhuma ku wulungu, avanyigendwa vaakwe viikwiwukaga amadzwi ge aalongaga. Viifuuwaga amadzwi agaasimbiilwe mu Wusimbe uWiimike na ge aalongaga uYesu.
UYesu iidzeela idzili mu numbula dza vaanu vonda
23UYesu pe aali ku Yelusalemu ku kyaka kya Paasaka, avaanu voloofu vamufuuviilwe, pakuva vaalolaga ifimanyilo fye aalimaga. 24Neke kangi uYesu asavafuuviilwe, pakuva avadzeeliye avaanu vonda. 25Kangi asaasakaga umuunu ye avedzaga amulongele dze viihoodza avaanu, pakuva adzidzeeliye dzonda idzaali mu numbula dzaawo.
Currently Selected:
Yohana 2: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
