Mathew 28

1Naŋ me ravrav paso alo qoŋ mapsag, alo loŋloŋe maran tape qoŋ tuwale talo wik, i Meri o ta Magdala me mule ma, tana i tuara Meri, si a iloilo o qaraŋ tamate. 2Wa ilo, o rir liwoa me rir; ape o angel anan i Lord me siwo ma vunana, me mule ma we wilreag o vat nan o mate qaraŋa, wa me pute avunana. 3Wa natarapena tam o vila, wa non o siopa we aqaga lesu tama o snow. 4Wa ra matagisgis goro me sigsigeragira mun o gogolo ape ineia, wa neira me tam o tamate. 5Naŋ i angel me valui goro, me vava mun o retavine wa, Urapea gogolo, kamurua; ape nau we gilala si kamurua we sike i Jesus neira me woso teterpania ti. 6Ineia gate iake; ape ni me tavaraka kel, tama ni me vet mona ti. Mule ilo ma o tanoi i Lord me risa aia. 7Wa ura mule gaplot at, ura gaganag munra tiŋqoro anana si ni me tavaraka veta nan ra mate; wa ilo, ni we tira moai kamiu i Galilea; kam te iloa aia; ilo, na me gaganag mun kamurua. 8Naŋ rara me rowolue gaplot nan o qaraŋa mun o gogolo wa mun o qaraqara liwoa, wa me valago si a gaganag apena munra tiŋqoro anana. 9Naŋ alo rara we mulemule si a gaganag mun ra tiŋqoro anana, ilo, i Jesus me varniŋa rara, we vava si, We wia, ragera. Naŋ rara we mule suria we taur naraŋona, we vatieqau goroa. 10Naŋ i Jesus me vet mun rara wa, Urapea gogogolo; mule gaganag at mun ra tatasik si neira a vanreag i Galilea, wa neira te ilo inau aia.

11Naŋ alo irara qale mulemule, ilo, o tuarasei talo vavtig ilogoro me mule pata ilo laqlaqe vanua, we gaganag munra oloolo liwoa o savasava ŋaŋ me ge. 12Wa neira me vug tuwale, tara tamaragai, wa we varsikesike apena, qara la o som we qoqo munra soldier ŋaŋ; 13we vet wa, Tur vava si, Ira tiŋqoro anana me mule alo qoŋ me wosag palua alo ikamam we matur. 14Pa si o roro ike qe roro amen i governor, kamam te pesia apena, wa te ge lolo wasawasa kamiu. 15Naŋ ragai me taur mora o som, wa me ge tama me vareg ti muneira apena. Wa me sororo ma o vavae ilone amaira ta Judea gai qoŋ nake iloke.

16Naŋ ira tiŋqoro saŋavul tuwale o numei tuwale me mule Galilea, ilo tauwe i Jesus me vatraŋira ti apena. 17Naŋ neira me iloa, we vatieqau goroa; nava o tuan neira we nomvaruarua apena. 18Naŋ i Jesus me mule ma sur neira we vava muneira, we vet wa, Me la nol ma munau o mana avunana wa alo tano. 19Manigiu o ine tur mule tur gege tiŋqoro o veve sul nol, we vasvasugroŋo neira ilo sase Mama wa o Natui wa o Vui we Roŋo, 20we vatvatogo neira si a kokor mora o savasava ŋaŋ na me vareg mok ti mun kamiu apena. Wa ilo, inau amen kamiu valqoŋ valqoŋ gai ge vunvun o marama.

Currently Selected:

Mathew 28: MOTA

Highlight

Copy