Mathew 2

1Wa i Jesus me wota veta a Bethlehem takele Judea alo qoŋin i Herod o maranaga, ilo, ira Magoi me mule ma i rowo ape mateloa, me niŋa a Jerusalem, 2qara vava wa, Avea neia me wota veta ma o maranaga goro ra ta Judea? ape kamam me ilo non o vitu ape mateloa, wa we mule ma si a taqaloŋ goroa. 3Wa i Herod o maranaga me roŋotag apena, natoqana me vile ris, wa natoqara nol a Jerusalem amaia. 4Wa ni me vile tuwale ira oloolo liwoa ŋaŋ tarasei we vatogo o sul, ti varus neira si i Christ te wota ma avea. 5Naŋ neira wa, A Bethlehem takele Judea; ape o prophet me rave veta tamaike wa,

6Pa iniko Bethlehem, vanua ta Juda,

Ko gate manmantagai ilo amaira liwoa ta Juda,

Apensei we liwoa te rowo lue naniko,

Wa ni te altag goro o sul anak ira Israel.

7Wa i Herod me log roroŋo ma ira Magoi, wa me varus vagvagaute neira si o vitu qara siŋa taqai ma anaŋaisa. 8Wa ni me suware neira at i Bethlehem, ti vava wa, Mule sikesike vagvagaute ape natmera, wa kam qe ilo suaria, gaganag ma munau, si nau mulaŋ a mule mok a taqaloŋ goroa. 9Wa neira me roŋotag paso o maranaga me gis raka. Wa ilo, o vitu neira me ilo veta ti ape mateloa me tursalemoa neira gai tira late avune vatine o natmera aia. 10Wa neira me ilo o vitu neira me qara mun o qaraqara liwoa aneane apena. 11Wa neira me kalo pata lele ima me ilo o natmera tana Meri ravevena, wa me rowo taqa, me vatieqau goroa, wa me waka nor o tano savasava me le munia o sogov, o gold, wa o tangae punapuna, wa o mur. 12Wa God me nir lue alo qoreqore nan neira wa kel sur Herod, wa neira me kel lue o matesala we sea ilo vanuara.

13Wa neira me kel veta, ilo, o angel anan i Lord me rowolue mun Joseph alo qoreqore, ti vet wa, Tavaraka, ka la o natmera tana ravevena, wa kamtol te toa i Misraim, wa kamtol te toga galtag aia nau gai vava muniko: apen Herod te sike o natmera si a ge mateia. 14Wa ni me tavaraka, me la o natmera tana ravevena alo qoŋ, wa me sirig siwo i Misraim. 15Wa me toga aia i Herod gai mate. Si ilone amon i Lord me vava ti mun o prophet a tira ran wa, Na me log lue natuk ma a Misraim. 16Paso nan i Herod me ilo si ra Magoi me porosagia, ni me toqosag o lologagara, wa me suware at, me vus mate qet ira natmera mereata ŋaŋ a Bethlehem wa alo tiŋgoro vanua nol ilone, nataura me rua veta wa sur siwo nan, tataga o masao tau ni me varus vagvagaute ira Magoi apena. 17Wa qara tira ilone me vava ti mun i Jeremia o prophet wa,

18Me roŋotag o liŋai a Rama,

O rararao wa o ruruŋtap we poa, i Rakel we rararao ape ra nanatuna,

Wa gate maros we masur kel ape neira me tagai.

19Naŋ i Herod me mate veta, ilo, o angel anan Lord me ŋaŋa lue mun i Joseph alo qoreqore a Misraim, 20ti vet wa, Tavaraka, ka la o natmera tana ravevena, wa kamtol te mule ilo vanuara Israel; ape neira me mate veta me sike naesun o natmera ti. 21Wa ni me tavaraka me la o natmera tana ravevena me mule pata ilo vanuara Israel. 22Pa ni we roŋotag si i Arkelaus we maranaga a Judea leas i Herod tamana, ni me gogolo si a kel aia; pa me nir lue munia apena alo qoreqore, ni me mule taso ilo vanua o Galilea; 23wa me niŋa aia ni me toga alo laqlaqe vanua o sasai o Nasaret, si ilone te tira me vava ti munra prophet wa, Te logia o ta Nasaret.

Currently Selected:

Mathew 2: MOTA

Highlight

Copy