John 4

1Wa alo i Lord me gilala si ra Pharise me roŋotag si i Jesus we ge tiŋqoro wa we vasugroŋo o tanun ŋaŋ we tar nan i John 2(panava i Jesus gate vasugroŋo mona, nava ira tiŋqoro anana magesera), 3ni qara toavtag o Judea, we vanreag mulaŋ i Galilea. 4Wa namona ran sin mule raveaglue Samaria. 5Wa we niŋa tamaine o laqlaqe vanua ta Samaria, we log si a Sukor, arivtag o vatine i Jakob me la ti mun natuna i Joseph. 6Wa o qaraŋ pei mon i Jakob aia. Wa i Jesus me ŋala ape muleva, wa ni me pute tamaike a pan qaraŋ pei. Pa tama o masao qoŋ laveteai. 7Naŋ o vavine ta Samaria me mule ma sin tav o pei. Naŋ i Jesus ti vet munia wa, La mak pei ma. 8Ape ra tiŋqoro anana me va at ilo laqlaqe vanua, si a wolwol sinaga. 9Naŋ o vavine ta Samaria ilone ti vet munia wa, Ape sava iniko o ta Judea we paere munau o vavine ta Samaria ape mama o pei? ape neira ta Judea gate pulpul amera ta Samaria. 10Naŋ i Jesus me valuia wa, Si ko ta gilala o sogov mon God, wa isei we vava muniko wa, La mak pei ma, ko te paere munia, wa ni te le at muniko o pei maur. 11Naŋ o vavine ti vet munia wa, Lord, nom o tano tavtav pei tagai, wa o qaraŋa we roro; o pei maur ilone amaiko ma avea? 12Ko we liwoa wun nan tupunina i Jakob me la o qaraŋ pei mun kamam, ni me imaima mona ti wa ira natuna wa o qoe ŋaŋ napulana? 13Naŋ i Jesus ti valuia ti vet munia wa, Si sei qe ima o pei iloke te marou mulaŋ; 14pa isei qe ima o pei na te la at munia, ni tete marou lai mulaŋ ti tuai ti tuai; nava o pei na te la at munia te qaraŋ pei alo lolona ti vuravura ilo esu galava. 15Naŋ o vavine ti vet munia wa, Lord, le ma o pei iloke si na tete marou apena, wa na tete vanvan ma ape tavtav pei. 16Naŋ i Jesus ti vet munia wa, Mule, log rasoama ma, pa kel ma. 17Naŋ o vavine ti valuia ti vet munia wa, Rasoak tagai. Naŋ i Jesus ti vet munia wa, Ko me vava mantag wa si, Rasoak tagai. 18Ape irasoama me tavelima we tuai, wa o tanun we toga amaiko ilokenake gate rasoama; we nun iloke ko me vava apena. 19Naŋ o vavine ti vet munia wa, Lord, nau we ilo vaglala iniko o prophet. 20Ira tupumam me gagagapalag roŋo alo tauwe iloke; pa kam we vava si a Jerusalem o tur vatine me vet si a gagagapalag roŋo aia. 21Naŋ i Jesus ti vet munia wa, Vavine, ka nomtup nau, o masao qoŋ we rasu ma, kam tete gagapalag roŋo mun o Mama alo tauwe iloke, wa a Jerusalem tagai mulaŋ. 22Kam we gagagapalag o sava kamiu gate lolomaran apena; kamam we gagapalag o sava kamam we lolomaran apena; ape o esu we van ma amaira ta Judea. 23Pa o masao qoŋ me noga wa me wesu veta, si ra tur gagapalag te gagapalag alo vui, wa te gagapalag nun mun o Mama, ape o Mama we sike ira gagapalag munia we tamaine. 24God ineia o Vui, wa ira gagapalag munia te gagapalag vui, wa te gagapalag nun. 25Naŋ o vavine ilone ti vet munia wa, Nau we gilala apen i Mesia we mule ma, we logia i Christ; alo ni we mule ma ni te gaganag qet mun nina ape gene ŋaŋ. 26Naŋ i Jesus ti vet munia wa, Inau iloke we vava muniko nake.

27Alo ilone ira tiŋqoro anana we kel ma, wa neira we mamakei ape tan o vavine we varvava; panava isei gate vava wa, Ko we sike o sava? si, Ape sava kamurua we varvava? 28Naŋ o vavine me mapvitag tamaine non o tanopei, ti vanreag ilo laqlaqe vanua, ti vava mun o tanun ŋaŋ wa, 29Tur van ma, tur ilo o tanun me gaganag munau ape gene ŋaŋ na me ge ti: ineia wun i Christ? 30Wa neira we rowolue nan o laqlaqe vanua, we mule suria. 31Alo masaoi ilone ira tiŋqoro me paere munia wa, Vatogo, si ka ganagana. 32Pa ni me vava muneira wa, Gak o sinaga apena kam gate gilala. 33Naŋ ira tiŋqoro we varvava wa, Isei me la at o sinaga munia? 34Naŋ i Jesus ti vet muneira wa, Gak o sinaga si na ge o sava i gene me vatraŋ nau ma we maros, si na ge paso mon o gagagapalag. 35Kamiu gate vava was, O vula nivat ti, pa qara wesu o gorogoro? ilo, nau we vava mun kamiu wa, Tur ate kalo, tur sagarag o tuqei ŋaŋ me raŋo veta ape gorogoro. 36Wa i gene we gorogoro we taur o som rusarusai, wa we sogon tuwale o woai ilo esu galava; si i gene we savsavur tana i gene we gorogoro rara a malakalaka tuwale apena. 37Ape alo iloke o vavae ilone we nun, wa si, O tuara te savsavur, wa o varuei te gorogoro. 38Na me vatraŋ kamiu si a gorogoro o sava kam gate mawmawui ti apena; irasei we sea me mawmawui veta, wa ikamiu we mule pata momiu ilo nor o tano mawmawui.

39Naŋ alo laqlaqe vanua ilone o tanun ta Samaria we qoqo me nomtupua ape vavae ilone mon o vavine we gaganag we tira was, Ni me gaganag munau ape gene ŋaŋ na me ge ti. 40O manigiu ilone ira ta Samaria me mule suria, we paere munia sin toga amaira, wa ni me toga aia o qoŋ nirua. 41Wa we qoqo nan amoa me nomtup ape mon o vavae; 42we vet mun o vavine wa, Kamam we nomtup ilokenake, pa gate ape mom o vavae; pa apen kamam me roŋotag momam, wa kamam we gilala si i gene iloke we nun ran i Vaesu marama.

43Wa o qoŋ nirua me paso, ni me toavtag o vatine ilone, ti vareag i Galilea. 44Apen i Jesus me gaganag mona we tira wa, Gate nom mava lai o prophet alo tur vanuana. 45Wa ni me niŋa a Galilea, wa ira ta Galilea me lav vasgotia, ape neira me ilo o gene ŋaŋ ni me ge ti a Jerusalem alo lakalaka; ape neira mulaŋ me mule mora ape lakalaka.

46Wa ni me mule mulaŋ tamaine i Kana takele Galilea, ni me ge o pei ti aia sia ris wine nia. Wa o tuara tanun anan i maranaga, i natuna we gopa a Kapernaum. 47Wa ni me roŋotag apen i Jesus me rowolue ma a Judea i Galilea, wa ti mule suria, ti paere munia, ni van siwo, ni vaesu natuna; o mantagai tie ti mate. 48Naŋ i Jesus ti vet munia wa, Si kam qe tete ilo o vaglala wa o vasasa ŋaŋ, kamiu tete nomtup ran. 49Naŋ o tanun liwoa ti vet munia wa si, Lord, van moai siwo, i natuk gate mate tiqa. 50Naŋ i Jesus ti vet munia wa, Van at, i natuma we esu. Wa o tanun me nomtup o vavae i Jesus me vet ti munia, pa ti vanreag. 51Wa alo ni ti qale taqtaqel siwo ti o rowrowovag ŋaŋ anana we varniŋa ineia, we vet wasi natuna we esu. 52Naŋ ni me varusira wa, Ni me qeteg mauka alo masao qoŋ avea? Naŋ neira we vet munia wa, Nanora alo masao qoŋ laveruai o tutunsag me saru nania. 53Wa o mama ilone me gilala tamaine si o masao qoŋ ilone i Jesus me vava munia alolona wa, Natuma we esu; wa ni me nomtup mona, tarasei nol talo imana. 54Iloke mulaŋ o vaglala o varuei i Jesus me ge, ni me kalo veta ma ti a Judea i Galilea.

Currently Selected:

John 4: MOTA

Highlight

Copy