John 18

1Naŋ i Jesus me vava paso o vavae ŋaŋ iloke, tara tiŋqoro anana we van levegao o qaraŋa a Kedron, we niŋa o tuqei aia, wa we van ilolona tara tiŋqoro anana. 2Naŋ i Judas mulaŋ, i gene we maniriŋia, me gilala o vatine; apen i Jesus tara tiŋqoro anana we gogorag tuwale vaga qoqo aia. 3Wa i Judas me lav raka o vavtig vagalo, wa ira rowrowovag nan ira oloolo liwoa tara Pharise, we mule aia mun o pul wa o siŋ wa o reŋreŋ vagalo ŋaŋ. 4Pa i Jesus we gilala o savasava ŋaŋ te qaloa, we rowolue, ti vet mun neira wa, Kam we sike isei? 5Naŋ neira we valuia wa, I Jesus ta Nasaret. Naŋ i Jesus wa, Inau. Wa i Judas mulaŋ, i gene we maniriŋia, we tira amaira. 6Wa alo ni me vet mun neira was, Inau, neira me suga kel, wa me masu ilo tano. 7Naŋ ni me varus neira mulaŋ wa, Kam we sike isei? Naŋ neira wa, I Jesus ta Nasaret. 8Naŋ i Jesus me valui gorora wa, Na me vava veta si inau: si kam we sike inau, tur ukegira ŋaŋ iloke neira mule. 9Si o vavae ni me vet tuai ti te tira ran, was, Na gate ge tagea i tuwale nan neira ko me la ma ti mun nau. 10Paso nan, i Simon Peter me naŋa lue o gasal amaia, ti vus o rowrowovag anan i moe oloolo, ti sal mot o qoro matua. O sase rowrowovag ilone i Malkus. 11Naŋ i Jesus ti vet mun i Peter wa, Sarovag kel nom o gasal ilo tanona: na tete un o lasa i Tamak me la ma mun nau?

12Wa o vavtig vagalo, wa i liwoa goro tar, wa ira ilo goro tamaira ta Judea me taur i Jesus, we rotia, 13we tak reagia sur i Anas amoa, ape ineia qaligan Kaiaphas i moe oloolo alo tau ilone. 14Pa i Kaiaphas iloke me vet veta naliŋana munra ta Judea wa si isei tuwale te mate ape sul nol, we wia nan.

15Wa i Simon Peter me tataga i Jesus, tana tuara tiŋqoro mulaŋ. Wa i tiŋqoro ilone me gilala i moe oloolo, wa ni me kalo pata tuwale amen Jesus ilo masao iman i moe oloolo. 16Nava i Peter we tira ape mateima avarea. Wa i tuara tiŋqoro, i moe oloolo me gilala veta ineia, qara nug lue kel ma, ti vava mun iro ilogoro mateima, qara tak i Peter ma ilolona. 17Naŋ o malamala we ilogoro o mateima ti vet mun Peter wa, Pa iniko mulaŋ o tuara nanra tiŋqoro anan i gene iloke? Naŋ neia wa, Inau tagai. 18Wa ira mawmawuitag tara rowrowovag we tira aia, me pulaŋ veta o av mun o gartaweris ape malaso, we masmasil, wa i Peter amaira, we tira we masmasil.

19Naŋ i moe oloolo me varis i Jesus apenra tiŋqoro anana wa ape non o lea vatogo. 20Naŋ i Jesus me valui goroa wa, Na me wawaŋ lue ran mun o marama; na me vatogo vagae alo ima siwo tuwale ŋaŋ, wa alo vatine we roŋo, ira ta Judea we vugvug tuwale nol aia, wa na gate vava ilo tea alo wonowono. 21Ape sava ko we varis nau? ka varis irasei me roŋotag veta nau, o sava na me vet ti mun neira: ilo, ineira we gilala o savasava ŋaŋ na me vet ti. 22Naŋ ni me vava paso tamaike, o tuara rowrowovag we tira arivtag me wosa i Jesus, ti vet wa, Ka valui goro i moe oloolo tamaine? 23Naŋ i Jesus ti valui goroa wa, Si na me vava tatas, ka gaganag we tira ape tatas ilone: nava si we wia, ape sava ko we wosa inau? 24Wa i Anas qara suwarea at we rot sur i Kaiaphas i moe oloolo.

25Wa i Simon Peter we tira we masmasil. Naŋ neira we vet munia wa, Pa iniko mulaŋ wun nanra tiŋqoro anana? Naŋ ni me tala, ti vet wa, Inau tagai. 26Wa i tuara rowrowovag anan i moe oloolo, i sogon i gene i Peter me sal mot naqorona ti, ti vet wa, Na gate ilo ko amaia alo tuqei? 27Wa i Peter me tala goro mulaŋ; wa o toa me kokorako gaplot.

28Wa neira me vantak i Jesus at nan i Kaiaphas ilo iman i governor; pa alo gap matava; wa neira gate kalo pata mora ilo ima ilone, nan wa lepa lai apena, pa si neira gana lai o rowolagau. 29O manigiu o ine i Pilat me rowo lue surira ti vet wa, Kam we tila o tanun iloke ape sava? 30Naŋ neira me valui goroa we vet wa, I gene iloke ta tete malagagapalag, kamam tete lavia at suriko. 31Naŋ i Pilat we vet muneira wa, Tur lav momiu ineia at, tur vevegia tataga nomiu o lea. Naŋ ira ta Judea wa, Gate tira mun kamam si a ge mate isei. 32Si a wesu o vavae i Jesus me vet ti, we vaglala nia ape sava matea ni te mate apena.

33Paso nan i Pilat ti kalo pata kel ilo iman i governor, ti log i Jesus ma, ti vet munia wa, Iniko i maranaga nora ta Judea? 34Naŋ i Jesus ti valui goroa wa, Ko we vava matapuma iloke, si irasei we sea me gaganag muniko ape nau? 35Naŋ i Pilat ma valuia wa, Inau o ta Judea? Iragai o sul anama tara oloolo liwoa ŋaŋ me ukegiko ma munau: o sava ko me ge? 36Naŋ i Jesus me valui goroa wa, Nok o marana gate talo marama iloke; nok o marana ta talo marama iloke, ira rowrowovag anak te vagalo, nan wa ukeg nau munra ta Judea; nava ilokenake nok o marana gate ta iake. 37O manigiu ilone i Pilat me vet munia wa, Pa we nun iniko o maranaga? Naŋ i Jesus me valuia wa, Ko we vava si inau o maranaga. O manigiu iloke na me wota ma apena, wa o manigiu iloke na me van ma ilo marama, si na gaganag we tira ape nun. Valsei we talo nun ma we roŋotag naliŋak. 38Naŋ i Pilat ti vet munia wa, O sava o nun? Wa me vava paso tamaike, ni qara rowo lue mulaŋ sur ra ta Judea, ti vet mun neira wa, Na gate ilo piro qalo o pugai amaia. 39Nava o liŋai me avu veta mun kamiu si na ul o garotrot nan sei tuwale mun kamiu alo rowolagau: kamiu we maros si na ul nan i Maranaga nora ta Judea? 40Naŋ neira nol qara log raka mulaŋ wa, Ilone nipea, nava i Barabas. Wa i Barabas iloke o vus palu.

Currently Selected:

John 18: MOTA

Highlight

Copy