O Gagagapalag 13

1Naŋ alo loglue a Antiokia o tuan prophet wa o vatogo; i Barnabas, wa i Simeon me logia si i Niger, wa i Lukius ta Kurene, wa i Manaen, irarua tana i Herod i tetrark me tako ape sus tuwale, wa i Saul. 2Wa alo neira me gagapalag mun Lord, wa me gargara mamasa, o Vui we Roŋo ti vet wa, Tur aseg mun nau i Barnabas tana i Saul ape gagapalag na me log raka rara ti apena. 3Wa neira me gargara mamasa, wa me tataro, wa me taŋov irarua, qara ukeg irarua.

4Naŋ amon o Vui we Roŋo me vatraŋ irarua at, irarua qara taqel siwo i Selukia, wa me gamo vitag aia i Kupros. 5Wa me niŋa a Salamis, irarua we gaganag o vavae non God alo ima siwo tuwale ŋaŋ nora Israel, wa i John mulaŋ amenrara napiriŋirara. 6Wa irarua me mule raveaglue nol o vanua gai niŋa Paphos, wa we ilo aia o tuara Magos: ineia o prophet soŋsoŋ, o ta Judea, nasasana i Bar‐jesus. 7Wa ni me toga amen o governor, Sergius Paulus, o matanur. Wa ineia iloke me suware ma i Barnabas tana i Saul, wa me sike sin roŋotag mona o vavae non God. 8Pa i Elumas o Magos (we gato sea tamaine ape sasana) me vatriv goro rara, we maros we rave sipa kel o governor nan o liŋe nomtup. 9Naŋ i Saul, pa ineia mulaŋ i Paul, we uravag o Vui we Roŋo, me sagaragia, 10ti vet wa, Gai, ko me uravag o galeva wa o nurnurug kiskislag nol, nat Satan, ko we tavalalea mun o taniniga nol, ko tete motmot tea we ge kekeluag ilo namatesalan Lord we taniniga? 11Wa ilo, ilokenake napanen Lord avunama, wa ko te matapei, tete ilo o loa, pa tete vagamaul. Naŋ o marav me gara goro gaplotua, wa o siliga; wa ni me teteqa, ti sike rasei te sapania. 12Wa o governor me ilo o gene me ge, ti nomtup apena, me niŋagia ape liŋe vatogo mon Lord.

13Wa ira Paul me tavaraka nan o Paphos, me niŋa Perga takele Pamphulia. Wa i John me rowovitagira, we vusiag kel i Jerusalem. 14Pa ineira me sir vanua nan o Perga, me niŋa Antiokia a Pisidia; wa me mule pata ilo ima siwo tuwale alo qoŋ mapsag, wa me pute siwo. 15Wa me vasogo o lea wa o prophet ŋaŋ, ira ilogoro o ima siwo tuwale me vatraŋ isei sur rarua, we vet wa, Ragera ratatasiu, si o vava varagai amen kamurua mun o sul, ura vava.

16Naŋ i Paul me tavaraka, ti taqtaqar gorora mun napanena ti vet wa, Ragai ra nanat Israel, wa irasei we momogo God, tur tiŋqoro. 17God o sul iloke ra Israel me ilo sur anona ira tamanina, wa me ge raka sage o sul alo neira we toga galean alo vanua Misraim; wa me vanogagira at nan o vanua ilone mun napanena lalaŋag. 18Wa o masaoi tam o tau saŋavul vat ni me roŋomalumlum mun neira alo vanua vanameag. 19Wa ni me ge tagea paso qet o veve sul lavearua alo vanua Kanaan, ni qara vile valval neira navanuara mun gar o vanua usurag, 20tama si o tau melnol vagavat o avaviu saŋavul vat. Wa me paso o ine, ni me le mun neira ira veveg me niŋa o prophet i Samuel. 21Paso nan neira me paere o maranaga, wa God me le mun neira i Saul natun Kis, ineia talo veve Benjamin, o tau me saŋavul vat. 22Wa me lareagia paso, ni qara ge raka mun neira i David sin maranaga amaira, wa ni me gaganag weswes ape neia wa, Na me ilo mok i David natun Jese, o tanun we sasarita ape lolok, wa ni te ge o gene ŋaŋ nau we maros. 23Wa tamaira tupun o tanun iloke God me la lue mun Israel o Vaesu, i Jesus, tama ni me ligog ti. 24Wa i John me gaganag moai nan non o muleva ma o vasugroŋo nomleas mun o sul nol ira Israel. 25Wa alo me rivtag ti qet non o tano valvalago, i John ti vet wa, Pa ikamiu we nonom si inau isei? Inau gate ineia; pa ilo ma, isei we mule ma ape kulak, na gate sasarita si a ul reag non o rotrot goro malekae. 26Ragai, ratatasik, ira wota ma alo veve Abraham, wa irasei amen kamiu we momogo God, me vatraŋ o roro esuva iloke mun nina. 27Ape ragai we toga a Jerusalem, wa irasei we liwoa gorora, nalolora me qoŋ ape neia, wa ape liŋara prophet we vasvasogo val qoŋ mapsag, pa me ge tira o liŋai ŋaŋ ilone, we veveg mateia. 28Wa neira gate ilo suar tea o manig matea, pa neira me paere mun Pilat si a ge mateia. 29Naŋ neira me ge tira qet o gene me rave ti we tuai ape neia, neira qara lav suria nan o tangae, me saloa alo qaraŋ tamate. 30Nava God me na raka kelua nan ra mate. 31Wa iragai me sage tuwale ti amaia nan o Galilea i Jerusalem me iloa o qoŋ we qoqo, wa ineira ira gaganag we tira ape neia ilokenake mun o sul. 32Wa ikamam we gaganag ilokenake o lea we wia mun kamiu, ape ligoligog me ligog ti mun tupunina, 33si God me ge wesu ilone veta mun ra natunina alo me na raka kel i Jesus; tama me rave mulaŋ alo varue Psalm wa, Iniko i Natuk, na me ge wota iniko qarig. 34Wa ape ni me na raka kelua nan ra mate, wa tete kel mulaŋ ilo naru, ni me vet tamaike wa, Na te le at muniko o gene we roŋo ŋaŋ non David tete ava lai. 35Wa ni me vet mulaŋ alo tuara tanoi wa, Ko tete ukeg i Roŋo anoma sin ilo o naru. 36Pa i David me rowrowovag paso amaira talo taraŋina tataga o maros non God, me maturu, wa qara mapua amaira tupuna, wa me ilo o naru. 37Pa i gene ilone God me na raka kelua, gate ilo o naru. 38Ragai ratatasik, kam te gilala momiu si mun o tanun iloke me gaganag o nomvitag pugai mun kamiu. 39Wa valsei qe nomtup, te ge taniniga kelua gina alo iloke nan o savasava ŋaŋ gate ge taniniga lai kamiu apena alo lea mon Moses. 40O manigiu ilone tur ilo goro, nan o gene ilone ira prophet me ligog veta ti wa rowo ma vunamiu, was,

41Tur ilo ma, ira vasvasigtag, wa tur mamakei, wa tur tagea;

Ape nau we ge o gagapalag alo qoŋimiu,

Pa si isei qe gaganag tapare mun kamiu ape gagapalag ilone kamiu tete nomtup apena.

42Wa neira we rowolue, we paere mun rara si rara a gaganag mulaŋ o vavae ŋaŋ iloke muneira alo tuara qoŋ mapsag. 43Wa me ukeg o vavtig sul, wa ira Israel we qoqo wa tuan proselut we momogo God me tataga i Paul tana i Barnabas; wa rarua me vet mun neira, wa me pesira neira kata maremare alo sogov mon God.

44Wa alo tuara qoŋ mapsag mantagai ti o laqlaqe vanua nol me vug tuwale, si a roŋotag o vavae non God. 45Pa ira Israel me ilo o sul we qoqo, we toqosag o loloanu, me leasag o gene ŋaŋ i Paul we gaganag apena, we leasag, we vava nawono. 46Naŋ i Paul tana i Barnabas me wawaŋ raka, we vet wa, Tete ava lai si neira a gaganag moai ran o vavae non God mun kamiu. Pa kamiu me gevitag reag ilone, wa we veveg kel kamiu si gate sar ape esu galava, ilo ma, kara qara so leas sur o sul ŋaŋ we sea apena. 47Ape i Lord me vatraŋ kamam tamaike wa,

Inau me vatira iniko tam o valawar mun o sul ŋaŋ we sea,

Si ka toga mun esuva niŋa o ulus marama.

48Naŋ ira tagvanua me roŋotag iloke, qara malakalaka apena, wa me ge ronoga o vavae non God; wa irasei nol me vonora ape esu galava me nomtup. 49Wa me tak lue valval o roro vavae non i Lord alo vanua nol ilone. 50Nava ira Israel me vava lakosa o retavine motar we momogo God, wa ira moai talo laqlaqe vanua, me ge raka si a kos i Paul tana i Barnabas, wa me vure savrag irarua nan o tiŋgoro vanuara. 51Pa irarua me neneŋag goro neira o wuwue tano tape raŋonrara, wa me mule niŋa Ikonium. 52Wa ira tiŋqoro ŋaŋ me uravag o malakalaka wa o Vui we Roŋo.

Currently Selected:

O Gagagapalag 13: MOTA

Highlight

Copy