Лукастар 18

Дума Исусостири палай пхивли

1Тунчи Исусо роспхэндя лэнди дума, со трэбуй тэ на пэрэашэн тэ мангэнпэ Дэвлэс ай тэ на грыжонпэ.

2— Андэ екх форо сас сындомари, саво на даралас Дэвлэстар и на лажалас манушэндар. 3Андэ кодва форо сас екх пхивли. Вой авэлас кав сындомари, мангэлас: «Фэрисар ман мэрнэ вражымарестар». 4Сындомари бут вряма на камэлас тэ поможысарэл лати, ай тунчи пхэндя ежэно пэсти: «Мэк мэ Дэвлэстар на дарав и манушэндар на лажав. 5Нэ сар кадья пхивли дохаля манди пэстирэ мангимаса, терава, со вой мангэл, кай вой тэ пэрэашэл тэ дохал ман».

6Ай о Рай пхэндя:

— Шундэ, со пхэнэл сындомари найчячимаско? 7Сар о Дэл на фэрисарэла колэн, кас Вов вытидя, и ко фартэ мангэн Лэс о дес и рят? Чи ашавэла лэн о Дэл? 8Пхэнав тумэнди: Вов грабисавэла пав чячимос тэ фэрисарэл лэн. Нэ кала Шаво Манушыкано авэла, аракхэла патимос пэ пхув?

Дума пала фарисеё ай палай стидэмарё налогонэндиро

9Колэнди, савэ гындонас пала пэстэ, кай онэ жужэ, и пхутярдэс дикхэнас пэ авэр мануша, Исусо роспхэндя кацави дума:

10— Дуй мануша зажыле андо храмо тэ мангэнпэ Дэвлэс. Екх лэндар сас фарисеё, ай авэр — стидэмарё налогонэндиро. 11Фарисеё тэрдёлас и мангэласпэ Дэвлэс кадя: «Дэвла, наис Тути, со мэ на кацаво, сар авэр мануша: прахаря, найжужэ, лубаря, и на кацаво, сар акадва стидэмарё налогонэндиро. 12Мэ ритярав посто дувар андо курко, дав дэшто котор андар вся, со затерав». 13Ай стидэмарё налогонэндиро тэрдёлас андэ риг и на ваздэлас якха пэстирэ кав болыбэн, нэ марэлас пэс андо колин и пхэнэлас: «Дэвла, тангосар ман, бэзэхалэс манушэс!» 14Пхэнав тумэнди, со кадва мануш жыля черэ майэртисардо, сар кодва. Кодва, ко ваздэл пэс, авэла обмэкло, а ко обмэкэл пэс, ваздёла.

Исусо бахталисарэл бэяцэн

15Мануша анэнас кав Исусо цэкнэн бэяцэн, кай Вов тэ лэлпэ лэндэ. Сытярнэ удикхле када и камле тэ запхэнэн лэнди. 16Исусо акхардя лэн Пэстэ ай пхэндя:

— Мэк бэяцэ авэн Мандэ, и на запхэнэн лэнди, колэсти со Тхагаримос Дэвлэско важ кацавэ, сар онэ. 17Пхэнав тумэнди чячимаса: ко на прилэла о Тхагаримос Дэвлэско, сар бэято, кодва на зажала андэр лэстэ.

Исусо дэл дума барвалэ пхурэдэрэса

18Екх пхурэдэр пушля Лэстар:

— Лашо Сытяримари, со тэ терав, кай манди тэ дэлпэ жувимос вакоско?

19— Сости ту акхарэс Ман «лашо»? — пхэндя Исусо. — Нико на лашо, качи екх о Дэл. 20Ту жанэс запхэнимос: на тер лубимос, на умар, на чёр, на пхэн хохавимаско лав, пативаса обжапэ дадэса и лэ даса.

21— Вся када мэ терав пай тэрнэ пэстирэ бэрша, — пхэндя вов. 22Исусо ашундя када ай пхэндя лэсти:

— Екх тути инке на хутилэл. Битин вся, со тутэ исин, и роздэ ловэ чёрорэнди, и тунчи тутэ авэла барвалимос по болыбэн. Тунчи ав и жа пала Мандэ.

23Кала пхурэдэр ашундя када, вов грыжосайля, колэсти со сас фартэ барвало. 24Кала Исусо удикхля, со кодва грыжосайля, Вов пхэндя:

— Сар пхарэс барвалэнди тэ зажан андо Тхагаримос Дэвлэско! 25Майлокхо лэ верблюдости тэ прожал андэ сувьяко кан, сар лэ барвалэсти тэ вжал андо Тхагаримос Дэвлэско.

26Кола, ко ашундя када, пхэндэ:

— Ко тунчи авэла фэрисардо?

27Исусо пхэндя:

— Сар кав мануш нинай зор тэ стерэл варисо, кав Дэл исин зор кода тэ стерэл.

28Тунчи Пэтро пхэндя:

— Акэ, амэ ашадэ вся, со амэндэ сас, и жылям пала Тутэ.

29Исусо пхэндя лэнди:

— Пхэнав тумэнди чячимаса: всаворэ, ко ашадя чер, и ла ромня, и лэ пхралэн, лэ дадэс и ла да, тай лэ бэяцэн важ о Дэвлэско Тхагаримос, 30онэ лэна майбут андэ кадья вряма, ай андэ вряма, сави авэла, — жувимос вакоско.

Исусо андо трито моло пхэнэл палай Пэско миримос

31Тунчи Исусо отакхардя дэшудуен андэ риг ай пхэндя лэнди:

— Акэ, амэ зажас андо Иерусалимо. Котэ терэлапэ вся, со запистросардо пророконца пала Шаво Манушыкано. 32Вов авэла отдино андэ васта манушэнди авря народостар, и кола авэна тэ асанпэ Лэстар, обмукэна Лэс и шунгардэна пэр Лэстэ, 33авэна тэ марэн чюкнянца и умарэна. Нэ по трито дес Вов жундёла.

34Сытярнэ нисо калэстар на полинэ. Вся, со Вов пхэндя, сас важ лэнди запхандадо, и онэ на полэнас, со Вов камэлас лэнди тэ пхэнэл.

Исусо састярэл корэс

35Кала Исусо поджалас кав форо Иерихоно, пашав дром бэшэлас тай мангэлас коро мануш. 36Вов ашундя, со паша лэстэ прожан бут мануша, пушля, со када кацаво.

37— Жал Исусо андав Назарето, — пхэндэ лэсти. 38Тунчи коро зацыписайля:

— Исусо, Шаво Давидоско! Тангосар ман!

39Кола, ко жалас майанглал, линэ тэ пхэнэн, кай вов тэ ашэл мулком, нэ коро инке майфартэ ля тэ цыписавэл:

— Шаво Давидоско! Тангосар ман!

40Исусо ашыля и припхэндя, кай калэ манушэс тэ анэн Лэстэ. Кала кодва поджыля, Исусо пушля лэс:

41— Со ту камэс, кай Мэ тэ терав важ тути?

— Рай, мэ камав тэ дикхав, — пхэндя коро.

42Исусо пхэндя лэсти:

— Мэк отпхэрнавэнпэ тутэ якха! Патимос тиро састярдя тут.

43Коро андэ кодья вряма ля тэ дикхэл. Вов жыля палав Исусо и лашарэлас лэ Дэвлэс. Всаворэ мануша, ко дикхля када, линэ кадя ж тэ лашарэн лэ Дэвлэс.

Currently Selected:

Лукастар 18: СРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия пэ влахицко романи шыб