Рындоря 6

Апостолоря вытидэн эхта бутярнэн

1Андэ кала деса, кала сытярнэн ашыля майбут, элинисторя#6.1 Элинисторя — кадя акхарэнас евреёнэн, савэ дэнас дума на по евреёнэндири, ай по греконэндири шыб. линэ тэ холявэн пэ евреёря пала кода, со лэндирэ пхивлянди нисо на дэнас, кала роздэнас хамо кажно дес. 2Тунчи дэшудуй апостолоря акхардэ бутэн сытярнэн тай пхэндэ:

— Наймишто амэнди тэ ашавас лав Дэвлэско тай тэ подас о хамос пэ мисяля. 3Акэ со, пхрала, вытидэн машкар пэстэ эхта манушэн, пала савэ лашо дэн дума, савэ пхэрдярдэ Духоса и годяса, и тховаса лэн пэ кадья бути. 4Ай амэ всавори вряма аваса тэ мангаспэ Дэвлэс и тэ терас бути лавэса.

5Всаворэнди чялиля кадья дума, и вытидэ Стэфанос, муршэс, саво пхэрдярдо патявимаса и Свэнтонэ Духоса, Филипос, Прохорос, Никанорос, Тимонос, Пармэнос и Николаёс, прозелитос#6.5 Прозелито — мануш, савэс обшындэ и вов приля иудаенго патявимос. андай Антиохия. 6Лэн тховдэ англай апостолоря, савэ мангле Дэвлэс тай тховдэ и васт пэр лэндэ.

7О лав Дэвлэско барёлас, и андо Иерусалимо ашэлас майбут сытярнэ. Кадя ж и андай рашая фартэ бут патяйле.

Стэфанос схутилэн

8Ай о Стэфано, пхэрдярдо мищимаса и зораса, терэлас барэ диворя и шпэры андо народо. 9Лэ Стэфаноса ашыле тэ ханпэ коисавэ андай синагога, сави проакхарди Либертинорэндири#6.9 Либертиноря — кадай дума пала кола евреёря, савэ сас залинэ андай Иудея андэ Римско пхув, кай тэ авэн бутярнэнца. Тунчи онэ сас отмукле пэ воля, ай лэндирэ бэяцэ рисайле палпалэ андэ Иерусалимо.. Кордэ кадя ж пхирэнас мануша андай Киринея и Александрия, тай андай Киликия и Цэкни Азия. 10Нэ лэндэ на сас, со тэ отпхэнэн ла годяти и Духости, савэса вов пхэнэлас. 11Тунчи онэ подпхэндэ коисавэн тэ пхэнэн:

— Амэ ашундэ, сар вов пхэнэлас бэзэхалэ лава пэ Моисеё и по Дэл.

12Онэ вазгле о народо, пхурэдэрэн и сытяримарен Законостирэн, нахукле пэр лэстэ, хутилдэ тай андярдэ андо Синедрионо. 13Котэ тховдэ хохавнэн допхэнимарен, савэ пхэнэнас:

— Кадва мануш на пэрэашэл тэ пхэнэл бэзэхалэ лава пэ кадва свэнто тхан и по Законо. 14Амэ ашундэ, сар вов пхэнэлас, со Исусо андав Назарето розмарэла кадва тхан и пэрэтерэла сытяримос, саво пэрэдя амэнди Моисеё.

15Всаворэ, ко бэшэлас андо Синедрионо, дикхэнас пэр лэстэ и дикхле, со муй лэско, сар муй ангелоско.

Currently Selected:

Рындоря 6: СРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия пэ влахицко романи шыб