Jeremías 5
5
Smulic ti jteclum Jerusalene
1Ti Diose xi ta xale:
“Xaniic ti calleetic yu'un ti Jerusalene.
Sa'ic ta jujujot ti bu xvolvun ti jnaclejetique.
T'unic lec mi oy bu ta xataic junuc ti oy ta yo'nton ta spasel ti c'usi tuq'ue, ti mu yanuc ti sjol yo'ntone.
Mi oy bu laj ataique, ta jch'aybe smul scolo' ti Jerusalene.#Gn 18.23-33.
2Oy buch'u ta xal ti nijil chimil ta yich'el ta muc' ti Diose,
naca sba no'ox ye.”
3Cajval, ochemot ta sa'el jnaclejetic ti tuc' sjol yo'ntone.
Laj atsits, mi ja'uc laj ya'ibeic xc'uxul un;
laj abusanbe ta stojolic ti vocole, mi ja'uc laj yich' o yo'ntonic.
Mu'yuc c'usi sc'anic albel.
Ti yo'ntonique x'ech' to syijil bat jech c'u cha'al ti tone,
laj to ta alel yu'unic ta stamel ti tuq'uil bee.
4Xichi laj jnop une: Ti buch'u mu sna'ic c'usi ta sc'an ti Diose,
ti buch'u mu xa'ibeic smelol ti c'usi yaloj ta smantal ti Dios yu'unique,
le'e, ja' no'ox ma' ti buch'utic xvanet no'ox yuni jolic ta x'ech' ti c'ac'al yu'unique.
5Bat jol ta yalbel sc'oplal ti buch'utic chapalic lec ta yojtiquinele.
Lec cac'tic une, mu'yuc macalic c'usi ta sc'an ti Diose, ti c'usi yaloj ta smantal ti Dios yu'unique.
Scotolic le'e, c'otemic ta yajcontra ti Diose, ti laj svalopatinic comel ti c'usi yaloj une.
6Jech o xal un, ta xloc' talel leónetic ta muc'tiquil vitsetic ti ta xmilatic yu'une.
Ta xloc' talel oq'uiletic ta sbajtical banomil ti ta xlilinatic ta ti'el yu'une.
Ti ta slumalique, buyuc no'ox ch'ambil ta be ta xc'ot yu'un ti jchop o ta bolometique.
J'ech'el ta stsutsesatic mi loc' xa ono'ox talele, ta scoj ti mu albajuc ti smulique,
ti mu albajuc c'usi loc' ta sa'el yu'unique.
7Ti Diose xi ta xale:
“¿C'u ono'ox la xachi ta jch'aybot amul yu'un scotol le'e?
Laj xa svalopatinun comel ti anich'nabe, ti utsuc xa sva'anic ta rextico ti diosetic ti ma'uc diosetique.
Busul no'ox ti sve'el laj cac'beique.
Ti stuquic une, yan ti sjol yo'ntonic ta jtojole,
ti xvoletic no'ox ta yaq'uel sbaic ta stojol ti ants ti sna' sbolomalin sbae.
8Yu'un co'ol s'elan t'ujbil totinom ca'etic ti liquem sjolic
ta slo'labe sjol yajnil ti xchi'ilique.
9¿Mi yu'un la mu'yuc ta jtsits ya'iic ti va'i s'elan taj une?
¿Mi yu'un ta xcol cu'un jun jteclum ti xc'ot o jech ta xich'e?
10Ochuc ya'i ti yajcontraic ta stojole, soquesbatuc ti uvaetic yu'une,
ac'o mi ta to x'ictabat jutucuc.
¡Jepbatuc ya'i sc'ob-c'obtac ti s'uvae, yu'un ma'uc xa cu'un!#Is 5.1-7; Jer 2.21.
11Ti Israele xchi'uc ti Judae laj syanijes sjol yo'nton ta jtojol.
Ti vu'un Diosune, mu stselbuj ti jc'ope.”
Scaj'alel ti tsitsele
12Ti Israele xchi'uc ti Judae mu'yuc ta venta c'ot yu'unic ti Diose, yu'un xi ta xalique: “Ti Diose mu'yuc laj sna'. Mu'yuc c'usi ta xc'ot ta jtojoltic. Mu xvul ta loq'uel ti letoe, ti vi'nale.” 13Yeilal no'ox ta xjelav yu'unic ti j'alc'opetique, yu'un ma'uc oy ta yeic ti c'usi ta xal ti Diose. 14Jechuc un, ja' no'ox xi yalojbun ti Ajvalil ti ja' Dios ti scotol xu' yu'une: “Ta scoj ti va'i s'elan ta xloc' ta alel yu'unique, taj une, xi ta xc'ot ta pasel cu'un une: Ti c'u s'elan ta xloc' ta alel cu'une, ta jpas ta atojol co'ol s'elan tilemal c'oc' ta xloc' ta ave. Ti jteclume, c'otuc jech c'u cha'al si' ti anicuc yu'un ti c'oc' taje.”
15Ti Diose, mu stselbuj ti xi ta xale: “Israel, ta jtijbe talel sjol ta scontrainelot jun jteclum ti nom ta xlic talele, jun jteclum ti jelavem xu' yu'une, ti yiloj xa ono'ox sba talel ta vo'nee, ti mu xchiquintaj avu'un ti sbats'i c'ope, ti mu jutebuc xava'i ti c'usi ta xale.#Dt 28.49-52. 16Scotolic taje, pucujil j'ac'-letoetic ta j'ech'el, lajebal xa xal o ti abtejebaletic yu'unique. 17Ta stun ta slajesic ti c'usi xloc' x'ayan avu'une, ti ave'el avuch'ome. C'alal ta aquerem atsebtac, ta stsutses ta j'ech'el. Ta ye ta sti'ic, ta stsutsesic ti achijtaque, ti avacaxtaque, ti a'uvataque xchi'uc ti aicuxtaque. Ti nac'obbail jteclumetic ti apatoj avo'nton yu'une, mu ta sc'obicuc ta xa'i ta slilinic xchi'uc ti abtejebaletic yu'unique.”
18Ti Diose, mu stselbuj ti xi ta xale: “Ac'o mi jech un, ta yorail taje, mu scotolicuc ta jtsutses ta j'ech'el. 19C'alal xi ta xasjac'beique: ‘¿C'u cha'al ti vi s'elan laj spasbuncutic scotol ti Ajvalil Dios cu'uncutique?’ xi xatac'bee: ‘Ti jech laj xa avalopatinic comel ti Dios ta scoj ti lic avich'ic ta muc' ta avosilal atuquic ti jyanlum diosetique, ja' no'ox jech ta xc'ot ta atojolic ec un, ti ta xavac' abaic ta tunel yu'un ti namal jyanlumetic ti mu xavojtiquinic jutebuque.’
Scaj-bijubtasel ti Israele
20“T'ambeic ya'i ti yajval lum yu'un ti Israele, ti xiuc yalbeic ti jteclum Judae: 21‘A'yio ava'i li'e, oy asat, mi ja'uc xavil. Oy achiquin, mi ja'uc xava'ibe xchiquinal.#Is 6.9-10; Ez 12.2; Mr 8.18. Mu'yuc ach'ulel xava'i aba, bol jteclumot ta j'ech'el. 22Ti vu'un Diosune xichi ta xcale: ¿Mi mu van xaxi'taicun xana'? ¿Mi mu van xlic nicnunanic ta jba ta jsat xana'? Vu'un jchapanoj ti jamal yi'tic bu c'alal xyuq'uet ta x'ech' ti nabe. Ti nabe mu xjelav ti bu c'alal spajeb albile.#Job 38.8-11; Sal 104.6-9; Pr 8.29. Ti syuc'benaltaque xvo'o'et no'ox ti stselte-tselte talele, mi ja'uc ta xjelav ti bu ono'ox ta x'ech'e. 23Ti vo'oxuque, ja' xa me'inem ta avo'ntonic ti mu xava'ibeic xchiquinale, ti jelav ti atoyobbailic ta j'ech'ele. Va'al laj avictaicun comel, labatic un. 24Mi ja'uc oy bu loc' ta avo'nton ti xachiique: La' quich'tic ta muc' ti Ajvalil Dios cu'untique, ja' ta xac' taluc vo' ta yorail ti sictic ta x'ech'e, ti sba yalel chaquilo' ti ta corixmatique, ta spasel xtoc ti c'u sjalil albil yorail ta xich' tsobel ti ts'unubaletique. 25Ta scoj amul acolo'ic, lic c'otuc ta soquel. Laj sc'oplal ta x'ech' ta ave ati'ic ti va'i s'elan lequilal taje.
26‘Yu'un ti jlumale, oy chopol viniquetic ti co'ol s'elan jyac-mutetic ti xpaq'uet xa ta sq'uelele, ti naca sva'an no'ox pets'etic yo' tsacbil ta xc'ot yu'un ti yane. 27Naca yeleq'uic ti c'usitic x'ayan ti noj no'ox ta snaique, co'ol s'elan c'otem jech c'u cha'al noj no'ox ti mutetic ta sbajlebe. Ja' jech lic yich' yipic, jc'ulej batic ta j'ech'el. 28Lec ta smalq'uin sbaic, cuts'ul no'ox sjubemalic. Xi s'elan bu c'alal pajem xchi'uc ti smul scolo'ique: Mu stic' sbaic ta spojel ti buch'u ch'abal buch'u x'ayan yu'unique. Mi ja'uc oy ta venta yu'unic ti me'un mu'natetique.
29‘¿Mi mu'yuc van ta jtsits ta scoj ti va'i s'elan taje? ¿Mi mu xc'ot o ta xich' ti buch'u jech ta spas taje? Ti vu'un Diosune, mu stselbuj cu'un. 30Ti c'usitic ta xc'ot ta pasel ti li' ta muc' ta lume, xi'bal sba ta j'ech'el, chib xa me sc'oplal xal o. 31Ti c'usi ta scaj'alic ti j'alc'opetique, naca jutbil. Ti paleetique, ja' no'ox yac'ojbeic yipal ta spasel mantal ti c'usi xloc' venta ta xa'iique. Loc' ta sa'el avu'un le' une, cuni lumal. Xcaltic taj une, ¿c'usi ta xapasic xana' mi c'ot ti yorail une?’ ”
Currently Selected:
Jeremías 5: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
